Փաստ ինֆո

Ռուսաստանի Պետական դումայի «Սպրավեդլիվայա Ռոսիա» («Արդար Ռուսաստան») խմբակցության մի խումբ պատգամավորներ քննարկման են ներկայացրել օրինագիծ, որով քրեական պատասխանատություն է սահմանվում Թուրքիայում 1915-1922 թ.թ-ին հույների, ասորիների և եզդիների ցեղասպանության փաստերը հրապարակայնորեն ժխտելու համար: Այս մասին հայտնում է «Ինտերֆաքս»-ը:

Օրինագծով առաջարկվում է մինչև 300 հազար ռուբլի տուգանք սահմանել, կամ մինչև 3 տարի հարկադիր աշխատանք, կամ 3 տարի ազատազրկում:

Եթե դա կատարվել է պաշտոնական դիրքի կամ ԶԼՄ-ների օգտագործմամբ, ապա տուգանքն առաջարկվում է սահմանել 100 հազար ռուբլուց մինչև 500 հազար, իսկ ազատազրկումը մինչև 5 տարի:

Օրինագծի հեղինակներից մեկը՝  «Սպրավեդլիվայա Ռոսիա» խմբակցության ղեկավար Սերգեյ Միրոնովը նշել է, որ ներկայումս Պետդումայում քննարկվում է Թուրքիայում 1915-1922թ.թ-ին Հայոց ցեղասպանության ժխտման համար պատիժ նախատեսող օրինագիծը:

«Մեր օրինագծի տրամաբանությունը պարզ և ակնառու է: 1915-1922թ.թ-ին Թուրքիայի իրականացրած ցեղասպանությունից տուժել են ոչ միայն հայերը, այլև՝ այլ ազգերի ներկայացուցիչներ. միլիոնավոր մարդիկ զոհվել են, մահացել սովից, զրկվել հայրենիքից: Եվ որպեսզի պատմական արդարությունը լիովին վերականգվի, անհրաժեշտ է ճանաչել թուրքական ռեժիմի հանցագործությունները»,-ասել է Միրոնովը: