Փաստ ինֆո

Երևանի քաղաքապետարանին պատկանող «Կենտրոն Մաքրություն» փակ բաժնետիրական ընկերությունում 357 միլիոնից ավելի ՀՀ դրամի  հափշտակության գործով այսօրվա դատական նիստում վերջապես դատաքննությունը սկսվեց:

Մեղադրող Հակոբ Մելքոնյանը  հրապարակեց մեղադրական եզրակացության եզրափակիչ մասը միայն ամբաստանյալներ, եղբայրներ Արթուր և Սամվել Հովհաննիսյանների մասով:

Արթուր Հովհաննիսյանն, ըստ մեղադրանքի, 2007թ. ապրիլից մինչև 2013թ. սեպտեմբեր ամիսը զբաղեցնելով Երևանի քաղաքապետարանի «Կենտրոն մաքրություն» ՓԲԸ-ի տնօրենի, ինչպես նաև ինժեների պաշտոնները,  որպես տնօրեն պաշտոնեական դիրքն օգտագործելով, իր եղբոր` Սամվել Հովհաննիսյանի հետ նախնական համաձայնությամբ և համակատարմամբ, շահադիտական նպատակով նույն ընկերության աշխատակիցների օժանդակությամբ, խաբեությամբ առանձնապես խոշոր չափերի գումար հափշտակելու դիտավորությամբ կեղծել է ընկերության պահեստից ապրանքանյութական արժեքների դուրս գրման վերաբերյալ պաշտոնեական փաստաթղթեր, ու այդ եղանակով Երևան քաղաքի Կենտրոն համայնքի, այնուհետ Երևանի քաղաքապետարանի բյուջետային միջոցներից խաբեությամբ հափշտակել է առանձնապես խոշոր չափերով գումար:  Բացի այդ, 2009 թվականի հունվար ամսին նախնական համաձայնության գալով նույն ընկերության փոխտնօրեն Արմեն Խաչատրյանի, գլխավոր հաշվապահ Գագիկ Հարությունյանի, աշխղեկներ Սանվել Եղոյանի և Գյուլիզար Շամոյանի հետ, միավորվել են խմբով հափշտակություն կատարելու համար, որից հետո 2009-2013 թվականներին Երևանի քաղաքապետարանի բյուջետային միջոցներից հափշտակել է որպես աշխատավարձ և դրան հավասարեցված այլ միջոցներ հաշվարկված ընդհանուրը առանձնապես խոշոր չափերի` 251 197 450 ՀՀ դրամ:

Ըստ մեղադրական եզրակացության, 357 մլն դրամի հափշտակությունից  շուրջ հիշյալ 250 մլն դրամը հափշտակվել է փաստացի ընկերությունում չաշխատող 130 անձանց՝ կեղծ հավաքարարների,  անուններով աշխատավարձ և դրան հավասարեցված այլ գումարներ  բանկային քարտերին  փոխանցելու ու կանխիկացնելու միջոցով: Գումարի մնացած մասն, ըստ մեղադրական եզրակացության, հափշտակվել է իբրև թե  բենզին ու դիզվառելիք ձեռք բերելու համար կեղծ տվյալներ ներկայացնելու միջոցով:

Այսպիսով, Արթուր Հովհաննիսյանին մեղադրանք է առաջադրվել  ՀՀ քրեական օրենսգրքի 178-րդ հոդվածի 3-րդ մասի 1-ին և  2-րդ կետերով, այն է՝ կազմակերպված խմբի կողմից առանձնապես խոշոր չափերով կատարված խարդախություն, 314-րդ հոդվածով՝  պաշտոնեական կեղծիք,  308-րդ հոդվածի 2-րդ մասով՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ, իսկ նրա եղբորը՝  Սամվել Հովհաննիսյանին մեղադրանք է առաջադրվել  ՀՀ քրեական օրենսգրքի  178-րդ հոդվածի 3-րդ մասի 1-ին և  2-րդ կետերով և 314-րդ հոդվածով:

Մնացած 11 ամբաստանյալների մասով մեղադրական եզրակացությունը կհրապարակվի հաջորդ տարի՝ հունվարի  11-ին տեղի ունենալիք դատական նիստում:

Իսկ այսօրվա դատական նիստում դատարանը ճանաչեց գործում նոր ներգրավված երկու պաշտպանների՝ Դիանա Շախրամանյանի և Դավիթ Մնացականյանի լիազորությունները՝ առաջինը կպաշտպանի Հրայր Հակոբյանի, իսկ երկրորդը՝   գործով  երեք ամբաստանյալների՝ Տիգրան Հովհաննիսյանի, Սամվել Եղոյանի և Ռոբերտ Խաչատրյանի, շահերը:

Դատական նիստին սեփական նախաձեռնությամբ  ներկայացել էր նաև «Կենտրոն Մաքրություն» ընկերության սնանկության գծով կառավարիչն, ով ցանկություն ուներ գործում ներգրավել որպես տուժողի ներկայացուցիչ: Ամբաստանյալներ Արթուր և Սամվել Հովհաննիսյանների պաշտպան Գեղամ Հակոբյանը նկատեց, որ գործով տուժող է ճանաչվել Երևան համայնքը, այսինքն՝  Երևանի քաղաքապետարանը և վերջինս արդեն ներկայացուցիչ ունի:

Դատարանը մերժեց սնանկության գծով կառավարչին գործում որպես տուժողի ներկայացուցիչ ներգրավվելու միջնորդությունը՝ անհիմն ու գործի նյութերից չբխելու հիմքով: Դատարանն ընդգծեց, որ եթե կառավարիչը հետագայում իր միջնորդության իրավական հիմքեր ներկայացնի, դատարանն այն քննության կառնի:

Դատարանը մերժեց նաև Արթուր Հովհաննիսյանի պաշտպան Գեղամ Հակոբյանի միջնորդությունը իր պաշտպանյալի նկատմամբ ընտրված կալանավորումը փոփոխելու կամ վերացնելու, ինչպես նաև որպես այլընտրանքային խափանման միջոց գրավ կիրառելու մասին:

Պաշտպանն ընդգծեց, որ ի տարբերություն մյուս բոլոր ամբաստանյալների, գրեթե նույնական մեղադրանքով միայն իր պաշտպանյալի նկատմամբ է կալանավորում ընտրվել,  և այս փուլում նրան անազատության մեջ պահելու որևէ հիմք չկա: Մեղադրողը, սակայն, առարկեց միջնորդության դեմ՝ ընդգծելով, որ կալանավորման հիմքերը պահպանվում են. ամբաստանյալը եղել է վկաների վերադասը, կարող է խոչընդոտել և  ապօրինի ներգործություն ունենալ վկաների ու մեղադրյալների վրա:

Դատարանը քննության առավ նաև քաղաքացի Ալեքսանդր Խաչատրյանի միջնորդությունը՝ վերջինս խնդրում էր ամբաստանյալ Արթուր Հովհաննիսյանից գնված և ներկայումս իրեն պատկանող  «Մերսեդես Բենց»  մեքենայի վրա դրված կալանքը հանել կամ մեքենան իրեն ի պահ հանձնել: Նշվեց, որ քննիչի որոշմամբ մեքենայի վրա կալանք է դրվել առուվաճառքի գործարքից վեց ամիս անց:

Մեղադրողը նշեց, որ միջնորդությանը վերջնական լուծում տալու համար նախ պետք է հաստատվի, թե քաղաքացին  բարեխիղճ ձեռքբերո՞ղ է, թե՞ ոչ:

Դատարանը մասնակի բավարարեց միջնորդությունը՝  որոշվեց ավտոմեքենան հանձնել գույքի ներկայիս սեփականատիրոջ  պատասխանատու պահպանությանը: Քաղաքացին նախազգուշացվեց, որ պարտավոր է չօտարել, չվնասել ու չփչացնել գույքը՝ մինչև գործով հարցի վերջնական լուծումը:

Ամբաստանյալներ  Միսակ Հարությունյանի և Սամվել Պապոյանի պաշտպան Մերի Ալավերդյանը  միջնորդեց լուծել նրանց աշխատավարձի և վերջնահաշվարկի  կալանքի հարցը:  Պաշտպանն ընդգծեց, որ իր պաշտպանյալներին առաջադրված՝  պաշտոնեական կեղծիքին օժանդակելու մեղադրանքը գույքի բռնագրավում չի նախատեսում:

Քննարկումից պարզ չդարձավ, թե ամբաստանյալների հաշվեհամարներին փոխանցում չի՞ արվել , թե՞ փոխանցումներ չեն արվում, որովհետև հաշիվների վրա կալանք է դրված:

Դատարանը որոշեց հետաձգել միջնորդության լուծումը՝ մինչև էական հանգամանքների պարզումը, մասնավորապես, հաշիվների վրա կալանք է դրվել քննիչի որոշմա՞մբ, թե գումարները պարզապես չեն փոխանցվում: