Փաստ ինֆո

OԵԿ-ը դեմ է քվեարկելու 2016 թվականի պետական բյուջեի նախագծին: Այս մասին ԱԺ-ում հայտարարեց խմբակցության ղեկավար Հեղինե Բիշարյանը: Նա արձանագրեց, որ դրա համաձայն, ակնհայտ մեծացել է արտաքին պարտքը,  պակասել են տրանսֆերտները, և արդեն 2016 թվականի բյուջեի 7.2 տոկոսն ուղղվելու է արտաքին պարտքի մարմանը:

ԲՀԿ  խմբակցության պատգամավոր Միքայել Մելքումյանը հայտարարեց, որ ԲՀԿ-ն կողմ է քվեարկելու ` հավելելով, որ բյուջեի նախագծում ընդունվել է ԲՀԿ-ի ներկայացրած առաջարկների 70 տոկոսը: «ԲՀԿ-ն հավատարիմ է մնում իր ծրագրային դրույթներին և շանս է տալիս Կառավարությանը»,- ասաց նա` նշելով, որ  ԱԺ մեծամասնությունից բացի ևս մի քաղաքական ուժի «այո» է տալիս, որպեսզի եկող տարի կառավարությունն ունենա հուսալի հենարան:

ՀՅԴ խմբակցության քարտուղար Աղվան Վարդանյանը հայտարարեց, որ կողմ չեն քվեարկելու, բայց և չասաց, թե ոչ են ասելու բյուջեի նախագծին, ուղղակի համակերպվում են իրավիճակին: «Սա այն շեմն է, որից պետք է երկու ճանապարհ լինի` բոլորս ձգենք գոտիները, աշխատենք արդյունավետությամբ, որ տնտեսությունը զարգանա, աշխատատեղեր ստեղծվեն, մյուսն էլ ձև անենք, թե դա ենք անում, բայց իրականում իշխանությունը շարունակելու է մարտավորությամբ գնալ»,-ասաց  Աղվան Վարդանյանն` ընդգծելով, որ կառավարությանը պետք է ժամանակ տալ:

«Ժառանգության» անունից հանդես եկավ Զարուհի Փստանջյանն ու քննադատեց նախագիծը` հայտարարելով, որ խմբակցուոյւնը դեմ է քվեարկելու, ինչին ՀՀԿ ղեկավար Վահրամ Բաղդասարյանը արձագանքեց ԱԺ ղեկավարությանն առջարկելով հստակեցնել, թե քանի անդամ ունի այդ խմբակցուոյւնը և որքանով է Զարուհի Փոստանջյանը ներկայացնում նրանց տեսակետը:

Դե իսկ ՀՀԿ խմբակցության տեսակետով, ըստ  Վահրամ Բաղդասարյանի կառավարության ներկայացրած բյուջեն կայունացման բյուջ է և որ ՀՀԿ-ն կողմ է քվեարկելու:

ՀԱԿ-ի անունից ելույթ չեղավ: Խմբակցության 7 անդամներից 4-ը բոյկոտել են ԱԺ նիստերը: