Փաստ ինֆո

Կաշառք ստանալու-կաշառք տալու գործով այսօր դատարանը որոշում կայացրեց դատարան չներկայացած ամբաստանյալ Արթուր Խաչատրյանին բերման ենթարկել, որովհետև բացակայության որևէ հարգելի պատճառ չի ներկայացվել: Ամբաստանյալն, ըստ դատարանի,  անցյալ դատական նիստին, դժգոհում էր, որ ժամանակ չունի դատական նիստին ներկայանալու, սակայն ամբաստանյալի եղբայրը, ով նույնպես գործով ամբաստանյալ է,   հայտնեց, որ նա վատառողջ է: 

Դատարանը հետաձգեց դատական նիստը: 

ՀՀ ոստիկանության Պարեկապահակետային ծառայությունում դասակի հրամանատար Տիգրան Հայրապետյանն, ըստ  մեղադրանքի, ծառայողական պարտականություններն  իրականացնելիս տեղեկություններ ստանալով, որ Շահեն Կարապետյանը, Արթուր և Նորայր Խաչատրյանները, և այլ անձինք Մալաթիա տոնավաճառի հետնամասում տեղակայված Օհանով փողոցում, առանց իրավաբանական անձի պետական գրանցման կամ անհատ ձեռնարկատիրոջ պետական հաշվառման, համապատասխան վարձատրությամբ ապօրինի իրականացրել են հսկիչի գործունեություն,   2014թ.-ից մինչև 2015թ. հուլիս ամիսը Շ. Կարապետյանից և մյուսներից դասակի ոստիկան Գևորգ Ավետիսյանի միջոցով մաս-մաս ստացել է 422.000 ՀՀ դրամի չափով կաշառք:

Տիգրան Հայրապետյանին մեղադրանք է առաջադրվել ՀՀ քրեական օրենսգրքի 311-րդ հոդվածի 3-րդ մասի  3-րդ կետով՝  խոշոր չափերով կաշառք ստանալը և  նույն հոդվածի 2-րդ մասով՝ պաշտոնատար անձի կողմից կաշառք ստանալը կաշառք տվողի կամ նրա ներկայացրած անձի օգտին ակնհայտ ապօրինի գործողության կամ անգործության համար:

Շահեն Կարապետյանը, Արթուր Խաչատրյանն ու Նորայր Խաչատրյանը մեղադրվում են ՀՀ քրեական օրենսգրքի 312-րդ հոդվածի առաջին մասով՝  կաշառք տալը, իսկ Սամվել Խանյանը՝  ՀՀ քրեական օրենսգրքի 312-րդ հոդվածի 2-րդ մասով՝ խոշոր չափերով կաշառք տալը: