Փաստ ինֆո

«Կարծում եմ՝ ճիշտ չէ մայրաքաղաքի և մարզային բնակավայրերի հակադրումը, թեև ոչ ոք չի ժխտում, որ իսկապես մեր մարզային և շրջանային այլ քաղաքներում  բավականին լուրջ խնդիրներ ունենք: Բայց նման համեմատությունը անտեղի է, քանզի կասկածից վեր է, որ յուրաքանչյուր երկիր իր մայրաքաղաքին առավելապես ուշադրություն է հատկացնում, աշխատում է դարձնել այն հնարավորինս բարեկարգ ու հարմարավետ: Այդ իմաստով մեր երկիրը նույնպես բացառություն չէ, և դա ճիշտ մոտեցում է»,-ասաց ԱԺ փոխնախագահ Հերմինե Նաղդալյանը՝ ի պատասխան հարցի, թե կիսո՞ւմ է արդյոք ընդդիմադիր գործընկերների բարձրացված մտահոգությունները:

Նշենք, որ այսօր ողջ օրը խորհրդարանում պատգամավորները բանավիճում էին Երևան քաղաքի բեռնաթափմանը ուղղված վարկային ծրագրի տրամադրման հարցի շուրջ, որի ընթացքում հնչեցին բավականին սուր ելույթներ:

Ըստ ԱԺ փոխնախագահի՝ Երևան քաղաքում վերջին տարիներին հսկայական աշխատանքներ են կատարվում: «Ե՛վ բարեկարգումը, և՛ հարմարավետությունը, և՛ քաղաքի գեղեցկությունը օրեցօր այն ավելի գրավիչ են դարձնում և տեսանելի բոլորի համար՝ թե՛ քաղաքի բնակիչների և թե՛ հյուրերի»,-ասաց նա՝ կարծիք հայտնելով, թե շատ կարևոր է նաև, որ այդ աշխատանքը շարունակական է: Ինչ վերաբերում է Երևանի բեռնաթափմանն ուղղված ձեռնարկվող քայլերին, ապա,ըստ Հ.Նաղդալյանի, կարելի է ասել, որ այս վարկային ծրագրի նախաձեռնումը վերջին տարիներին դրան միտված, թերևս, ամենալուրջ ծրագրերից է:

«Սա նաև ընդհանուր Հյուսիս-հարավ գլոբալ ճանապարհաշինական ծրագրի գաղափարի ամբողջացումն է, այսինքն՝ Երևանի շրջանցող ճանապարհի կառուցումը կհանգեցնի նրան, որ հյուսիս- հարավ ճանապարհի այդ ռազմավարական նշանակությունն ու արդյունավետությունը էապես բարձրանա: Այդ ճանապարհի կարևորությունն այսօր վիճելի չէ, որովհետև ներկայիս աշխարհաքաղաքական իրողությունները՝ Իրան, Իրաք, Չինաստան, Վրաստանի հետաքրքրություններ Իրանի նկատմամբ, ԵԱՏՄ-ի ստեղծում և այլն, վկայում են, որ մի քանի տարի առաջ մեր իշխանությունների կողմից Հյուսիս-հարավ ավտոմայրուղու շինարարության նախաձեռնումը ժամանակին կատարված շատ ճիշտ քայլ էր»,-նշեց Հ.Նաղդալյանը:

Ըստ նրա՝ իհարկե, հասկանալի է, որ խորհրդարանականների և հանրության շրջանում կա որոշակի նեգատիվ վերաբերմունք վարկային ծրագրերի նկատմամբ, և դա պարզ է, որովհետև որևէ մեկին հաճելի չէ նոր բեռի ավելացում թե՛ բյուջեի, թե ապագա սերունդների վրա: Նույնկերպ մտածում է և՛ իշխանությունը, և՛ ընդդիմությունը, կիսում բոլոր մտահոգությունները, բայց դա ամենևին էլ չի նշանակում, որ չպետք է որևէ բան ձեռնարկել և ձեռքները ծալած նստել:  

«Այսօրվա զարգացող աշխարհում իրականում վարկային ծրագրերով բավական մեծ աշխատանքներ են կատարվում, պետք է թե՛ կառավարությունը և թե՛ խորհրդարանը իր վերահսկողական լծակներով, իր հնարավորություններով անընդհատ ուշադրության կենտրոնում պահեն և ստեղծեն այնպիսի միջավայր, որպեսզի այս ծրագրերը լավագույնս իրագործվեն և այն արդյունավետությունը, որ ակնկալում ենք, արդարանա»,-ընդգծեց Հ.Նաղդալյանը:

Նա նշեց նաև, որ այս իմաստով Երևանի բեռնաթափմանն ուղղված վարկային ծրագիրը շատ կարևոր է, որովհետև քաղաքի բազմաթիվ փողոցներ պարզապես խցանված են և գերծանրաբեռնված՝ արդեն ոչ միայն աշխատանքային օրերին և երթևեկության պիկ ժամերին:

«Մենք նաև ողջունում ենք Երևանի քաղաքապետարանին և մյուս այն մարմիններին , որոնք մասնակցել են այս վարկային ծրագրի մշակմանը, և վստահ ենք, որ սա լինելու է արդյունավետ նախագիծ, այնպես, ինչպես ժամանակին եղավ Սարալանջի մայրուղու կառուցումը, որը բավականին թոթափեց մեր քաղաքի շնչառությունը»,-ասաց ԱԺ փոխնախագահ Հ.Նաղդալյանը: