Փաստ ինֆո

Մատուցողուհու սպանության աղմկահարույց գործով այսօր դատարանում զննվեցին տուժողի տնից  հայտնաբերված իրերը, որոնք ճանաչվել են որպես իրեղեն ապացույցներ՝  տուժողի հագուստն ու կոշիկները, ինչպես նաև հանցագործության գործիք ճանաչված դանակը:

Ամբաստանյալի պաշտպան, փաստաբան Կրոմվել Գրիգորյանը հայտարարեց, որ հայտնաբերված իրերը առգրավվել են  օրենքի խախտմամբ, մասնավորապես,  դրանք  չեն կնքվել:

Դատարանում սկսվեց ամբաստանյալի կողմից շահագործվող երկու հեռախոսահամարների ելքային-մուտքային զանգերի վերծանումների փաստաթղթի հրապարակումը: Գործով մեղադրողը կարևորեց զանգերից երեքը և հրապարակեց դրանց վերաբերյալ տեղեկատվությունը: Իսկ ամբաստանյալի պաշտպանը կարևորեց վերծանումները ողջ   ծավալով, Ղ-Տելեկոմ ընկերությունից պահանջված վերծանումներն ընդգրկում են 2012թ. դեկտեմբերի  1-ից մինչև  2013թ. մայիսի 8-ն ընկած ժամանակահատվածը: Ըստ պաշտպանի, հեռախոսազանգերի այս վերծանումները հաստատում են իր պաշտպանյալի այլուրեքությունը, ավելին՝  հեռախոսազանգերի վերծանումներով հերքվում են Դ.Թամրազյանի՝ նախաքննության ընթացքում տված խոստովանական ցուցմունքում նշված հանգամանքները: Կ.Գրիգորյանը հայտարարեց, որ իր պաշտպանյալը ոչ միայն սպանության օրը, այլև առհասարակ  երբևէ չի եղել տուժողի  վարձակալած բնակարանում:

Վերծանումների հրապարակումը   չավարտեց՝ այն  կշարունակվի արդեն հաջորդ դատական նիստում:

Սպանության կատարման մեջ մեղադրվում է ամբաստանյալ Դավիթ Թամրազյանն, ով ըստ մեղադրանքի,  «անձնապես վիրավորված լինելով» իր հետ նախկինում հարաբերությունների մեջ եղած, տվյալ պահին հարաբերությունները խզած տուժող կնոջից, վերջինիս դիտավորությամբ ապօրինաբար կյանքից զրկելու նպատակով, 2013 թվականի մայիսի 7-ին գնացել է վերջինիս վարձակալած բնակարան, «թե իբրև անակնկալ նվեր ունի տալու», տուժողին խնդրել է փակել աչքերը, և  իր մոտ եղած խոհանոցային դանակով կտրել է կնոջ  կոկորդը, ինչի հետևանքվ վերջինս տեղում մահացել է:

Բացի այդ, ըստ մեղադրանքի` ամբաստանյալը, հանցագործության հետքերը թաքցնելու նպատակով, հրկիզել է դեպքի վայր հանդիսացող բնակարանը` բնակարանի սեփականատիրոջը պատճառելով 680.437 ՀՀ դրամի գույքային վնաս»:

Նշենք, որ գործի նյութերն ընդհանուր առմամբ կազմում են հինգ հատոր, որից երեքը  նախաքննության, իսկ երկուսը դատաքննության նյութեր են:

Գործով դատաքննությունն անց է կացվում երկրորդ անգամ՝ գործը սկզբնապես մակագրվել էր դատավոր Վազգեն Ռշտունուն, սակայն նրա՝ այլ աշխատանքի անցնելու  պատճառով այն վերամակագրվել էր  դատավոր Դավիթ Բալայանին: Նրա նախագահությամբ 2013թ. դեկտեմբերից մինչև  2015թ. մարտը քննվելուց հետո նորից տեղի էր ունեցել դատարանի կազմի փոփոխություն՝  Դ.Բալայանի  այլ  աշխատանքի անցնելու կապակցությամբ,  և գործը մակագրվել էր նոր դատավորի՝ Երևանի Աջափնյակ և Դավթաշեն վարչական շրջանների դատարանի դատավոր Տաթևիկ  Գրիգորյանին: