Փաստ ինֆո

«Նոր Հայաստան» փրկության ճակատը թեև չի հայտարարել իր ակցիաներն Ազատության հրապարակում դադարեցնելու մասին, բայց դրանք Ամանորի տոնական օրերին մոռացության կմատնվեին, եթե չլինեին ոստիկանները: Որքան էլ տարօրինակ հնչի, հենց նրանք են ավելի շատ ուշադրության կենտրոնում պահում Ազատության հրապարակում կատարվող իրադարձությունները: Ավելին` հենց նրանք են այդ իրադարձությունների գլխավոր դերակատարն ու հեղինակը:

Այսպես, հենց Ամանորի գիշերը, երբ «Նոր Հայաստան»-ը բոլորին հրավիրել էր կեսգիշերից հետո Ազատության հրապարակում ազգովին Նոր Տարին նշելու, առաջինը այնտեղ էին գնացել ոստիկանները: Իսկ հրապարակում հավաքված մեկ-երկու տասնյակ մարդիկ էլ մի քանի րոպե հետո, թերևս, անաղմուկ կցրվեին, եթե ոստիկանները չձեռնարկեին «տոնածառ» գործողությունը` արգելելով ակտիվիստներին Ազատության հրապարակում տոնածառ տեղադրել, քանի որ Երևանի քաղաքապետարանն ի գիտություն չէր ընդունել տոնածառի տեղադրման մասին իրազեկումը:

Արդյունքում՝  «Նոր Հայաստան»-ի անդամների և ոստիկանների միջև տեղի ունեցած բախումներից հետո բերման են ենթարկվել Գևորգ Սաֆարյանն ու 4 այլ ակտիվիստներ` իշխանության ներկայացուցչի նկատմամբ բռնություն գործադրելու կասկածանքով։ Ավելի ուշ մյուսներն ազատ են արձակվել, իսկ Սաֆարյանը նախ ձերբակալվել է, ապա` կալանավորվել։

Իսկ արդեն հունվարի 3-ին Կենտրոն եւ Նորք Մարաշ դատարանի մոտից բերման են ենթարկվել ևս 5 ակտիվիստներ, ովքեր մասնակցել են  Գեւորգ Սաֆարյանի կալանավորման դեմ բողոքի ակցիային: Հետագայում 5-ն էլ ազատ են արձակվել, բայց տեղեկատվական աղմուկը դարձյալ փոքր չէր: Նույն օրն ազատ է արձակվել նաև Հիմնադիր խորհրդարանի անդամ Գրիգոր Եղնուկյանը, ով բերման էր ենթարկվել սպանության սպառնալիքի ու ուրիշի գույքը դիտավորությամբ ոչնչացնելու կասկածանքով:

Ի դեպ, այսօր լուրեր տարածվեցին նաև այն մասին, որ Գևորգ Սաֆարյանը հացադուլ է հայտարարել, իսկ ժամեր անց`  դադարեցրել: Ինչպես հայտնում է նրա փաստաբան Տիգրան Հայրապետյանը` իր պաշտպանյալը դադարեցրել է հացադուլը, քանի որ նրա  պահանջը կատարվել է: Գևորգ Սաֆարյանը պահանջում էր իրեն ընդհանուր խուց չտեղափոխել ` վախենալով իր նկատմամբ հնարավոր բռնությունից, և , քանի որ մնացել է առանձին խցում, դադարեցրել է հացադուլը:

Նշենք, որ Գևորգ Սաֆարյանի նկատմամբ Հատուկ քննչական ծառայությունում քրեական գործ է հարուցվել Քրեական օրենսգրքի 316-րդ հոդվածի հատկանիշներով, այն է` իշխանության ներկայացուցչի նկատմամբ բռնություն կիրառելը: Իսկ բռնության ենթարկվածն, ըստ իրավապահների, Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանն է:

«Նոր Հայաստան»-ի ակտիվիստներն Ազատության հրապարակում շարունակելու են  շուրջօրյա հերթապահությունը: Ոստիկաններն էլ, ըստ ամենայնի, կշարունակեն իրենցը: