Փաստ ինֆո

«Ղ-Տելեկոմ» ՓԲԸ-ում առանձնապես խոշոր չափերի՝  755 մլն դրամի, յուրացման վերաբերյալ գործով  այսօրվա դատական նիստում ավարտվեց դատական քննության դռնբաց հատվածը, հաջորդ դատական նիստում կսկսվի դռնփակ հատվածը, այսինքն՝  դատաքննությունը: 

 Դատարանի որոշմամբ,  դատական վիճաբանությունների փուլը  (եթե վերջինիս դատարանը հասնի), ինչպես նաև դատավճռի հրապարակումը կլինեն հրապարակային, այսինքն՝ դռնբաց դատական նիստում:

Այսօր ավարտված նախապատրաստական փուլում «Ղ-Տելեկոմ» ՓԲ Սյունիքի մարզում՝ Կապանում,  պատասխանատու, առանձնապես խոշոր չափերի յուրացման մեջ մեղադրվող Աշոտ Կույումջյանի պաշտպաններ Կարեն Մեժլումյանն ու Ինեսսա Պետրոսյանը ինքնաբացարկի միջնորդություն ներկայացրեցին դատարանին՝  «այս գործով, առավել ևս դրա դռնփակ քննությամբ դատարանը կաշկանդված կլինի իրական արդարադատություն իրականացնելուց»:

Ըստ պաշտպանական կողմի, քրեական գործի հարուցման առիթ է հանդիսացել Հայաստանում ամենահզոր և ազդեցիկ կազմակերպության` «Ղ-Տելեկոմ»  ՓԲԸ-ի ղեկավարի Ռալֆ Յիրիկյանի` հանցագործության մասին հաղորդումը և մեկ տարի տևած նախաքննություն իրականացվել է բացառապես ընկերությունից ստացված ընտրանքային փաստաթղթերի հիման վրա:

Պաշտպաններն ընդգծեցին, որ լրատվամիջոցները մեծ հետաքրքրություն էին դրսևորում և լուսաբանում նախարարին համարժեք պաշտոն զբաղեցրած Վազգեն Խաչիկյանի ու 13 անձից բաղկացած խմբի, ինչպես նաև Դատական դեպարտամենտի ղեկավար Միսակ Մարտիրոսյանի ու 13 անձի վերաբերյալ գործերը՝ առաջին գործով ամբաստանյալները  դատապարտվել են  4 տարում 290.000.000 դրամ, իսկ երկրորդ գործով  4 տարում 115.000.000 դրամ յուրացնելու համար:

Իսկ հեռավոր Կապան քաղաքից Աշոտ Կույումջյան անունով երիտասարդին մեղադրում են այն բանում, որ 4 տարում յուրացրել է 755.000.000 դրամ, որից 500.000.000 միլիոն դրամը՝  մեկ տարում:  «Այսինքն՝   Աշոտ Կույումջյանը մեղադրվում է նախորդ երկու գործերով յուրացումները միասին վերցրած,   մոտ երկու անգամ ավել գումար յուրացնելու մեջ: Այսքանով հանդերձ լրատվամիջոցների ներկայացուցիչները զգուշանում են՝  հայտնելով, որ գործը շատ հետաքրքիր է, սակայն «ՎիվաՍել»-ը համարյա բոլոր լրատվամիջոցների գովազդատուն է՝   երևացող կամ չերևացող,  և այդ պատճառով հիմնականում ձեռնպահ են մնում գործը լուսաբանելուց»,- նշեցին փաստաբանները:

Կ.Մեժլումյանն ու  Ի.Պետրոսյանն ընդգծեցին, որ  մեղադրանքի կողմում հանդես են գալիս դատախազությունն ու Հայաստանում ամենաազդեցիկ կազմակերպությունը, որոնց ջանքերով նախաքննության ժամանակ արդեն իսկ ինչքանով հնարավոր էր,  խախտվել  է  արդար դատաքննության իրավունքը և այդ ազդեցությունը ինչ-որ չափով չեզոքացնելու միակ միջոցը մնում էր հրապարակային, դռնբաց դատաքննությունը,  որը ՄԻԵԿ 6-րդ հոդվածի 1-ին մասով ու ՀՀ Սահմանադրության 63-րդ հոդվածով, ՀՀ քրեական դատավարության օրենսգրքի 16-րդ հոդվածով երաշխավորված իրավունք է:

Մասնավորապես, ըստ Սահմանադրության 63-րդ հոդվածի՝ Արդար դատաքննության իրավունքը, յուրաքանչյուր ոք ունի անկախ ու անաչառ դատարանի կողմից իր գործի արդարացի, հրապարակային ու ողջամիտ ժամկետում քննության իրավունք: Ըստ նույն հոդվածի,  դատական վարույթը կամ դրա մի մասը, օրենքով սահմանված դեպքերում և կարգով, դատարանի որոշմամբ կարող է անցկացվել դռնփակ` վարույթի մասնակիցների մասնավոր կյանքի, անչափահասների կամ արդարադատության շահերի, ինչպես նաև պետական անվտանգության, հասարակական կարգի կամ բարոյականության պաշտպանության նպատակով:

 «Վերը նշված ուղղակիորեն գործող նորմերում որևէ խոսք չի գնում առևտրային գաղտնիքի պաշտպանության մասին, որը փաստորեն ստորադասվում է անձի արդար և հրապարակային դատաքննության իրավունքին, իսկ սահմանված սահմանափակումների նպատակն էլ պետք է հիմնավորվի»,- ասացին պաշտպանները:

 Նշվեց նաև, որ մեղադրական եզրակացության մեջ որպես Աշոտ Կույումջյանի մեղքը հիմնավորող ապացույցներ նշված են երկու վկաների  ցուցմունքները: Մինչդեռ գործի նյութերում առկա նրանց հեռախոսազրույցների վերծանումներում   նշվող հարիֆը,  որի գլխին սարքել են,  Աշոտ Կույումջյանն է, դրանցում նշվում է նաև, որ   գումարն էլ այլ անձ է յուրացրել, և որ ծածկադմփոց են անում և այլն:

«Այս ապացույցներում որտե՞ղ էր առևտրային գաղտնիքը, որ դատարանը որոշեց դրանք դռնփակ հետազոտել»,- ասաց Կարեն Մեժլումյանը՝ ընդգծելով, որ նշվածն ընդամենը մեկ օրինակ էր, բայց դրանք բազմաթիվ են:

Դատարանը մերժեց պաշտպանական կողմի այս, ինչպես նաև մեկ այլ՝  ամբաստանյալ Կույումջյանի նկատմամբ  ընտրված խափանման միջոց կալանավորումը փոփոխելու կամ  գրավ կիրառելու մասին միջնորդությունը: 

Ըստ պաշտպանական կողմի, թեև գործն արդեն դատարան է հասել, սակայն Ա.Կույումջյանի պարագայում բացակայում է  հիմնավոր կասկածը և կալանավորումն ընտրելու հիմքերը:  Ավելին, քրեական գործում գտնվող ամբաստանյալի անձնագիրը լրացուցիչ երաշխիք  է, որ նա չի թաքնվի քննությունից: Նշվեց, որ երեք մանկահասակ երեխա ունեցող Կույումջյանը 15  ամիս գտնվում է կալանքի տակ, նա  մեղադրվում է ոչ թե գումարի, այլ լիցքավորման քարտերի յուրացման մեջ, իսկ  լիցքավորման քարտի ինքնարժեքը կազմում է 2-3 դրամ:

Աշոտ Կույումջյանն իր հերթին հայտարարեց, որ ինքն է բացահայտել յուրացումներն ու այդ մասին հայտնել ընկերության ղեկավարությանը, վերջինս էլ ասել է՝ գնա, աշխատիր, երկու ամիս աշխատել է, չի խուսափել ու չի թաքնվել, հիմա էլ պարտաճանաչ կներկայանա դատական նիստերին ու իր անմեղությունը կապացուցի:

Դատարանը բավարարեց «ՎիվաՍել»-ից  լրացուցիչ ապացույցներ  պահանջելու պաշտպանական կողմի միջնորդությունը: Դատարանը հարցում կուղարկի՝ ընկերությունից պահանջելով 2010-14թթ. հաշվետվությունները, ինչպես նաև աուդիտի եզրակացությունները   Աշոտ Կույումջյանի ենթակայության ներքո գտնվող պահեստի մնացորդների մասին: Դատարանը կողմի միջնորդությամբ ընկերությունից կպահանջի նաև ապացույցներ, որ այդ հաշվետվությունները հենց հիշյալ ժամանակահատվածին են վերաբերվում:    

Դատարանը մինչև որոշակի հանգամանքներ պարզելը հետաձգեց պաշտպանական կողմի միջնորդությունը  դատակոչի ցուցակը լրացնելու  ու հանցագործության մասին հաղորդում ներկայացրած  «ՎիվաՍել»-ի Գլխավոր տնօրեն Ռալֆ Յիրիկյանին դատարանում հարցաքննելու մասին: Մեկ այլ վկայի դատակոչի ցուցակում  ընդգրկելու պաշտպանական կողմի միջնորդությունը բավարարվեց:

«Փաստինֆո»-ի լրագրողի հետ զրույցում Կարեն Մեժլումյանը դրական գնահատեց դատարանի որոշումները վկային դատակոչի ցուցակում ընդգրկելու  և  «ՎիվաՍել»-ից  փաստաթղթեր պահանջելու մասին միջնորդությունները բավարարելու մասին: Ըստ պաշտպանի,  պահանջվող փաստաթղթերը կարևոր են գործին օբյեկտիվ լուծում տալու համար: Կ.Մեժլումյանը նշեց նաև, որ իրենք մտադիր են դատաքննության ընթացքում միջնորդություններ ներկայացնել առևտրային գաղտնիք չպարունակող ապացույցները հրապարակային հետազոտելու մասին: