Փաստ ինֆո

21:40 Երթի մասնակիցները, Երևանի կենտրոնական փողոցներով անցնելուց և կենտրոնական ընտրական հանձնաժողովի շենքին մոտենալու անհաջող փորձ կատարելուց հետո դարձյալ վերադարձան Ազատության հրապարակ, որտեղ նրանց ազգային երաժշտությամբ դիմավորեցին հրապարակում մնացածները:

21:06 ԿԸՀ շենքի մոտ կարճ կանգառից և կոչերից հետո երթի մասնակիցները հեռանում են «Միացե՛ք» վանկարկումներով: Երթը շարունակվում է Երևանի կենտրոնական փողոցներով:

21:00 ԿԸՀ շենքի մոտ է նաև Երևանի փոխոստիկանապետ Վալերի Օսիպյանը և բարձրաստիճան այլ ոստիկաններ: 

20:53 Երթի մասնակիցները հասան Կենտրոնական ընտրական հանձնաժողովի շենքի մոտ: Այն վերահսկվում է ոստիկանության բազմաթիվ աշխատակիցների կողմից: Երթի մասնակիցները վանկարկում են «Կասեցում», «Ոտքի՛, Հայաստան»:

20:25 Երթն ընթանում է «Ազատ, անկախ Հայաստան» պարբերական վանկարկումների ներքո: Բարձրախոսով դիմում են ժողովրդին՝ դուրս գալ փողոց և միանալ երթին:

20:15 «Ժառանգության» առաջնորդ Րաֆֆի Հովհաննիսյանն ազդարարեց երթի մեկնարկը:

20:07 «Ես վստահ եմ, որ երեկվա մեկնարկը հզոր է եղել, և  եթե մեր այսօրվա քանակը զիջում է երեկվա քանակին, դա չի նշանակում, որ մենք թուլացել ենք: Վստահ եմ, որ բոլորը հասկացել են, որ մենք ինչ ուզենք՝  կանենք»,-ասաց Ժիրայր Սեֆիլյանը՝ կոչ անելով երիտասարդությանը, ժողովրդին՝ միանալ իրենց: Ըստ նրա՝ օր առաջ իրենք պետք է այս հրապարակը լցնեն  և առաջիկա օրերին ամեն ինչ անեն, որ այդպես էլ լինի: «Հաղթանակաը մերն է»:

19:55 ԱԻՄ նախագահ Պարույր Հայրիկյանը հայտարարեց, որ այսօրվա մեր պահանջն է «Կասեցում»: Հանրահավաքի մասնակիցները վանկարկում են «Կասեցում»:

19:38 «Մեր երկրում ցանկացած ընդդիմադիր գործիչ գտնվում է հսկողության տակ. լսվում են մեր հեռախոսները», - հայտարարեց Անդրեաս Ղուկասյանը:

Ըստ նրա, սրանով պայմանավորված՝ իրենք նախօրոք չէին հայտնել, որ նախօրեին երթով գնալու են ՀՀԿ-ի գրասենյակի մոտ, և ցանկանում էին իշխանությանն անակնկալ մատուցել, ինչն ստացվեց: «Այսօր ունենալու են երթ՝ դեպի Կենտրոնական ընտրական հանձնաժողով»,-հայտնեց նա: