Փաստ ինֆո

ԱԱԾ վարչական շենքում քաղաքացի Կարեն Քյուփելյանին բերման ենթարկվածի կարգավիճակում թույլատրելի երեք ժամից շատ ավելի՝ 13 ժամ,  պահելու վերաբերյալ, այն է՝ պաշտոնեական լիազորությունները անցնելու գործով այսօր դատարանը բավարարեց պաշտպանական կողմի միջնորդությունը լրացուցիչ վկա՝ ամբաստանյալի վերադասին  հրավիրելու մասին:

Գործով  ամբաստանյալ,  ՀՀ ԱԱԾ հակահետախուզության գլխավոր վարչության 3-րդ բաժնի 3-րդ բաժանմունքի  ավագ օպերլիազոր  Հրանտ Մազմանյանի պաշտպան Տանյա Հակոբյանը միջնորդեց որպես վկա դատարան հրավիրել ու հարցաքննել իր պաշտպանյալի վերադաս հանդիսացած Տիգրան Աղաջանյանին ու Էդուարդ Նանյանին: Դատարանը բավարարեց միջնորդությունը միայն առաջինի մասով՝ պարզաբանելով, որ Է.Նանյանը, ըստ գործի նյութերի, կատարում էր Տ.Աղաջանյանի հանձնարարությունը: 

Ըստ մեղադրական եզրակացության, ՀՀ ԱԱԾ հակահետախուզության գլխավոր վարչության 3-րդ բաժնի 3-րդ բաժանմունքի ավագ օպերլիազոր Հ.Մազմանյանը 2007թ. նոյեմբերի 1-ին ժամը 20-ի սահմաններում քրեական օրենքով արգելված արարք կատարելու կասկածանքով Կարեն Քյուփելյանին ՀՀ ԱԱԾ վարչական շենք բերման ենթարկելուց և այդ կապակցությամբ համապատասխան արձանագրություն կազմելուց հետո, 3 ժամ անց պարտավոր լինելով նրան անհապաղ ազատ արձակել, անցնելով իր պաշտոնեական լիազորությունները, մինչև 2007թ. նոյեմբերի 2-ը ժամը 09-ի սահմանները Կարեն Քյուփելյանի կամքին հակառակ նրան ապօրինի պահել է ՀՀ ԱԱԾ վարչական շենքի 3-րդ հարկում գտնվող աշխատասենյակներից մեկում և այդ ընթացքում հսկել նրան, որով էական վնաս է պատճառել Կարեն Քյուփելյանի իրավունքներին ու օրինական շահերին` խախտվել է ազատ տեղաշարժվելու` ՀՀ Սահմանադրության 25-րդ հոդվածով ամրագրված նրա իրավունքը:

Ի պատասխան պաշտպանի հարցերի՝  տուժողը հայտնեց, որ արդեն իսկ բերման ենթարկվածի կարգավիճակում պահելու ժամկետի ավարտից հետո է ինքը հանդիպում ունեցել ամբաստանյալի վերադաս հանդիսացող Տ. Աղաջանյանի հետ՝ ժամը 23-ից մինչև կեսգիշեր ու կեսգիշերն անց: Տուժողը տարակուսանք հայտնեց, որ ապօրինությանը մասնակցել են ԱԱԾ 30-40 աշխատակիցներ, սակայն քրեական պատասխանատվության է կանչվել միայն  ամբաստանյալը:

Պաշտպանի հարցին ի պատասխան ամբաստանյալն իր հերթին հայտարարեց, որ եթե ինքը ազատ արձակեր քաղաքացուն, ապա կարգապահական պատասխանատվության կենթարկվեր՝ ընդհուպ մինչև համակարգից հեռացնելը: Ամբաստանյալն ընդգծեց, որ չի գիտակցել, որ քաղաքացին անօրինական է պահվել, այսինքն՝ որևէ դիտավորություն չի ունեցել: Միաժամանակ  ամբաստանյալը հայտարարեց, որ ինքը պաշտոնատար անձ չէ՝ իր հայտարարությունը հիմնավորելով. «Ես վերադասի կարգադրություններն եմ կատարել»: Ի պատասխան դատարանը նկատեց՝ վերադասի կարգադրությունները կատարողը պաշտոնատար անձ չէ՞: