Փաստ ինֆո

Կես ժամ ուշացումով որպես դատարանի դահլիճ օգտագործվող Գյումրիում ՌԴ ռազմաբազայի զորամասի դահլիճ բերվեց ամբաստանյալ Վալերի Պերմյակովը: 

Նրա մուտքը դահլիճ սպանված ավետիսյանների ընտանիքի հարազատների մոտ հուզմունքի մեծ ալիք առաջացրեց, հնչեցին բացականչություններ՝ ճիվաղ, մարդասպան, դահիճ, արնախում:

Ամբաստանյալ Պերմյակովը ո՛չ դատարանի, ո՛չ էլ մեղադրողի նկատմամբ ինքնաբացարկի կամ բացարկի միջնորդություններ չներկայացրեց, իսկ տուժող ընտանիքի իրավահաջորդների ներկայացուցիչները, մասնավորապես՝ Ա.Սաքունցը, հայտարարեց, որ դատարանին բացարկ հայտնելու իր դիրքորոշումը էապես կախված է իր մեկ այլ միջնորդության վերաբերյալ որոշման հետ:

Նույն տեսակետը հայտնեցին նաև մյուս իրավահաջորդների ներկայացուցիչները՝ հայտարարելով, որ առայժմ դիրքորոշում չեն հայտնում և նշեցին, որ դատարանը պետք է քննության առնի իրենց գործընկերոջ ներկայացվելիք միջնորդությունը:

Դատարանն այդուհանդերձ արձանագրեց, որ դատարանի նկատմամբ ինքնաբացարկի միջնորդություններ չներկայացվեցին:

Ա.Սաքունցը, մինչ միջնորդությունը ներկայացնելը, գոհունակություն հայտնեց, որ առանց դատարանի միջամտության դրական լուծում է ստացել նախորդ դատական նիստում իր կողմից ներկայացված և դատարանի կողմից մերժված միջնորդությունը:

Խոսքն այն մասին էր, որ նախորդ դատական նիստում Պերմյակովին երկու կողմից հսկում էին նույն զորամասի՝ նրա համածառայակիցները, իսկ այսօրվա դատական նիստում, արդեն օրենքով սահմանված կարգով, իրենց պարտականություններն են կատարում դատական կարգադրիչները:

Ա.Սաքունցը միջնորդեց, որպեսզի դատական գործի քննությունը զորամասի տարածքից տեղափոխվի Շիրակի մարզի ընդհանուր իրավասության դատարանի տարածք:

Ըստ Սաքունցի՝ զորամասի տարածքում արտագնա նիստ անցկացնելու՝ դատարանի որոշման հիմնավորումն առարկայազուրկ է:

Մասնավորապես՝ խոսքն այն մասին է, որ դատարանը, որպես հիմանվորում, նշեց այն, որ Պերմյակովն արդեն ՌԴ կայազորային դատարանի կողմից դատապարտվել է ազատազրկման և իր պատիժը կրում է կայազորային կալանատանը, ուստի՝ հնարավոր է արտագնա նիստ անցկացնել՝ արադարադատության շահերից և արդար դատաքննության իրավունքից ելնելով: