Փաստ ինֆո

ՀՀ ՊՆ Վազգեն Սարգսյանի անվան ռազմական ինստիտուտի պետի տեղակալ Զարմիկ Մարկոսյանի որդին, ամբաստանյալ Գնել Թևոսյանը չի ընդունում ինստիտուտի կուրսանտ Հայկազ Բարսեղյանի սպանության մեղադրանքը: Դատական նիստից հետո այդ մասին լրագրողներին ասաց Թևոսյանի պաշտպան Արա Զաքարյանը:

Ըստ նրա,  իր պաշտպանյալը հայտարարում է,  որ որևէ առնչություն չունի տվյալ դեպքի հետ. այդ գիշեր ինքը քնած է եղել, իսկ առավոտյան մյուս զինծառայողների հետ տեղեկացել է, որ տուժողը բացակայում է, ապա հայտնաբերվել է տուժողի դիակը՝ պտտաձողի վրա կախված վիճակում:

Ամբաստանյալի պաշտպանը նաև նշեց, որ դեպքի գիշերը կազմակերպված խնջույքին,  որը տեղի է ունեցել մի քանի զինծառայողների մասնակցությամբ,   իր պաշտպանյալը չի մասնակցել:

«Փաստինֆո»-ի թղթակցի հարցին ի պատասխան՝ պաշտպանը նշեց, որ վիճարկման ենթակա է   նախաքննության ընթացքում տոքսիկաքիմիական և դատանյութագիտական համալիր փորձաքննության եզրակացությունը, ըստ որի ամբաստանյալի արյան մեջ ալկոհոլ է հայտնաբերվել: Պաշտպանը նշեց նաև, որ գործով հաստատված է՝ իր պաշտպանյալը չի մասնակցել այդ խնջույքին:

Պաշտպանը  Հայկազ Բարսեղյանի ինքնասպանության հանգամանքը չի բացառում, ըստ նրա՝ գործով շատ հանգամանքներ չեն պարզվել: Եթե դրանք պարզվեին, այդ  դեպքում միայն հնարավոր կլիներ ասել ինքնասպանությո՞ւն է տեղի ունեցել, թե՞ ոչ:

Տուժողի դիակի դատաբժշկական փորձաքննության եզրակացությունն էլ պաշտպանի մոտ խիստ կասկած է հարուցում:  «Ոչ օբյեկտիվ լինելու վերաբերյալ բազմաթիվ փաստարկներ ենք ներկայացրել նախաքննական մարմնին,  որպեսզի նշանակվի կրկնակի դատաբժշկական փորձաքննություն, սակայն մերժվել է»,- նշեց Արա Զաքարյանը:

Հայկազ Բարսեղյանի և Գնել Թևոսյանի փոխհարաբերությունների վերաբերյալ պաշտպանը հայտնեց, որ ըստ  իր պաշտպանյալի, նրանք նորմալ հարաբերությունների մեջ են գտնվել:

«Գործով կան  հաստատված հանգամանքներ, որ Հայկազ Բարսեղյանը այլ զինծառայողների հետ պարբերաբար ընդհարումների մեջ է գտնվել»,- նշեց Արա Զաքարյանը և չբացառեց,  որ Հայկազի ստացած վնասվածքներն այդ ընթացքում առաջացած լինեն: Կա տեղեկություն նաև, ըստ նրա, որ հենց դեպքի օրն էլ  նա ընդհարվել է այլ զինծառայողների հետ:

Հայկազ Բարսեղյանի զարկերակը կտրելու վերաբերյալ էլ պաշտպանը հայտնեց, որ գործով հաստատվել է, որ նա ոչ մեծ քանակությամբ արյուն է կորցրել, որի պայմաններում ինքնուրույն տեղաշարժվելու որևէ խոչընդոտ չի եղել:

Գնել Թևոսյանի՝ պաշտոնյայի որդի լինելու և զորամասում արտոնյալ կարգավիճակ ունենալու մասին էլ պաշտպան Զաքարյանը հայտարարեց, որ այդպիսի բան գործով հաստատված չի և չէր էլ կարող լինել: Ըստ պաշտպանի՝ դա որոշ անձանց կողմից է դրվում շրջանառության մեջ Գ. Թևոսյանի նկատմամբ հասարակության մոտ բացասական կարծիք ամրագրելու համար: «Նա  օգտվել է այն նույն իրավունքներից և կրել է նույն պարտականությունները,  ինչ մյուս կուրսանտները»:

Ինչպես ավելի վաղ «Փաստինֆո»-ն տեղեկացրել էր՝ այս գործի  շրջանակներում նոր քրեական գործ է հարուցվել և մեղադրանք առաջադրվել Ռազմական ինստիտուտի հրամանատարի տեղակալ, գնդապետ Զարմիկ Մարկոսյանին, ով Գնել Թևոսյանի հայրն է:

Ըստ մեղադրանքի, Զարմիկ Մարկոսյանն՝   անցնելով պաշտոնեական լիազորությունների սահմանը, անձնական  այլ շահագրգռվածությունից ելնելով, դեռևս 2014թ. օգոստոսից մինչև 2015թ. հունվարի 28-ը պարբերաբար հանձնարարել է իր ենթակա համապատասխան սպաներին   առանց համապատասխան փաստաթղթային ձևակերպման որդուն՝ նույն զորամասի կուրսանտ Գնել Թևոսյանին մի քանի  ժամ տևողությամբ ազատել ծառայողական պարտականությունները կատարելուց և թույլատրել բացակայել զորամասի տարածքից:

 Այդ կերպ արտոնյալ պայմաններ ստեղծելով որդու համար, նա խաթարել է զինվորական կառավարման մարմինների և ծառայության իրականացման բնականոն ընթացքը:

 Տուժողին իրավահաջորդ ներկայացուցիչ Գարիկ Գալիկյանն իր հերթին  լրագրողների հետ զրույցում բացառեց ինքնասպանության վարկածը՝ նշելով, որ դատաբժշկական փորձաքննության եզրակացության համաձայն,  երբ Հայկազ Բարսեղյանը կախվել է՝ նա եղել  է մահացած: