Փաստ ինֆո

ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության դեպքի առթիվ քննվող քրեական գործի շրջանակներում բացահայտված մեկ այլ գործով այսօր կայացավ առաջին դատական նիստը:

Ինչպես ավելի վաղ «Փաստինֆո»-ն տեղեկացրել էր, ըստ մեղադրանքի՝ նույն զորամասի 1-ին կուրսանտական գումարտակի 1 մարտկոցի կուրսանտ, շարքային  Կարեն Բաղրամյանը Հայկազ Բարսեղյանի սպանությանը նախորդող օրը՝ հունվարի 28-ին ժամը 07:40-ի սահմաններում ննջարանը մաքրելու հարցի շուրջ վիճաբանել է համածառայող Հայկազ Բարսեղյանի հետ, որի ընթացքում բռնության գործադրմամբ հարվածներ է հասցրել վերջինիս մարմնի տարբեր մասերին:

Բացի այդ, Կարեն Բաղրամյանը նույն օրը, ժամը 13:00-ի սահմաններում, իր հանգիստը խանգարելու հարցի շուրջ, կրկին բռնություն է գործադրել Հայկազ Բարսեղյանի նկատմամբ և կրկին  հարվածներ հասցրել նրա մարմնի տարբեր մասերին:

 Կարեն Բաղրամյանին մեղադրանք է առաջադրվել ՀՀ քրեական օրենսգրքի 359-րդ հոդվածի 1-ին մասով, իսկ որպես խափանման միջոց է ընտրվել հրամանատարության հսկողության հանձնելը:

Այսօր Ավան և Նոր-Նորք վարչական շրջանների ընդհանուր իրավասության դատարանում, նախագահությամբ Դավիթ Հարությունյանի, պարզվեց կուրսանտ ամբաստանյալի ինքնությունը, ապա մինչև դատաքննությունն սկսվելը ամբաստանյալը միջնորդեց արագացված դատաքննություն կիրառել:

Նշենք, որ Կարեն Բաղրամյանը գործով նախաքննության փուլ առաջադրված մեղադրանքում իրեն մեղավոր է ճանաչել:

Սակայն մինչև միջնորդության քննարկումը նախագահող դատավորը դատհլիճում ներկաններին տեղեկացրեց, որ գործով որևէ անձ տուժող կամ տուժողի իրավահաջորդ ճանաչված չէ:

Մեղադրող դատախազ Հայկ Հարոյանը տուժողի իրավահաջորդ ներգրավվելու վերաբերյալ հայտնեց, որ Հայկազ Բարսեղյանի նկատմամբ քրեական հետապնդում չիրականացնելու վերաբերյալ որոշում է կայացվել մահվան հիմքով, քրեական դատավարության պահանջներից չի բխում նրա մերձավոր ազգականներից մեկին այս գործով որպես տուժողի իրավահաջորդ ներգրավվելը:

Իսկ պաշտպանական կողմը՝ ամբաստանյալի պաշտպան Ռուզաննա Սիրեկանյանը համակարծիք էր մեղադրանքը պաշտպանող դատախազի հետ:

Դատարանը կողմերին տեղեկացրեց, որ իր վարույթում քննվում է մեկ այլ քրեական գործ՝ մասնավորապես Հայկազ Բարսեղյանի սպանության գործը, որով Հայկազ Բարսեղյանի հայրը՝ Արկադի Բարսեղյանը ներգրավել է որպես տուժողի իրավահաջորդ, ուստիև դատարանը գտավ, որ անհրաժեշտ է Արկադի Բարսեղյանին ծանուցել դատական նիստի մասին՝ նրա ներկայությամբ Հայկազ Բարսեղյանի մերձավոր ազգականներից մեկին իրավահաջորդ ճանաչելու հարցը քննարկելու համար:

Դատարանի որոշմամբ մինչ այս հարցի լուծումը դատական նիստը հետաձգվեց, քանի որ եթե գործով որևէ անձ ներգրավվի որպես տուժողի իրավահաջորդ, ապա ըստ էության արագացված կարգով դատաքննության անցկացնելու միջնորդությունը քննարկելիս էական նշանակություն ունի նաև տուժողի իրավահաջորդի կարծիքը: