Փաստ ինֆո

Քրեական դատավարության նոր օրենսգիրքն ընդունվի, նոր Սահմանադրության Մարդու իրավունքների բաժինը արդյունավետ սկսի կիրառվել իշխանությունների կողմից, և երրորդ` որ ընդունվի խտրականության արգելքի մասին օրենք: 2016թ-ից այս սպասելիքներն ունի «Իրավունքի գերակայություն» իրավապաշտպան հասարակական կազմակերպության նախագահ Արտակ Զեյնալյանը:

Իսկ հիմնական ցանկությունը, որ իրավապաշտպանը հայտնեց մեզ հետ զրույցում, այն է, որ «իշխանությունները հարգեն օրենքի գերակայությունը»: «Հասարակ օրինակ` այս ամբողջ պատմությունը` կապված ճանապարհային խախտումների, տույժերի հետ չէր լինի, եթե օրենքի տառը, այսինքն` «Վարչարարության հիմունքների և վարչական վարույթի մասին» օրենքով սահմանված յուրաքանչյուր փուլը իշխանությունները, մասնավորապես` Ոստիկանությունը, ժամանակին հարգեին: Այդ դեպքում չէին լինի այդ միլիոնավոր տույժերը, կլինեին իրապես ավելի նվազ: Տույժերի մեծ մասն իրականացվում են առանց քաղաքացուն լսելու իրավունքն ապահովելու: Հիմա Սահմանադրության մեջ կա հոդված, որն ասում է, որ վարչական մարմինը, եթե որոշում է կայացնում, անպայման այդ որոշումը պիտի կայացնի պայմանով, որ քաղաքացուն լսելու իրավունքը հարգվի»,- ասաց Արտակ Զեյնալյանը:

Այժմ արդեն, Սահմանադրության պահանջը կատարելով, իշխանություններն, ըստ Արտակ Զեյնալյանի ստիպված են լինելու անցնել վարչարարության բոլոր փուլերով` մինչ որոշումը կայացնելը, բայց դրա համար, նրա խոսքով, ռեսուրսներ են անհրաժեշտ, ինչպիսիք իշխանությունը չունի: «Նշանակում է՝ տույժերի քանակը իշխանությունը պետք է էապես նվազեցնի, այլ ոչ թե շրջանցի օրենքը, որպեսզի ապահովի միլիոնից ավելի վարչական տույժ»,- ասաց իրավապաշտպանը: