Փաստ ինֆո

Այս տարի, հոկտեմբերի 7-ի երեկոյան, Վայք քաղաքում հետաքրքիր հանցագործություն էր կատարվել. գրանցվել էր ավազակային հարձակում կնոջ մասնակցությամբ, ինչը բարեբախտաբար, վնասազերծվել էր օգնության հասած մյուս հարևանների կողմից: Ընդ որում,  պարզվում է, որ հարձակում գործածը եւս եղել է կին, դեպքը հետաքրքիր է նաև նրանով, որ հարձակում գործողն ունի սեփական վարսավիրանոց, իսկ հարձակման ենթարկվածը հաշմանդամ կին է, ով ապրում է ոսկու առևտրի միջնորդությունից գոյացած գումարներով:

Պարզվում է, որ պարձակում գործած կնոջ` Լիանայի, ամուսինը 2014 թվականին 10.000 ԱՄՆ դոլար վարկ է վերցրել անասնապահությամբ զբաղվելու համար: Մինչև 2015 թվականի սեպտեմբերի 3-ը, ամուսինները վարկային կազմակերպությանը վճարել են միայն  մայր գումարի տոկոսները` ամսական 100 ԱՄՆ դոլար, ինչը արել են առանց դժվարության, բայց սեպտեմբերի 3-ից հետո, երբ վճարելիք գումարին ավելացել է նաև մայր գումարը, հասնելով ամսական 485 ԱՄՆ դոլարի, ամուսինները սկսել են դժվարանալ, պարտքեր կուտակել և ի վերջո կանգնել են գրավադրված բնակարանը կորցնելու վտանգի առաջ:

Այդ ժամանակ կինը որոշել է վաճառել իր ոսկյա կախազարդը և այդ հարցով դիմել նույն թաղամասում բնակվող, ոսկու առևտրի միջնորդությամբ զբաղվող հարևանուհուն, ում անձամբ է ճանաչել:

 Կինը կշռել է կրծքազարդը, որը կազմել է  5 գրամ, սակայն հրաժարվել է գնել այն` պատճառաբանելով, որ  պարզ չէ զարդի մեջ ոսկու պարունակությունը: Հենց այդ այցի ժամանակ էլ Լիանան հարևանուհու սեղանին տեսել է մի քանի ոսկյա զարդեր:

Հաջորդ օրը, իր վարսավիրանոցից նկատելով հարևանուհուն, նրան հրավիրել է միասին սուրճ խմելու: Սուրճ խմելու ընթացքում Լիանան խոսել է ոսկուց, փողերից: Նախապես իմանալով, որ կինը միայնակ է, հաշմանդամ, թույլ, տարիքով մեծ, ունի ոսկեղեն,  որոշել է հարձակվել նրա վրա և, վախեցնելով,  հափշտակել նրա ոսկեղենը:

Սուրճից հետո յուրաքանչյուրը վերադարձել է իր գործին: Լիանան գնացել է տուն, կերակրել որդիներին ու բնակարանից վերցնելով իր սև գույնի զուգագուլպան, զոհի ձեռքերն ու ոտքերը կապելու համար` կպչուն ժապավենը և  նրան վախեցնելու ու դիմադրությունը կոտրելու համար` խոհանոցային մեծ դանակը, որդու ձմեռային կոշիկներն ու ձեռնոցները, գնացել ավտոտնակ: Այստեղից էլ վերցնելով հանգուցյալ սկեսրայրի զինվորական համազգեստի պիջակն ու ձեռնոցները` հագել դրանք ու գնացել հարևանուհու տուն:Միամիտ հարևանուհին, ոչ մի բան չկասկածելով, առանց դիտանցքից նայելու, բացել է դուռը:

Նա ներս է խուժել, փակել դուռը, ապա մի ձեռքով փակելով նրա բերանը, մյուս ձեռքում պահած դանակը, նրան սպանելու  սպառնալիքներ տալով` պահանջել է  հանձնել ոսկեղենը: Սարսափած զոհը սկսել է բզավել ու օգնության կանչել: Հարևանուհու ձայնը լսել են նրա հարևանուհիներն ու հարևան ՀՀ ՊՆ սպան: Վերջինն էլ օգնության է շտապել կնոջն ու հարձակվողի դեմքից ու գլխից հանելով զուգագուլպան, ոչ միայն վնասազերծել, այլև բացահայտել է նրա ով լինելը:

Կատարվածի մասին հարևաններն ահազանգվել են իրավապահներին։

Լիանային  մեղադրանք է առաջադրվել ՀՀ քրեական օրենսգրքի   175-րդ հոդվածի 2-րդ մասի 3-րդ  և 4-րդ կետերով նախատեսված արարքների համար, այն է ուրիշի գույքը հափշտակելու դիտավորությամբ  վերջինիս բնակարան ապօրինի մուտք   գործելու, դանակը որպես զենք օգտագործվող  առարկայի գործադրմամբ հարձակում գործելու,  կյանքի և առողջության համար վտանգավոր բռնություն գործադրելու  սպառնալիքով ոսկյա իրերը  հափշտակելու հանցավոր գործողություններ կատարելու  համար: