Փաստ ինֆո

Լրագրողների հետ հանդիպուման ժամանակ ՀՖՖ-ի նախագահ Ռուբեն Հայրապետյանն անդրադարձավ նաև Հայաստանի ազգային և մյուս տարիքային հավաքականների մարզիչների հարցին: Այս մասին հայտնում է «Armsport.am»-ը:

«Շարունակում եմ այն կարծիքին մնալ, որ ազգային հավաքականը պետք հայ մասնագետի վստահվի:

Ի՞նչ եք հասկանում բարձրակարգ մարզիչ ասելով: Ես հասկանում եմ ՊՐՈ արտոնագիր ունեցող մասնագետ (ժպտում է), այնպես որ դիտարկում եմ արտոնագիր ունեցող բոլոր մարզիչներին, ինչպես նաև Վարուժան Սուքիասյանի ու Սամվել Պետրոսյանի թեկնածությունները, ովքեր ՊՐՈ դեռ չեն ստացել:

Այս իրավիճակում հայ ամենացածրակարգ մասնագետն էլ արտասահմանցի մարզչից լավ տարբերակ է: Այս ընթացքում շատերն էին անընդհատ շահարկում Սարգիս Հովսեփյանի անունը: Նա ժամանակավոր էր նշանակված և Ալբանիայի հետ խաղից հետո այլևս հավաքականի մարզիչը չէ:

Գոհ կլինեի Հովսեփյանի աշխատանքից, եթե նա հաղթեր հավաքականում իր խաղերի գոնե 50 տոկոսը:

Ինձ ժամանակ է պետք գլխավոր մարզչի հարցում կողմնորոշվելու հարցում»:

Խոսելով երիտասարդական հավաքականի գլխավոր մարզիչ Արտակ Օսեյանի պաշտոնավարման մասին՝ Հայրապետյանն ասաց. 

«Քանի որ Երիտասարդականն ու Ազգայինը նույն խաղային ձեռագրով են գործում, հարմար գտանք Օսեյանի թեկնածությունը: Նույն Գվարդիոլային ու Լուիս Էնրիկեին անփորձ լինլու ժամանակ է վստահել «Բարսելոնան»:

«Իհարկե, դժգոհ եմ Երիտասարդականի ելույթներից և գրանցած արդյունքներից: Դժգոհ եմ ինչպես կազմի ընտրությունից, այնպես էլ տակտիկական դասավորությունից: Օրինակ բերեմ, Աղվան Պապիկյանը, ով շատ լավ որակներ ունի, հավաքականին միացել էր 8 կգ ավել քաշով»,-նշեց Ռ.Հայրապետյանը:

Պատասխանելով այն հարցին, թե արդյոք երիտասարդական հավաքականի մարզչին նույնպես հայ մասնագետ է տեսնում, ՀՖՖ նախագահը ասաց. 

«Դեռևս պետք է սպասենք, տեսնենք իսպանացիները «Բանանցում» ինչպես են աշխատում»:

Անդրադառնալով մինչև 19 տարեկանների մարզիչ Մարկ Լելևրի աշխատանքին Հայրապետյանն ասաց հետևյալը.

«Ներկա փուլում չեմ կարող նրա գործունեությունը մեկնաբանել, քանի որ նա ինձ երկարաժամկետ ծրագիր է ներկայացրել, և նախապես ասել է, որ այս փուլում արդյունքների չսպասենք: Իր գործը ֆուտբոլիստ պատրաստելն է, իսկ ներկայում անցել են նրա ծրագրի 20-30 տոկոսը: Արդյունքների մասին կխոսենք ավելի ուշ: Այն ինչ ներկայացրել է Լելևրը չկար Արտակ Օսեյանի մոտ. վերջինիս հարցում հենց դա է ինձ ամենաշատը մտահոգում»: