Փաստ ինֆո

«Ղ-Տելեկոմ» ՓԲԸ-ում առանձնապես խոշոր չափերի՝  755 մլն դրամի, յուրացման վերաբերյալ գործի այսօրվա դատական նիստում դատարանը որոշեց գործով դատաքննության փուլն անցկացնել դռնփակ: Դատարանը միաժամանակ ընդգծեց, որ գործի նախապատրաստական, դատական վիճաբանությունների փուլերը (եթե վերջինիս դատարանը հասնի), ինչպես նաև դատավճռի հրապարակումը կլինեն հրապարակային, այսինքն՝ դռնբաց դատական նիստում:

Դատարանն այսպիսով բավարարեց տուժող, այն է՝ «Ղ-Տելեկոմ» ՓԲԸ-ի ներկայացուցչի միջնորդությունը՝ ներկայացուցիչը միջնորդել  էր  դռնփակ անցկացնել դատաքննության ողջ փուլը,  հակառակ դեպքում կհրապարակվեն հրապարակման համար ոչ ենթակա առևտրային  գաղտնիքներ:  Ներկայացուցիչը դատարանին  ներկայացրեց ընկերության աշխատակիցներից մեկի աշխատանքային պայմանագիրը, որում վերջինս պարտավորվում է չհրապարակել առևտրային գաղտնիքներ պարունակող տեղեկությունները: Տուժողի ներկայացուցիչը նշեց, որ  նույնպիսի պարտավորություն ստանձնել են  ընկերության բոլոր աշխատակիցները:

Յուրացման մեջ մեղադրվող, «Ղ-Տելեկոմ» ՓԲ Սյունիքի մարզում՝ Կապանում,  պատասխանատուի՝ Աշոտ Կույումջյանի պաշտպան Կարեն Մեժլումյանը անհիմն համարեց միջնորդությունը, քանի որ, ըստ նրա, տուժողի ներկայացուցիչը չբերեց ամբողջ դատաքննության փուլը դռնփակ անցկացնելու հիմնավորումներ:  Ըստ Կ.Մեժլումյանի, դատարանը կարող է դռնփակ քննելու հարցը որոշել կոնկրետ այս կամ այն նյութում առևտրային գաղտնիքի առկայության վերաբերյալ այս կամ այն միջնորդությունը քննելով:

Ըստ պաշտպանի,  դռնփակ դատական նիստում քննությունը կհանգեցնի  իր պաշտպանյալի՝  Սահմանադրությամբ, Մարդու իրավունքների եվրոպական կոնվենցիայով, ինչպես նաև Քրեական դատավարության օրենսգրքով  երաշխավորված հրապարակային դատաքննության  և հետևաբար՝ արդար դատաքննության իրավունքների  խախտմանը:

Պաշտպանը նշեց, որ թեև 80 հազար էջ կազմող 400 հատորանոց գործին պաշտպանական կողմին ծանոթանալու համար տրամադրվել էր շատ քիչ՝   ընդամենը  15-օրյա ժամկետ, սակայն ինքը գործի նյութերին ծանոթանալիս որևէ  առևտրային գաղտնիքի չի հանդիպել: Դռնփակ քննությունը իրեն զրկելու է իր պաշտպանյալի անմեղությունը ապացուցելու հնարավորությունից, թեև մեղադրո՛ղ կողմը պետք է ապացուցի, որ ամբաստանյալը մեղավոր է:

Պաշտպանն ընդգծեց, որ տուժող կողմը Հայաստանի ամենահզոր կազմակերպություններից մեկն է, և դատարանի վրա հնարավոր ճնշումների մտավախություն հայտնեց, ինչպիսիք եղել են  նախաքննության ընթացքում,  արդյունքում կատարվել է միակողմանի քննություն:  

Գործով մյուս ամբաստանյալի՝  յուրացմանը օժանդակելու մեջ մեղադրվող Սարգիս Արշակյանի պաշտպան Սամվել Միրզոյանը տարակուսանք հայտնեց՝ այդ ի՞նչ առևտրային գաղտնիք պետք է հայտնվի իր պաշտպանյալի մասով՝ նրա մեղադրանքը կապված է Աշոտ Կույումջյանին մեղսագրվող գործողությունների հետ: Պաշտպանը հայտարարեց, որ ինքը ձեռնպահ է մնում  և միջնորդության լուծումը թողնում դատարանի հայեցողությանը: 

Ամբաստանյալ Աշոտ Կույումջյանը նշեց, որ այսօր ինքը միայն արդարադատությանն է հավատում: 

«Եթե գաղտնիք է,  գաղտնի էլ թող մնա, ես էլ գնամ մեր տուն՝ մեր գործերով»,- ասաց նա:

Դատարանը հայտարարեց, որ որևէ մեկը ՀՀ-ում՝ ներառյալ ամենահզոր կազմակերպություններից մեկը, չի կարող դատարանի վրա ճնշում գործադրել:  Ընդամենը դատարանը փորձում է հրապարակային կամ ոչ հրապարակային քննություն անցկացնելու վերաբերյալ հիմնավորված որոշում կայացնել:

Դատարանն ընդգծեց, որ պետք չէ հրապարակայնությունը կապել արդարադատության հետ՝  անկախ նրանից լրատվության ու հանրության ներկայացուցիչներ կլինեն դատարանի դահլիճում, թե ոչ, դատարանն արդարադատություն իրականացնելու է և  իրականացնելու է իրավունքի շահերից:

Դատարանն արձանագրեց նաև, որ վկաների ճնշող մեծամասնության ցուցմունքներում խոսվում է  առևտրային այս կամ այն գաղտնիք պարունակող  տեղեկության մասին: Դրանցում առկա են  մրցակցությանն առնչվող տարրեր, իսկ մրցակցությունը Հայաստանի Հանրապետությունում պետք է պաշտպանվի:

Դատաքննությունը դռնփակ անցկացնելու դատարանի որոշումից հետո ամբաստանյալ Ա.Կույումջյանի պաշտպան Կարեն Մեժլումյանը ժամանակ խնդրեց դատարանին ինքնաբացարկի միջնորդություն ներկայացնելու համար՝  այն կներկայացվի արդեն հաջորդ տարի:

«Փաստինֆո»-ի լրագրողի հետ զրույցում Կարեն Մեժլումյանը նշեց, որ դատարանի որոշումը միանշանակ խախտում է իր պաշտպանյալի՝ Աշոտ Կույումջյանի,  սահմանադրական, կոնվենցիոն իրավունքը, որը վերաբերվում է արդար դատաքննությանը, որը   պետք է հրապարակային իրականացվի:   «Չի կարող այս գործը, երբ որ անմեղ մեկին, երկուսին՝  իրականում, երկուսն էլ որևէ կապ չունեն, բերում են, ցույց են տալիս, որ շրջանից, ասենք, Կապանից ինչ-որ մեկը կարող է «Վիվասել»-ի պես ընկերությունից, որը բազմաթիվ ծրագրեր ունի՝ վերահսկող և այլն, 750 մլն դրամ յուրացնել,  ու ոչ ոք չնկատի: Փորձում են դռնփակ իրականացնել, որ ամեն ինչը ջրի երես դուրս չգա, սա է ընդամենը նպատակը: Հետևաբար, նման ձևով այս գործի քննությունից, որ արդեն երևում է ինչի համար են անում, արդարադատություն էլ չենք սպասում: Հետևաբար պետք է այդ ինքնաբացարկը պնդենք»,- ասաց Կարեն Մեժլումյանը: