Փաստ ինֆո

Փաստաբան Հայկ Ալումյանն այսօր բողոք է հղել ՀՀ Մարդու իրավունքների պաշտպան  Կարեն  Անդրեասյանին՝ խնդրելով հրատապ միջամտել իր բողոքը քննարկման ընդունելու, բողոքում մատնանշված փաստերը ստուգելու, իր պաշտպանյալ Արմեն Համազասպյանի իրավունքի խախտումը ճանաչելու և խախտված իրավունքը վերականգնելու առումով:

Հ.Ալումյանի պաշտպանյալը` ՀՀ ԱՆ «Նուբարաշեն» քրեակատարողական հիմնարկի կալանավոր Արմեն Համազասպյանը նախկինում,  դեռ մինչև իր կալանավորումը,  տառապել է բաց տեսակի տուբերկուլյոզ հիվանդությամբ: Ազատության մեջ գտնվելիս ստացած բուժումների արդյունքում նա ապաքինվել էր:

Ըստ պաշտպանի, ավելի քան մեկ և կես տարի  կալանքի տակ պահվելու անբարենպաստ պայմանների հետևանքով, մասնավորապես, անմարդկային խցային պայմանների, ցրտի, խոնավության հետևանքով վերջին ժամանակաշրջանում նրա առողջական վիճակը կտրուկ վատացել է:

Արդեն շուրջ տաս օր է, ինչ Արմեն Համազասպյանը ունի ցավեր թոքերի շրջանում, դժվարությամբ է խոսում, ձայնը խզված է, ունի թուլություն և հևոցներ, հազ: «Այդ ախտանիշները լուրջ հիմքեր են տալիս մտահոգվելու, որ նրա մոտ կրկնվում է տուբերկուլյոզը: Դա էլ ավելի մտահոգիչ է, նկատի ունենալով, որ Արմեն Համազասպյանը պահվում է մի խցում, որտեղ, բացի իրենից, գտնվում է ևս 14 կալանավոր»,- նշում է Հայկ Ալումյանը՝ փաստելով, որ չնայած դրան  Արմեն Համազասպյանի հիվանդությունը մինչև օրս չի ախտորոշվել, նա չի ստանում բուժում, չի ստանում որևէ դեղամիջոց,  չի մեկուսացվել  առողջ խցակիցներից և   չի տեղափոխվել  հիվանդանոց:

Պաշտպանը գտնում է, որ նման վերաբերմունքը ուղղակիորեն հակասում է «Մարդու իրավունքների և հիմնարար ազատությունների պաշտպանության մասին» եվրոպական կոնվենցիայի 3-րդ հոդվածին՝ Խոշտանգումների արգելում:

Լուսանկարը՝ PanARMENIAN Photo-ի