Փաստ ինֆո

Երևանի Արաբկիր և Քանաքեռ-Զեյթուն վարչական շրջանների դատարանում է գտնվում տղամարդու առևանգման, ավազակության և այլ հանցավոր արարքների վերաբերյալ գործը՝ յոթ ամբաստանյալներով:   

Այսպես,   Էրնեստ Գյուլնազարյանին առաջադրված մեղադրանքի համաձայն,  նա Արտավազդ Բալդրյանի և նախաքննությամբ չպարզված երեք այլ անձանց հետ նախնական համաձայնության է եկել իր նախկին կնոջ հետ փաստացի ամուսնական հարաբերությունների մեջ գտնվող տղամարդուն  առևանգելու շուրջ: Դրանից հետո   Արտավազդ Բալդրյանի վարած ավտոմեքենայով 04.01.2015թ. ժամը 18:00-ի սահմաններում նրանք գնացել են Երևան քաղաքի Րաֆֆու փողոց, երեխաներին տեսակցելու հարցի շուրջ նախկին կնոջ փաստացի ամուսնու հետ զրուցելու պատրվակով վերջինիս հրավիրել է շենքի բակ, որտեղ նրա կամքին հակառակ, բռնություն կիրառելով նստեցրել են ավտոմեքենան, բացահայտ առևանգելով տեղափոխել Երևանի Շենգավիթ վարչական շրջանում գտնվող ավտոտնակներից մեկը և շուրջ 40 րոպե ավտոտնակում պահելու ընթացքում ծեծի են ենթարկել վերջինիս` պատճառելով առողջությանը թեթև վնաս` կարճատև քայքայումով:

Ըստ Արտակ Գինոսյանին առաջադրված  մեղադրանքի,  նա ուրիշի գույքն ավազակային հարձակմամբ հափշտակելու շուրջ նախնական համաձայնության է եկել Մկրտիչ Արշակյանի և Արտավազդ Բալդրյանի հետ, իսկ տրանսպորտային միջոցով իրենց հանցանքի կատարման վայր փոխադրելու և վերադարձնելու միջոցով օժանդակելու շուրջ համաձայնության է եկել Մանվել Պողոսյանի հետ:

Վերջինս, ըստ  մեղադրանքի,  Արտակ Գինոսյանի առաջարկով նախապես խոստացել է տրանսպորտային միջոց տրամադրելով օժանդակել վերջինիս, Մկրտիչ Արշակյանին և Արտավազդ Բալդրյանին ավազակային հարձակում կատարելու համար:

Արարատ Շահվերդյանն, ըստ մեղադրական եզրակացության, 28.01.2015թ. Մկրտիչ Արշակյանի և Գագիկ Թորոսյանի պահանջով իր «Օպել Աստրա» մակնիշի ավտոմեքենայով մեկնելով Արմավիր քաղաք, Արտակ Գինոսյանից ստացել և Երևան է փոխադրել հրազեն հանդիսացող, Ա.Գինոսյանի, Մ.Արշակյանի և Ա.Բալդրյանի կողմից 27.01.2015թ. կատարված ավազակային հարձակման ընթացքում գործադրված «Կալաշնիկով» մոդելի ինքնաձիգը և հանձնել Գագիկ Թորոսյանին:

Իսկ Գագիկ Թորոսյանն էլ, ըստ  մեղադրանքի,  28.01.2015թ. ժամը 22:00-ի սահմաններում, Երևան քաղաքի բնակիչ Արարատ Շահվերդյանից ստացել և իր տան դիմաց գործող բենզալցակայանի հետնամասում պահել է հրազեն հանդիսացող, Ա.Գինոսյանի, Մ.Արշակյանի և Ա.Բալդրյանի կողմից 27.01.2015թ. կատարված ավազակային հարձակման ընթացքում գործադրված «Կալաշնիկով» մոդելի ինքնաձիգը և հանձնել Գագիկ Թորոսյանին:

40-ամյա Էրնեստ Գյուլնազարյանին մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ մարդուն առևանգելը,  30-ամյա Արտավազդ Բալդրյանին՝ ՀՀ քրեական օրենսգրքի 131-րդ հոդվածի 2-րդ մասի 1-ին կետով, 175-րդ հոդվածի 2-րդ մասի 1-ին, 3-րդ և 4-րդ կետերով՝ մի խումբ անձանց կողմից նախնական համաձայնությամբ, բնակարան, պահեստարան կամ շինություն ապօրինի մուտք գործելով, զենքի կամ որպես զենք օգտագործվող այլ առարկաների գործադրմամբ  ավազակություն, 235-րդ հոդվածի 1-ին մասով՝  ապօրինի կերպով զենք ձեռք բերելը, պահելը, փոխադրելը կամ կրելը:

37-ամյա Արտակ Գինոսյանին մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 1-ին, 3-րդ և 4-րդ կետերով, 235-րդ հոդվածի 1-ին մասով, 268-րդ հոդվածի  2-րդ մասի 2-րդ կետով՝ առանց իրացնելու նպատակի խոշոր չափերով թմրամիջոցների ապօրինի շրջանառություն, 36-ամյա Մկրտիչ Արշակյանին՝  ՀՀ քրեական օրենսգրքի  175-րդ հոդվածի  2-րդ մասի 1-ին, 3-րդ և 4-րդ կետերով, 235-րդ հոդվածի 1-ին մասով, 44-ամյա Մանվել Պողոսյանին՝  38-րդ հոդվածի 5-րդ մասով՝ տրանսպորտային միջոց տրամադրելով հանցագործությանը օժանդակելը, 175-րդ    հոդվածի 2-րդ մասի 1-ին, 3-րդ և 4-րդ կետերով, 41-ամյա Արարատ Շահվերդյանին՝ 235-րդ հոդվածի 1-ին մասով, 30-ամյա Գագիկ Թորոսյանին՝ 235-րդ հոդվածի 1-ին մասով:

Գործով այսօրվա առաջին դատական նիստը տեղի չունեցավ ամբաստանյալներից երկուսի պաշտպանությունն իրականացնող փաստաբանի՝ այլ գործով զբաղվածության պատճառով: