Փաստ ինֆո

Ազգային ժողովի «Բարգավաճ Հայաստան» խմբակցության անդամ Էլինար Վարդանյանը իր ֆեյսբուքյան էջում, անդրադառնալով Սահմանադրության փոփոխությունների դեկտեմբերի 6-ի հանրաքվեի արդյունքներն անվավեր ճանաչելու առաջարկով Սահմանադրական դատարան դիմելու «Հայ ազգային կոնգրես» խմբակցության նախաձեռնած ստորագրահավաքին, գրել է.

«Ընդունելով հանդերձ ՍԴ դիմելու ՀԱԿ նախաձեռնության հիմնավորումներն ու փաստարկները, հասարակական տրամադրություններն, այնուամենայնիվ ես ոչ մի հույս չունեմ, որ այս հարցով Սահմանադրական Դատարանը կկայացնի անկողմնակալ և լուծում պարունակող որոշում և սա համարում եմ ուժերի անիմաստ վատնում։ Այնպես, ինչպես միշտ է եղել։ 

Ես կառաջարկեի նախաձեռնության բոլոր հեղինակներներին միասին աշխատել նույն ընտրակեղծիքների մեխանիզմի դեմ պայքարի այլ ուղիներ փնտրելու ուղղությամբ։ Ես ինքս պատրաստ եմ հանդես գալ կոնկրետ առաջարկներով։

Բայց եթե վերջին պահին իմ ստորագրությունը այս գործընթացում որոշիչ է լինելու, այդ ժամանակ ես բնականաբար կմիանամ նախաձեռնությանը»։

Նշենք, որ ՍԴ դիմել կարող են դեկտեմբերի 18-ին՝ մինչև ժամը 18-ը՝ ԱԺ առնվազն 27 պատգամավորների ստորագրության առկայության դեպքում:

Առայժմ ստորագրել են 18 պատգամավորներ. «ՀԱԿ» խմբակցութան 7 անդամներից 6-ը՝ Լևոն Զուրաբյանը, Արամ Մանուկյանը, Գագիկ Ջհանգիրյանը, Ստեփան Դեմիրճյանը, Նիկոլ Փաշինյանը, Լյուդմիլա Սարգսյանը, «Օրինաց երկիր» խմբակցության բոլոր 5 անդամները՝ Հեղինե Բիշարյանը, Մհեր Շահգելդյանը, Հովհաննես Մարգարյանը, Իշխան Խաչատրյանը, Լևոն Դոխոլյանը, «Բարգավաճ Հայաստան» խմբակցությունից Տիգրան Ուրիխանյանը և Վարդան Օսկանյանը, «Ժառանգություն» խմբակցության 4 անդամներից 3-ը՝ Զարուհի Փոստանջյանը, Թևան Պողոսյանը, Ալեքսանդր Արզումանյանը, անկախ պատգամավորներ Խաչատուր Քոքոբելյանը և Էդմոն Մարուքյանը։