Փաստ ինֆո

ՀՀԿ ԳՄ նիստի ընթացքում այսօր քննարկվել է Սահմանադրական բարեփոխումներից բխող օրենսդրական փոփոխությունների, ներքին և արտաքին քաղաքականության, ԱԺ առաջիկա աշխատանքների և առաջին եռամսյակում սպասվող ՏԻՄ ընտրություններին կուսակցության մասնակցության հարցեր: Այս մասին այսօր նիստի ավարտին լրագրողների հետ հանդիպմանն ասաց ՀՀԿ խոսնակ, ԱԺ փոխնախագահ Էդուարդ Շարմազանովը:

Ինչ վերաբերում է ՀՅԴ հետ կոալիցիոն համագործակցության, մասնավորապես` այդ կուսակցությանը տրվելիք պաշտոնների մասին հարցին, Էդուարդ Շարմազանովն ասաց, որ կոալիցիայի մասին խոսք դեռ չկա, քննարկվում են ՀՅԴ հետ համագործակցության հարցեր: «ՀՀԿ-ն վերջնական դեռ չի որոշել՝ ում հետ պետք է գնանք համագործակցության, ում հետ պետք է գնանք կոալիցիա»,- ասաց Շարմազանովը, - «Այս պահին վերջնական որևէ բան հստակեցված չէ, պաշտոնների բաշխում տեղի չի ունեցել»: Միաժամանակ ԱԺ փոխնախագահը չբացառեց, որ այդ թեմայով, հնարավոր է, ասելիք ունենա հաջորդ շաբաթ գումարվելիք ԳՄ նիստից հետո:

ՀՀԿ-ն չի անդրադարձել նաև գործադիրում կադրային փոփոխությունները:

ՀՀ ԳՄ-ն, Շարմազանովի խոսքով, անդրադարձել է նաև ԵԽԽՎ լիագումար նիստում քննարկված հակահայ բանաձևերին: ՀՀԿ խոսնակը նշեց, որ առավել ադրբեջանամետ բանաձևը, բարեբախտաբար, չընդունվեց, իսկ Մարկովիչի բանաձևը, նրա խոսքով, չարիքի փոքրագույնն է: Այդուհանդերձ, Էդ.Շարմազանովը շնորհակալություն հայտնեց հայաստանյան պատվիրակության անդամներին` դրական գնահատելով նրանց կատարած աշխատանքը:

Ինչ վերաբերում է Ֆրանսիայի նախագահ Ֆրանսու Օլանդի նախաձեռնությանը, Էդ. Շարմազանովը ողջունելի որակեց այն` հավելելով,  որ ամեն ինչ պետք է անենք` ոչ միայն ցեղասպանության դատապարտման, այլև ԼՂՀ հարցի կարգավորման ուղղությամբ: