Փաստ ինֆո

Արմավիրի մարզի ընդհանուր իրավասության դատարանը,  նախագահությամբ  Վահե Խալաթյանի, ճանաչել և հռչակել է քննիչ Սամվել Ավդոյանի անմեղությունն՝ առաջադրված մեղադրանքում:

Հատուկ քննչական ծառայությունը   Ս.Ավդոյանին մեղադրանք էր առաջադրել  ՀՀ ոստիկանության նախկին քննչական գլխավոր վարչության Արմավիրի մարզային քննչական բաժնի Վաղարշապատի քննչական բաժանմունքի ավագ քննիչի պաշտոնում կեղծիքներ կատարելու համար:

Այսպիսով, ըստ մեղադրանքի՝Սամվել Ավդոյանը  2014թ. սեպտեմբերի 21-ին ոստիկանության Վաղարշապատի բաժնի հերթապահ մասից տեղեկանալով բնակարանից գողություն կատարելու վերաբերյալ Թ. Գրիգորյանի ահազանգի մասին, օպերատիվ-քննչական խմբի կազմում մեկնել է հանցագործության դեպքի վայր և հանդիսանալով դեպքի վայրի զննության իրականացման ընթացքի, արդյունքների ճշգրիտ և ըստ էության արձանագրման համար պատասխանատու պաշտոնատար անձ, փորձագետի` դեպքի վայր ժամանելուն չսպասելու և ժամանակ չվատնելու նկատառումներով, ինչպես նաև առանց փորձագետի մասնակցության դեպքի վայրը զննելու համար նյութերի օրինականության նկատմամբ հսկողություն իրականացնող դատախազի, քննչական բաժնի ղեկավարության բացասական վերաբերմունքին չարժանանալու և կարգապահական պատասխանատվության չենթարկվելու անձնական դրդումներից ելնելով, դեպքի վայրի զննության արձանագրությունում մտցրել է ակնհայտ կեղծ տեղեկություններ:

Մասնավորապես,  նույն օրը ժամը 14:40-ից 15:30-նն ընկած ժամանակահատվածում նշված բնակարանում դեպքի վայրի զննություն կատարելու ընթացքում դեպքի վայրի զննության արձանագրությունում մտցրել է դեպքի վայր չժամանած և և զննությանն իրականում չմասնակցած ՀՀ ոստիկանության Արմավիրի մարզային վարչության փորձաքրեագիտական խմբի փորձագետ Արմեն Ղարիբյանի` որպես զննության մասնակցի, ինչպես նաև վերջինիս` որպես փորձագետի իրավունքներն ու պարտականություներն իր կողմից բացատրելու և պարտականությունները չկատարելու համար նախատեսված պատասխանատվության մասին նախազգուշացնելու վերաբերյալ իրականությանը չհամապատասխանող տեղեկություններ, այնուհետև նշված արձանագրությունը կցելով դեպքի առթիվ նախապատրաստվող նյութերին` այն դրել է շրջանառության մեջ:

Սամվել Ավդոյանին մեղադրանք է առաջադրվել ՀՀ քրեական օրենսգրքի 314-րդ հոդվածի 1-ին մասով, նրա նկատմամբ որպես խափանման միջոց էր ընտրվել չհեռանալու մասին ստորագրությունը:

Դատարանի գնահատմամբ՝ առաջադրված մեղադրանքն անհիմն է՝ հռչակելով քննիչի անմեղությունը։