Փաստ ինֆո

Այսօր՝ դեկտեմբերի 8-ին, ժամը 9-ից ընտրատարածքային հանձնաժողովներում, ստացված դիմումների հիման վրա, սկսվել են տեղամասերում հանրաքվեի քվեարկության վերահաշվարկի աշխատանքները: Վերահաշվակը կտևի մինչև դեկտեմբերի 11-ի ժամը 14-ը:

Ինչպես արդեն տեղեկացրել ենք, ԿԸՀ մամուլի ծառայությունը հայտնել է, որ սահմանված ժամկետում հանրաքվեի ընտրատարածքային հանձնաժողովներն ստացել են թվով 78 տեղամասերում  քվեարկության արդյունքների վերահաշվարկի դիմումներ: Հանրաքվեի 3 ընտրատարածքային հանձնաժողովներ ստացել են դիմումներ` թվով 3 տեղամասերի քվեարկության արդյունքներն անվավեր ճանաչելու վերաբերյալ:

Նախնական տվյալներով` 1997 տեղամասային հանձնաժողովների գրանցամատյաններից մոտ հարյուրում են առկա քվեարկության ընթացքի մասին գրառումներ:

Ի պատասխան «Փաստինֆո»-ի թղթակցի հարցի՝ Կենտրոնական հանձնաժողովի նախագահի մամուլի քարտուղար Հերմինե Հարությունյանը պարզաբանեց, որ վերահաշվարկի պահանջով դիմել են Ազգային ժողովում խմբակցություն ունեցող բոլոր քաղաքական ուժերի ներկայացուցիչները, բացառությամբ «Օրինաց երկրի», այն է՝ ՀՀԿ-ն, «Բարգավաճ Հայաստան»-ը, ՀՅԴ-ն, «Հայ ազգային կոնգրես»-ը և «Ժառանգություն»-ը:

Վերահաշվարկի դիմումները վերաբերում են Երևանի թ.թ. 2, 3, 4, 5, 6, 7, 8, 9, ինչպես նաև Արագածոտնի թ.14 ու Կոտայքի թ.27 ընտրատարածքների թվով 78 տեղամասերին:

Քվեարկության արդյունքներն անվավեր ճանաչելու վերաբերյալ դիմումները վերաբերում են Երևանի Արաբկիր վարչական շրջանի թ. 4/20, Դավթաշենի թ. 5/1, Մալաթիա-Սեբաստիայի թ. 8/29 տեղամասերին:  

Ի դեպ՝ չի բացառվում, որ հանրաքվեի որոշ ընտրատարածքային հանձնաժողովներ արդյունքների վերահաշվարկ կատարեն նաև սեփական նախաձեռնությամբ:

Ընտրական օրենսգրքի համաձայն՝ վերահաշվարկի դիմումներ ներկայացնելու իրավունք ունի վստահված անձը, եթե ներկա է եղել ընտրական տեղամասում քվեարկության արդյունքների ամփոփմանը, ինչպես նաև տեղամասային ընտրական հանձնաժողովի անդամը` ընտրական տեղամասում քվեարկության արդյունքների վերաբերյալ արձանագրությունում քվեարկության արդյունքների ամփոփման կարգի վերաբերյալ հատուկ կարծիք ունենալու մասին գրառում կատարելու դեպքում: