Փաստ ինֆո

«Այն, ինչ տեղի ունեցավ այս օրերին՝ սահմանադրական փոփոխությունների շուրջ զարգացումները, հանրաքվեի արդյունքները, օրինաչափ էր»,- այսօր ԱԺ հայտարարությունների ժամին հայտարարեց ԱԺ ՀՀԿ խմբակցության պատգամավոր Կարեն Ավագյանը` հավելելով, որ օրինաչափ էր թե՜ հանրության տրամադրությունների, թե’ վերջին երկու տարիների ընթացքում տարված աշխատանքի առումով։

Կարեն Ավագյանը պրոֆեսիոնալ որակեց հանրաքվեի ընթացքում ոստիկանության աշխատանքը` նշելով, որ «նաև ոստիկանության ծառայողների շնորհիվ է, որ գործընթացներն ունեցան հարթ ընթացք ու հաջող ավարտ»: «Չնայած քիչ չէին լարված իրավիճակները, սադրանքները և մարդկանց հունից հանելու փորձերը»,- ասաց նա։

Իսկ ինչ վերաբերում է գրանցված օրինախախտումներին,Կարեն Ավագյանի խոսքով, դրանք իրավապահների ուշադրության կենտրոնում են, և «եթե եղել են խախտման դեպքեր, ապա դրանք կարժանանան օրենքով սահմանված գնահատականների»:

Անդրադառնալով նոր սահմանադրությանը, Կարեն Ավագյանը նշեց. «Մենք այլևս այլ քաղաքական մշակույթում ենք, որը ենթադրում է կայացած, գաղափարական քաղաքական ուժեր, ամուր ու զարգացած կուսակցական համակարգ։ Թե չէ Հայաստանը կուսակցությունների թվով համաշխարհային առաջատարն է»։