Փաստ ինֆո

ՀՀ ՊՆ Վազգեն Սարգսյանի անվան ռազմական ինստիտուտի հրամանատարի տեղակալ Զարմիկ Մարկոսյանի կողմից որդու՝  Գնել Թևոսյանի համար արտոնյալ պայմաններ ստեղծելու գործը ևս ուղարկվել է Ավան և Նոր-Նորք վարչական շրջանների ընդհանուր իրավասության դատարան և մակագրվել դատավոր Դավիթ Հարությունյանին:

Այս գործը բացահայտվել է նույն ինստիտուտում շուրջ մեկ տարի առաջ կուրսանտ Հակազ Բարսեղյանի սպանության գործի շրջանակներում:

Պարզվում է, որ կուրսանտ Գնել Թևոսյանն առանձնապես աչքի չի ընկել լավ առաջադիմությամբ, սակայն գնդապետ հոր շնորհիվ գտնվել է արտոնյալ կարգավիճակում:

Ռազմական ինստիտուտում ցածր առաջադիմություն ունեցող կուրսանտներին առհասարակ ազատ արձակում չի թույլատրվել, իսկ Գնել Թևոսյանը թեև ցածր առաջադիմություն է ունեցել, սակայն գրեթե յուրաքանչյուր շաբաթ և կիրակի դուրս է եկել զորամասից, երբեմն էլ նաև աշխատանքային օրերին:

Ըստ մեղադրանքի՝ Զարմիկ Մարկոսյանը անձնական շահագրգռվածությունից ելնելով,  որդու՝ Գնել Թևոսյանի, ինստիտուտում սովորելու համար արտոնյալ պայմաններ ստեղծելու նպատակով, պատասխանատու լինելով անձնակազմի զինվորական կարգապահության համար, զբաղվել է որդու հովանավորչությամբ:

Չարաշահելով պաշտոնեական դիրքը՝ 2014թ. օգոստոս ամսից մինչև 2015թ հունվարի 28-ը ներառյալ հանձնարարել է ենթակա սպաներին, պարբերաբար, առանց համապատասխան փաստաթղթային ձևակերպման, Գ.Թևոսյանին մի քանի ժամ տևողությամբ ազատել ծառայողական պարտականությունները կատարելուց և թույլատրել բացակայել զորամասի տարածքից:

Գնդապետ հայրը ջանք ու եռանդ չի խնայել, որպեսզի որդին զինակից ընկերների նկատմամբ իրեն արտոնյալ համարի, այնինչ Զարմիկ Մարկոսյանի կողմից պաշտոնեական դիրքը չարաշահելու հետևանքով Թևոսյանը համածառայողների շրջանում ստացել է արհեստական առավելություն, ինչով մարտկոցի զինծառայողների շրջանում խաթարվել է բարոյահոգեբանական մթնոլորտը և ստեղծվել է անհավասարության զգացում:

Զարմիկ Մարկոսյանին մեղադրանք է առաջադրվել ՀՀ քրեական օրենսգրքի 375-րդ հոդվածի 1-ին մասով: