Փաստ ինֆո

Ո՞վ է լինելու ՀՀ մարդու իրավունքների հաջորդ պաշտպանը, ո՞վ պիտի առաջադրի նրա թեկնածությունը և ինչպե՞ս պիտի նա աշխատի: Այս հարցերն այսօր ԱԺ-ում բավական բուռն քննարկումների ու գնահատականների առիթ դարձան:

Բանն այն է, որ 2012 թվականին ընդունված որոշման համաձայն, ՄԻՊ թեկնածուին ներկայացնում էր ԱԺ Մարդու իրավունքների պաշտպանության հարցերի մշտական հանձնաժողովը, իսկ 2015 թվականի Սահմանադրական փոփոխություններից հետո անհրաժեշտություն է առաջացել այս որոշման մեջ փոփոխություններ կատարելու:

Այսօր խորհրդարանի դատին ներկայացրած նոր նախագծով  Մարդու իրավունքների պաշտպանի թեկնածուին առաջադրելու է արդեն ԱԺ պետական-իրավական հարցերի մշտական հանձնաժողովը` հանձնաժողովի անդամների գրավոր դիմումներով ներկայացված թեկնածուների թվից:

Որոշման նախագիծը սահմանվում է նաև պաշտպանի թեկնածուների վերաբերյալ հանձնաժողովին դիմումների ներկայացման կարգը և ժամկետները:

Այսօր որոշման նախագիծը ներկայացնելիս ԱԺ պետական-իրավական հարցերի մշտական հանձնաժողովի նախագահ Հովհաննես Սահակյանն ասաց, որ հանձնաժողովի յուրաքանչյուր անդամ կարող է իր թեկնածուին առաջարկել: Սակայն, մի շարք պատգամավորների համոզմամբ, այս կարգը մրցակցություն չի ապահովում: ԱԺ պատգամավոր Նիկոլ Փաշինյանի խոսքով, մեկ թեկնածու ներկայացնելը ԱԺ-ին ընտրության հնարավորություն չի տալիս: Ավելին` կա տեսակետ, որ թեկնածուին առաջադրելու համար ընտրվել է հենց ԱԺ պետաիրավական հարցերի հանձնաժողովը, քանի որ այնտեղ ՀՀԿ խմբակցությունը մեծամասնություն է կազմում և կարող է իրեն ցանկալի թեկնածու ընտրել:

«Կարծում եմ` լիագումար նիստ պետք է գան առավելագույն ձայներ ստացած 2 անուններ»,- ասաց ԱԺ ԲՀԿ խմբակցության ղեկավար Նաիրա Զոհրաբյանը` հավելելով, որ մրցակցություն ապահովելու համար թեկնածու առաջադրելու իրավունք պետք է ունենան նաև խմբակցությունները: Նա նաև հիշեցրեց, որ պետաիրավական հանձնաժողովում իրենց խմբակցությունից ընդգրկված Տիգրան Ուրիխանյանն այլևս իրենց կուսակցության անդամը չէ, ուստի իրենք կարող են թեկնածուի հարցում տարաձայնություններ ունենալ: Եվ, ինչպես ավելի ուշ պարզ դարձավ` ունեն: Տիգրան Ուրիխանյանն իր ելույթում անկեղծ խոստովանեց, որ «Ալյանս» կուսակցությունը մտադիր է այդ պաշտոնում իրավապաշտպան Նարեկ Ալոյանի թեկնածությունն առաջադրել:

«Ես, օրինակ, կարծում եմ, որ հրաշալի օմբուդսմեն կլիներ իրավապաշտպան Վարդան Հարությունյանը կամ հենց Ավետիք Իշխանյանը, բայց կարող է` մեր գործընկեր Տիգրան Ուրիխանյանը չի կիսում մեր կարծիքը», -Ուրիխանյանին հակադրվեց Նաիրա Զոհրաբյանը:

Հանձնաժողովի մեկ այլ ընդդիմադիր անդամ` պատգամավոր Էդմոն Մարուքյանն էլ ասաց, որ պատրաստվում է Մարդու իրավունքների պաշտպանի թեկնածուի պաշտոնում առաջադրել «Ժառանգություն» խմբակցության ղեկավար Զարուհի Փոստանջյանի թեկնածությունը, և կոչ արեց բոլոր այն քաղաքական ուժերին և անհատներին, ովքեր խոսում են այլընտրանք ստեղծելու, լավ Օմբուդսմեն ունենալու մասին, պաշտպանել նրա թեկնածությունը: «Ես կարծում եմ, որ նա կարող է լինել  Մարդու իրավունքների լավագույն պաշտպանը՝ իր ունեցած փաստաբանական փորձով, խարիզմայով և մարդու իրավունքների վերաբերյալ իր մոտեցումներով»,- ասաց Էդմոն Մարուքյանը:

Քննարկման ընթացքում չշրջանցվեց նաև արդեն նախկին ՄԻՊ Կարեն Անդրեասյանի հրաժարականի մութ մնացած պատճառների խնդիրը: Պատգամավորները փաստեցին, որ այն դարձավ անկախ Հայաստանի պատմության մեջ ավանդույթ դարձած կուլիսային հրաժարականներից հերթականը, բայց, թեևս, ոչ վերջինը:

Նիկոլ Փաշինյանն այս համատեքստում հիշեց նախորդ 2 օմբուդսմենների, նախկին վարչապետ Տիգրան Սարգսյանի չհիմնավորված ու անսպասելի հրաժարականները` հռետորական հարց հնչեցնելով, թե երբ է ի  վերջո Հայաստանում վերջ դրվելու այս երևույթներին:

Էդմոն Մարուքյանն էլ անդրադարձավ այն տեսակետին, թե Կարեն Անդրեասյանի հրաժարականը հետևանք էր ԱԺ-ում նրա զեկլույցի վերաբերյալ հնչած կոշտ գնահատականների` ապա խոսքն ուղղելով Կարեն Անդրեասյանի վերաբերյալ քննադատական ելույթի հեղինակ Տիգրան Ֆարմանյանին, կոչ արեց. «Պարոն Ֆարմանյա'ն, մի երկու ելույթ ունեցեք մեր կառավարության մասին, թող հրաժարական տան»: