Փաստ ինֆո

Երևանի քաղաքապետարանին պատկանող «Կենտրոն Մաքրություն» ընկերությունում կեղծ հավաքարարների անվան տակ առանձնապես խոշոր չափերի հափշտակության գործով ամբաստանյալներ, եղբայրներ Արթուր և Սամվել Հովհաննիսյանները հայտարարեցին, որ մեղադրանքի շուրջ դիրքորոշում կհայտնեն իրենց ցուցմունքներում:

Արթուր Հովհաննիսյանն, ըստ մեղադրանքի, 2007թ. ապրիլից մինչև 2013թ. սեպտեմբեր ամիսը զբաղեցնելով Երևանի քաղաքապետարանի «Կենտրոն մաքրություն» ՓԲԸ-ի տնօրենի, ինչպես նաև ինժեների պաշտոնները,  որպես տնօրեն պաշտոնեական դիրքն օգտագործելով, իր եղբոր` Սամվել Հովհաննիսյանի հետ նախնական համաձայնությամբ և համակատարմամբ, շահադիտական նպատակով նույն ընկերության աշխատակիցների օժանդակությամբ, խաբեությամբ առանձնապես խոշոր չափերի գումար հափշտակելու դիտավորությամբ կեղծել է ընկերության պահեստից ապրանքանյութական արժեքների դուրս գրման վերաբերյալ պաշտոնեական փաստաթղթեր, ու այդ եղանակով Երևան քաղաքի Կենտրոն համայնքի, այնուհետ Երևանի քաղաքապետարանի բյուջետային միջոցներից խաբեությամբ հափշտակել է առանձնապես խոշոր չափերով գումար:  Բացի այդ, 2009 թվականի հունվար ամսին նախնական համաձայնության գալով նույն ընկերության փոխտնօրեն Արմեն Խաչատրյանի, գլխավոր հաշվապահ Գագիկ Հարությունյանի, աշխղեկներ Սանվել Եղոյանի և Գյուլիզար Շամոյանի հետ, միավորվել են խմբով հափշտակություն կատարելու համար, որից հետո 2009-2013 թվականներին Երևանի քաղաքապետարանի բյուջետային միջոցներից հափշտակել է որպես աշխատավարձ և դրան հավասարեցված այլ միջոցներ հաշվարկված ընդհանուրը առանձնապես խոշոր չափերի` 251 197 450 ՀՀ դրամ:

Ըստ մեղադրական եզրակացության, հափշտակված  300 մլն-ից ավելի ՀՀ դրամից  հիշյալ  շուրջ 250 մլն դրամը հափշտակվել է փաստացի ընկերությունում չաշխատող 130 անձանց՝ կեղծ հավաքարարների,  անուններով աշխատավարձ և դրան հավասարեցված այլ գումարներ  բանկային քարտերին  փոխանցելու ու կանխիկացնելու միջոցով: Գումարի մնացած մասն, ըստ մեղադրական եզրակացության, հափշտակվել է իբրև թե  բենզին ու դիզվառելիք ձեռք բերելու համար կեղծ տվյալներ ներկայացնելու միջոցով:

Այսպիսով, Արթուր Հովհաննիսյանին մեղադրանք է առաջադրվել  ՀՀ քրեական օրենսգրքի 178-րդ հոդվածի 3-րդ մասի 1-ին և  2-րդ կետերով, այն է՝ կազմակերպված խմբի կողմից առանձնապես խոշոր չափերով կատարված խարդախություն, 314-րդ հոդվածով՝  պաշտոնեական կեղծիք,  308-րդ հոդվածի 2-րդ մասով՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ, իսկ նրա եղբորը՝  Սամվել Հովհաննիսյանին մեղադրանք է առաջադրվել  ՀՀ քրեական օրենսգրքի  178-րդ հոդվածի 3-րդ մասի 1-ին և  2-րդ կետերով և 314-րդ հոդվածով:

Ամբաստանյալ Գագիկ Հարությունյանը հայտարարեց, որ ինքը ՀՀ քրեական օրենսգրքի  178-րդ հոդվածի 3-րդ մասի 1-ին և  2-րդ կետերով և 314-րդ հոդվածով առաջադրված մեղադրանքն ընդունում է մասնակիորեն: Մասնավորապես, ինքը համաձայն չէ գումարի չափի հետ և իրենք որևէ մեկի հետ կազմակերպված խումբ չեն ստեղծել:

2011-2013 թվականներին ընկերությունում որպես  աշխղեկ աշխատած Հրայր Հակոբյանը, ով մեղադրվում է ՀՀ քրեական օրենսգրքի  178-րդ հոդվածի 3-րդ մասի 1-ին և  2-րդ կետերով, հայտարարեց, որ ոչ մի բանում մեղավոր չէ, ոչ մի հափշտակություն չի արել, խմբում չի եղել, ոչ մեկի հետ էլ գործ չունի: 

178-րդ հոդվածի 3-րդ մասի 1-ին և  2-րդ կետերով և 325-րդ հոդվածով՝ փաստաթղթերի կեղծիք, մեղադրվող աշխղեկ Գյուլիզար Շամոյանը մասնակի ընդունեց մեղադրանքը: Վերջինս հայտարարեց, որ «աշխղեկ» բառը ձևական է, ինչ հրամայել են, կատարել է, այն է՝  3 մլն. քառ մ տարածք է մաքրել: Դատարանի այն դիտարկմանը, թե իրեն չեն մեղադրում  տարածք մաքրելու համար, ամբաստանյալը հայտարարեց, որ այդ մասին կասի իր ցուցմունքում: 

Առանձնապես խոշոր չափերի խարդախությանն օժանադակելու մեջ մեղադրվող՝  ընկերության պահեստապետ Գարեգին Գասպարյանը, նույն հոդվածով մեղադրվող դիսպետչեր Հունան Տեր-Հովհաննիսյանը, պաշտոնեական կեղծիքին օժանդակելու մեջ մեղադրվող  ավտոհավաքակայանի վարիչ  Միսակ Հարությունյանն ու կադրերի պետ Սամվել Եղոյանը իրենց մեղավոր չճանաչեցին:

Ըստ դատարանի սահմանած ապացույցների հետազոտման կարգի, հաջորդ դատական նիստում կսկսվի փաստաթղթերի, գրավոր ապացույցների ու իրեղեն ապացույցների հետազոտումը,  դրա ավարտից հետո կհարցաքննվեն վկաները, վերջում ցուցմունքներ կտան ամբաստանյալները: