Փաստ ինֆո

 

Բանդիտիզմի, սպանության, ավազակության, հափշտակությունների, այսպես կոչված՝  նոր բանդայի գործով դատական նիստում այսօր դատարանը որոշում կայացրեց գործից մաս անջատել:  

 

Այսուհետ համակարգչային տեխնիկայի օգտագործմամբ առանձնապես խոշոր չափերի հափշտակության վերաբերյալ մասը կքննվի առանձին: Անջատված մասի շրջանակում, մասնավորապես,  կքննվի ՀՀ քրեական օրենսգրքի 38-181-րդ հոդվածի 3-րդ մասի 1-ին կետով՝ համակարգչային տեխնիկայի օգտագործմամբ կատարված առանձնապես խոշոր չափերի հափշտակությանն օժանդակելը, 235-րդ հոդվածի 1-ին մասով՝ ապօրինի կերպով զենք ու ռազմամթերք ձեռք բերելը, պահելը, իրացնելը, մեղադրվող Մնացական Սարգսյանի, ՀՀ քրեական օրենսգրքի 214-րդ հոդվածի 2-րդ մասով՝ առևտրային կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ, 181-րդ հոդվածի 3-րդ մասի 1-ին կետով մեղադրվող Էդիտա Ալիխանյանի, 181-րդ հոդվածի 3-րդ մասի 1-ին կետով մեղադրվող Գոհար Գաբրիելյանի և 38-181-րդ հոդվածի 3-րդ մասի 1-ին  կետով մեղադրվող Վահե Ստեփանյանի  և Մառլեն Մուրադյանի վերաբերյալ մասը: 

 

Մայր գործի շրջանակում կշարունակվի բանդիտիզմի, ավազակությանն առնչվող մեղադրանքների մասով քննությունը: Այսինքն՝ մայր գործով կշարունակվի ՀՀ քրեական օրենսգրքի 222-րդ հոդվածի 1-ին մասով՝ բանդա ստեղծելը, 175-րդ հոդվածի 3-րդ մասի 3-րդ կետով՝ առողջությանը ծանր վնաս պատճառելով՝ ավազակություն, 235-րդ հոդվածի 1-ին մասով՝ ապօրինի կերպով զենք ձեռք բերելը, 175-րդ հոդվածի 3-րդ մասի 1-ին կետով՝ առանձնապես խոշոր չափերի գույք հափշտակելու նպատակով ավազակություն, մեղադրվող Ռաֆայել Հարոյանի, 222-րդ հոդվածի 2-րդ մասով՝ բանդայում մասնակցությունը, 175-րդ հոդվածի 3-րդ մասի 3-րդ կետով, 235-րդ հոդվածի 1-ին մասով, 175-րդ հոդվածի 3-րդ մասի 1-ին կետով մեղադրվող  Տիգրան Հովհաննիսյանի (ի դեպ, վերջինիս վերաբերյալ քննություն կկատարվի նաև անջատված մասով՝ Տ.Հովհաննիսյանը մեղադրվում է նաև ՀՀ քրեական օրենսգրքի 181-րդ հոդվածի 3-րդ մասի 1-ին կետով), ՀՀ քրեական օրենսգրքի 222-րդ հոդվածի 2-րդ մասով, 235-րդ հոդվածի 1-ին մասով, 175-րդ հոդվածի 3-րդ մասի 1-ին կետով մեղադրվող  Հայկ Կոջոյանի,  222-րդ հոդվածի 2-րդ մասով, 235-րդ հոդվածի 1-ին մասով, 175-րդ հոդվածի 3-րդ մասի 1-ին կետով, 104-րդ հոդվածի 2-րդ մասի 8-րդ կետով՝ ավազակությամբ կամ բանդիտիզմով սպանություն, մեղադրվող  Կարեն Վարդանյանի վերաբերյալ քննությունը:  

 

Դատարանն իր այս որոշումը հիմնավորեց գործի քննության ողջամիտ ժամկետը չխախտելու մտահոգությամբ:

 

Ամբաստանյալ Մնացական Սարգսյանի պաշտպան Լիանա Գրիգորյանը «Փաստինֆո»-ի լրագրողի հետ զրույցում 

դրական գնահատեց գործից մաս անջատելու դատարանի այս որոշումը: «Ավելի շուտ էինք ակնկալում, որովհետև ամբաստանյալների մեծ մասը, ում նույն այդ181-րդ հոդվածով մեղադրանք է առաջադրված, բավականին երկար ժամանակ այլ մեղադրանքների մասով աննպատակ գալիս-գնում էին, իրենք կապ չունեն ոչ բանդիտիզմի, ոչ ավազակության հետ »,- նշեց փաստաբանը:    

 

Դատարանի այս որոշման հետ համամիտ է նաև  Ռաֆայել Հարոյանի պաշտպան Լիպարիտ Սիմոնյանը՝ միացյալ գործի  պարագայում երկու գործերն էլ տուժում են:  

 

Դատարանը նաև որոշում կայացրեց ՀՀ գլխավոր դատախազին նամակ հղել ամբաստանյալ Գոհար Գաբրիելյանի դատարանում արած հայտարարությունը ստուգելու նպատակով: Ըստ ամբաստանյալի,  երբ իրեն տարել են ոստիկանություն, իրեն ու մորը, նաև իր երեխային  տասն օր պահել են ինչ-որ հատուկ հատկացված վայրում,  իր նկատմամբ ճնշումներ են գործադրվել՝  դրանով են պայմանավորված եղել, ըստ ամբաստանյալի, իր նախաքննական խոստովանական ցուցմունքները: