Փաստ ինֆո

Ամուսնու հարազատների շիրմաքարերն ու տապանաքարերը վնասելու համար 46-ամյա  Սուսաննան դատապարտվեց 400 000 ՀՀ դրամի չափով տուգանքի:

Դատավճռով Սուսաննայից հօգուտ տուժող Մանուշակ Պալոյանի կբռնագանձվի 700 000 ՀՀ դրամ՝ որպես հանցագործությամբ պատճառված վնասի փոխհատուցում:

Ինչպես ավելի վաղ տեղեկացրել էինք, ըստ մեղադրանքի` Սուսաննան 2015թ մարտի 15-ին՝ ժամը 21:40-ի սահմաններում, Շիրակի մարզի Փոքր Մանթաշ համայնքի գերեզմանոցում դիտավորությամբ վնասել է ամուսնու մահացած 3 հարազատների գերեզմանների վրա եղած շիրմաքարերը և տապանաքարերը` պատճառելով 700.000 ՀՀ դրամի նյութական վնաս:

Սուսաննային մեղադրանք էր առաջադրվել ՀՀ քրեական օրենսգրքի 265-րդ հոդվածի 1-ին մասով: Նրա նկատմամբ որպես խափանման միջոց է ընտրվել չհեռանալու մասին ստորագրությունը:

Առաջադրված մեղադրանքում ամբաստանյալն իրեն մեղավոր չի ճանաչել և տվել է հակասական ցուցմունքներ:

Որպես կասկածյալ հարցաքննվելու ընթացքում կինը հայտնել է, որ սկսել է կասկածել, որ Ռուսաստանի Դաշնությունում գտնվող ամուսինը կին և երեխա ունի, սակայն ամուսինը երդվել է եղբայրների և ծնողների շիրիմներով, ինչպես նաև իր երեխաներով, որ այլ ընտանիք չունի, ինքն էլ հավատացել է ամուսնուն: Սակայն կինը գնացել է ՌԴ և  այնտեղ տեղեկացել է, որ ամուսինը իրոք կին և երեխա ունի, առանց ամուսնուն տեսակցելու նա վերադարձել է  Հայաստան, որից օրեր անց երեխաների հետ համացանցում տեսել է ամուսնու, վերջինիս սիրուհու և նրանց երեխայի լուսանկարը:

Կինը իրեն նվաստացած է զգացել և այդ պատճառով հոգեկան ծանր ապրումեր է ունեցել: Զանգահարել է ամուսնուն և պահանջել, որ համացանցից ջնջի լուսանկարը, սակայն ամուսինը հայհոյել է իրեն, հայտնել, որ թքած ունի իր վրա:

Այս հեռախոսազրույցից հետո կինը կորցրել է ինքնատիրապետումը, իրեն լքված է զգացել և նույն օրը ժամը 18-ի սահմաններում տանից միայնակ դուրս գալով քայլել է փողոցներով, հիշել է, թե ինչպես ամուսինը երդվել է հարազատների շիրիմներով, որ իբր այլ ընտանիք չունի և որոշել է ամուսնուն ցավ պատճառել՝ վնասելով նրա հարազատների շիրիմները:

Նա նաև հայտնել է, որ զղջում և ափսոսում է կատարվածի համար:

Որպես մեղադրյալ հարցաքննության ընթացքում  կինը ընդհանրապես հերքել է, որ գերեզմանատուն է գնացել և անարգել ամուսնու հարազատների շիրմաքարերը:

Դատարանն ամբաստանյալի կողմից նման հակասական ցուցմունքներ տալը գնահատել է որպես օրենքով նախատեսված պատասխանատվությունից խուսափելու նպատակ:

Վերլուծելով ամբաստանյալի առաջադրված մեղադրանքը՝ դատարանը, համակցության մեջ գնահատելով դատաքննությամբ հետազոտված ապացույցները, գործի հանգամանքների բազմակողմանի, լրիվ և օբյեկտիվ հետազոտման վրա ձևավորված համոզմամբ հանգել է հետևության, որ սույն քրեական գործին վերաբերվող փոխկապակցված հավաստի ապացույցների բավարար ամբողջությամբ հաստատվել է, որ ամբաստանյալի կողմից ամուսնու  հարազատների շիրմաքարերը և տապանաքարերը վնասելը ապացուցված է: