Փաստ ինֆո

Գյումրիում Ավետիսյանների ընտանիքի անդամների դաժան սպանության գործով այսօրվա դատական նիստում հանդես են եկել տուժողների երեք իրավահաջորդները՝  ընտանիքի երկու դուստրերն ու փեսան, ինչպես նաև մի շարք վկաներ:

Իրավահաջորդները դատարանում ցուցմունք չեն տվել, խնդրել են հրապարակել իրենց նախաքննական ցուցմունքները, որոնք հրապարակվել են:  

Մասնավորապես, Ավետիսյանների ընտանիքի դուստր Լուսինեն   նախաքննության ընթացքում նշել է, որ իրենց ընտանիքը թշնամիներ ու որևէ առնչություն ռուսական ռազմաբազայի զինծառայողների հետ  չի ունեցել: Տուժողի իրավահաջորդը կասկած է հայտնել առ այն, թե  Պերմյակովը միայնակ  է  հանցագործությունը  կատարել: 

Հարևանությամբ՝ նույն բակում  բնակվող Ավետիսյանների ազգականը ցուցմունք է տվել, որ ինչ-որ ձայն է լսել, դուրս է եկել, սակայն անսովոր  ոչինչ չի նկատել: Ուժեղ ձայնն, ըստ նրա, ինքը  մեկ անգամ է լսել: Վկան  ընդգծել է, որ  հիմա արդեն հասկանում է, որ իր արտահայտությաբ՝ գըմփոցը կրակոց է եղել: Ըստ նրա, ենթադրաբար ինքը վերջին կրակոցն է լսել: Վկան հայտնել է  նաև, որ փոքրիկ Սերյոժայի ձայնն է լսել: 

Վկայի նախաքննական ու դատաքննական ցուցմունքներում տուժող կողմը հակասություններ է  արձանագրել: Մասնավորապես,  եթե դատարանում վկան  հայտնել է, որ տուժողները  դարպասը միշտ փակ են պահել, և անծանոթը չէր կարողանա այն բացել, ապա  նախաքննության ժամանակ ասել էր,  թե դարպասը հեշտությամբ էր բացվում:

Ավետիսյանների հարևանուհին, ով նույն փողոցում խանութ ունի, դատարանում տված իր ցուցմունքներում հայտնել է, որ Ավետիսյանները  երբևէ ռուսական ռազմաբազայի հետ որևէ առնչություն չեն ունեցել, նրանց տուն  զինվորականներ մուտք և ելք չեն ունեցել: Նա հավելել է, որ սպանության օրվա առավոտյան խանութը բացելիս որևէ արտառոց բան չի նկատել:

Իսկ շտապօգնության բուժքույրը նշել է, որ դեպքի  մասին շտապօգնության կայան  ահազանգ ստացվել է որպես գազից թունավորում: Բուժքույրն է  պարզել, որ վեց անդամները հրազենային, իսկ փոքրիկ Սերյոժան՝  սվինով վնասվածքներ են ստացել:

Այսօր հարցաքննվել է նաև ռազմաբազայի վաշտի հրամանատարը, որտեղ ծառայել է Պերմյակովը:

Հարցաքննության արդյունքում տուժող կողմի փաստաբանները բարձրաձայնել են, որ Պերմյակովը չի համապատասխանել ռազմաբազայում ծառայության չափանիշներին: Առաջին, ըստ չափանիշներից մեկի, զինծառայողը  պետք է կարգապահ լիներ, սակայն  հայտնի է, որ  Պերմյակովն ութ անգամ դասալքության է դիմել: Նա Հայաստանում զինվորական ծառայության ենթակա չէր՝ հայտնի է, որ  Պերմյակովը  մշտապես եղել է հոգեբույժների ու հոգեբանների հսկողության ներքո: Խախտվել է պահանջը նաև առ այն, որ նրա հարազատները պետք է    դատվածություն  չունենան՝ հայտնի է, որ Պերմյակովի եղբայրը դատապարտվել է սեփական կնոջը սպանելու համար:

Ի դեպ, դատարանում  այսօր հրապարակվել է Գյումրիում տեղակայված 102-րդ ռազմաբազայի հրամանատարությունից ստացված նամակ-գրությունն առ այն, որ  վեց զինվորներն ու զինվորականներն, ովքեր սպանության օրը՝ 2015թ. հունվարի  12-ին,  ծառայել են ռազմաբազայում,  այլևս չեն ծառայում այնտեղ.   մի մասն արդեն իսկ զորացրվել է, իսկ պահակակետի հրամանատարը  ազատվել է զինվորական ծառայությունից Պերմյակովի կողմից  դասալքություն  ու սպանություն կատարելուց հետո: