Փաստ ինֆո

ԱՄՆ-ն և Թուրքիան պատրաստ են Սիրիայում «Իսլամական պետություն» ծայրահեղական կազմակերկության դեմ պայքարելու համար «ռազմական լուծում» գտնել: Ինչպես հայտնում է BBC-ի ռուսական ծառայությունը, այս մասին հայտարարել է ԱՄՆ փոխնախագահ Ջո Բայդենը:

Թուրքիայի վարչապետ Ահմեթ Դավութօղլուի հետ հանդիպումից հետո ԱՄՆ փոխնախագահն ասել է, թե լավագույն տարբերակը քաղաքական լուծումն է, սակայն եթե դրան հասնել չհաջողվի, ապա ԱՄՆ-ն այլընտրանքային տարբերակներ կփնտրի:

Ավելի ուշ Սպիտակ տունը պարզաբանել է, որ քաղաքական լուծման մասին փոխնախագահի խոսքերը վերաբերել են Սիրիայի իշխանությունների և խրովարարների միջև խաղաղ բանակցություններին, իսկ ռազմական լուծման մասին արտահայտությունը՝ միայն «Իսլամական պետության»-ը:

Խոսելով Սիրիայում քաղաքական կարգավորման հավանականության մասին, Բայդենն ասել է. «Մենք ոչ հոռետեսորեն, ոչ էլ լավատեսորեն տրամադրված չենք: Մենք նպատակադրված ենք դրան հասնելուն»:

ՄԱԿ-ի հովանու ներքո Սիրիայի իշխանությունների և ընդդիմության ներկայացուցիչների մասնակցությամբ բանակցությունները պետք է կայանան հաջորդ շաբաթվա ընթացքում: Մեծ Բրիտանիայի վարպապետ Դևիդ Քեմերոնը հայտարարել է, որ Ռուսաստանը պետք է մասնակցի այդ գործընթացին:

Միևնույն ժամանակ, ներկայացնելով ԻՊ-ի նկատմամբ ԱՄՆ-ի ծրագրերը, ԱՄՆ փոխնախագահը հայտարարել է, թե իրենք նկատի ունեն «Իսլամական պետության» վերացումը:

Բայդենն ասել է նաև, որ Թուրքիայում արգելված Քրդական Բանվորական կուսակցությունը ևս Անկարայի համար սպառնալիք է, ինչպես ջիհադականնները: «Դա սովորական ահաբեկչական խմբավորում է, և այն, ինչ նրանք անում են, վրդովեցուցիչ է»,-ասել է ԱՄՆ փոխնախագահը:

Աղբյուրը հիշեցնում է, որ անկախ պետություն ստեղծելու համար պայքարող քրդերի և Թուրքիայի միջև հակամարտությունը ձգվում է 30 տարուց ավելի: Դրա զոհ է դարձել ավելի քան 40 հազար մարդ:

Ավելի վաղ Թուրքիայի նախագահ Էրդողանի հետ հանդիպման ժամանակ Բայդենը  քննադատել էր Թուրքիայում խոսքի ազատության ոտնահարման դեպքերը: