Փաստ ինֆո

Տարածքային համաչափ զարգացման և Երևանը սիրել-չսիրելու մասին երեկ մեկնարկած վիճաբանությունն ԱԺ-ում` մայրաքաղաքի ճանապարհաշինական ծրագրի համար 130մլն դոլարի վարկի առիթով, շարունակվեց նաև այսօր:

ԱԺ պատգամավոր Էդմոն Մարուքյանն այսօր առիթն օգտագործեց պատասխանելու երեկ ԱԺ փոխնախագահ Էդուարդ Շարմազանովի ելույթին, որտեղ նա որոշ պատգամավորների մեղադրեց «գավառական» մտածելակերպ ունենալու համար, քանի որ նրանք դժգոհել էին Երևանը կառուցապատելու համար ծախսվող մեծ գումարներից, այն դեպքում, երբ մնացած քաղաքների փողոցներն օրեցօր ավերվում են:

«Մի կողմից ասում են՝ արտագաղթ կա, բա ո՞նց անենք, որ մարդիկ ապրեն գյուղերում, աշխատանք չկա, մի կողմից էլ բոլոր միջոցները կենտրոնացած են մայրաքաղաքում: Պետական կառավարման համակարգն այնպիսին է, որ կենտրոնացված քաղաքականություն է վարվում: Եվ դա հետսովետական պրոբլեմ է: ՌԴ-ում էլ անընդհատ խոսում են Մոսկվան բեռնաթափելու մասին, շրջաններում ծայրահեղ վիճակ է: Եթե վարկային հնարավորություններ կան, դրանից պետք է օգտվեն նաև մյուս քաղաքները: Այդ պետական կառավարման պատճառով է, որ բնակչության 1/3-ը կենտրոնացած է Երևան քաղաքում: Եվ դա ոչ մի լավ բանի մասին չի խոսում: Հիմա վարկ եք վերցնում ճանապարհների համար, երբ Գյումրիում ու Վանաձորում մարդիկ տնակներում են ապրում: Դե, վարկեր վերցրեք՝ էդ մարդկանց տնակների հարցը լուծելու համար»,- ասաց Էդմոն Մարուքյանը:

ԱԺ փոխնախագահ Էդուրդ Շարմազանովն այսօր դարձյալ արձագանքեց Մարուքյանին.  «Իբր թե իրենք մարզերի իրավունքների պաշտպանն են, և իբր թե մարզերում, որ վիճակը վատ է, մայրաքաղաքն է մեղավոր: Չի կարելի էդպես: Չի կարելի մեր երկրում բաժանում կատարել երևանցի, գյումրեցի, ալավերդցի»:

Ինչ վերաբերում է այսօր խորհրդարանում քննարկվող հերթական վարկային համաձայնագրին, որով նախատեսվում է վերանորոգել միջպետական ճանապարհները, ընդդիմությունը ոգևորությամբ չընդունեց նաև այս ծրագրի համար ՎԶՄԲ-ից 40 միլիոն դոլար վարկ վերցնելու իշխանությունների գաղափարը:

ԱԺ ՕԵԿ խմբակցության պատգամավոր Հեղինե Բիշարյանն ասաց, որ ֆինանսական վարկերը հաստատելուց զատ խորհրդարանն այլևս որևէ կերպ չի կարողանում վերահսկել դրա ընթացքը, ուստի առաջարկեց մեխանիզմ մշակել, որով ԱԺ-ի կողմից հաստատված վարկերի ծախսման վերաբերյալ Աժ-ին հետագայում նաև հաշվետվություն ներկյայացվի: Իսկ առայժմ ՕԵԿ-ը դեմ է քվեարկելու անհասցե վարկերին, ինչպես որակեց Հեղինե Բիշարյանը:

Հովհաննես Մարգարյանն էլ հայտարարեց, որ հայ ազգը քաջ գիտակցում է, թե ինչ է վարկը: «Մենք ազգովի վարկի տակ ենք»,- ասաց նա: Ապա նաև յուրօրինակ հաշվարկ ներկայացրեց: Քանի որ 1դոլարանոցի մակերեսը 12քառ. սմ է, ապա այդ տրամաբանությամբ, 1 դոլարանոցներով 100 դոլարով հնարավոր կլինի ծածկել 1 քմ տարածություն: Նույն տրամաբանությամբ` 1 մլրդ դոլարով հնարավոր կլինի ծածկել 10 մլն քառ. կմ, իսկ 6 մլրդով` 60 մլն քառ.: «Երկու Հայաստան»,- արձագանքեց Նաիրա Զոհրաբյանը: «Երկու Հայաստան, տիկին Զոհրաբյան, ճիշտ եք ասում»,- ասաց Հովհաննես Մարգարյանը:

Հիշեցնենք, ՀՀ արտաքին պարտքն արդեն մոտ է 6մլրդ դոլարի շեմին:

ԱԺ ՀԱԿ խմբակցության ղեկավար Լևոն Զուրաբյանն էլ 3 պայման առաջադրեց, որոնց բավարարման դեպքում կառավարությունը կարող է վարկ վերցնել:

«Առաջին պայմանն այն է, որ, եթե վարկը վերցնում է այն կառավարությունը, որն ունի երկրի զարգացման հստակ ծրագիր: Երկրորդ պայմանը` եթե վարկի տակ գոյություն ունի իրականացվող աշխատանքների իրական ծրագիր: Երրորդ` եթե վարկը վերցնում և օգտագործում է մի կառավարություն, որը կոռումպացված չէ, այսինքն, եթե վարկը կծախսի նպատակային, այլ ոչ թե կհանգրվանի իշխանավորների գրպանները»,- ասաց նա:

ԲԿՀ խմբակցության ղեկավար Նաիրա Զոհրաբյան հայտարարեց, որ իրենք դեմ չեն վարկին, դեմ են հստակ ծախսային ծրագիր չներկայացնելով պատգամավորներից վավերացում պահանջելուն:

Նաիրա Զոհրաբյանը կարծիք հայտնեց, որ դրանում մեղքի բաժին ունեն նաև պատգամավորները, ովքեր չեն իրականացնում իրենց վերահսկողական ֆունկցիան : «Չենք գնում ՎՊ բացահայտումների հետևից, որոնք ոչ թե չարաշահումներ, կոռուպցիա են պարունակում»,- ասաց նա:

ԱԺ ՀՀԿ խմբակցության ղեկավար Վահրամ Բաղդասարյանն իր ելույթում նախորդ ելույթները որակեց. «Տաֆտալոգիայից մինչև օբյեկտիվ գնահատականներ»: Նա իր ելույթում նշեց, որ ճանապարհներն այն կոմունիկացիաներն են, առանց որոնց որևէ այլ ոլորտի զարգացում անհնար է: