Փաստ ինֆո

Արդեն շուրջ 5 ամիս է, ինչ ՀՀ-ում, Այլընտրանքային պատիժների իրականացման բաժնի հիմքի վրա, գործարկվել են պրոբացիոն ծառայության երկու պիլոտային տեղամասեր` Երևանի Շենգավիթ և Լոռու մարզի Վանաձորի տեղամասերում: «Փաստինֆո»-ի հետ զրույցում ՀՀ Արդարադատության փոխնախարար Սուրեն Քրմոյանն այսօր ասաց, որ արդյունքներն այստեղ արդեն տեսանելի են, բայց հստակ թվային տվյալներ չնշեց` հավելելով, որ առաջիկայում նախատեսվում է հրապարակել հաշվետվություն, որտեղ և կներկայացնեն բոլոր արդյունքները, այդ թվում նաև` քանի հոգի են այս ընթացքում արդեն իսկ ընդունվել աշխատանքի:

Իսկ մինչ այդ մեզ հետ զրույցում որոշ թվային տվյալներ հայտնեց  Այլընտրանքային պատիժների իրականացման բաժնի պետ Լևոն Ավետիսյանը: Նա նշեց, որ պիլոտային տեղամասերից շահառուների հետ իրականացվել են մշակութային ծրագրեր: Անչափահաս դատապարտյալների համար այցեր են կազմակերպվել Էջմիածին ու Էրեբունի թանգարան, ծրագրեր են մշակվում նաև Կրթության և գիտության, Սպորտի և երիտասարդության նախարարությունների, զբաղվածության կենտրոնների հետ:

«Այս ծրագրերի արդյունքում ունեցանք առաջընթաց: Դատապարտյալներ կային, որ ընդունվեցին աշխատանքի»,- ասաց Լ. Ավետիսյանը` հավելելով, որ աշխատանքով արդեն ապահովվել է 3 դատապարտյալ, ինչը, նրա խոոսքով, պիլոտային ծրագրի ընթացքում մեծ նվաճում է:

Լևոն Ավետիսյանը տեղեկացրեց նաև, որ նախապես աշխատանքի է անցել 4 դատապարտյալ, որոնցից մեկը, սակայն, մի քանի օր աշխատելուց հետո հրաժարվել է և նոր աշխատանք է փնտրում:

Լևոն Ավետիսյանը նշեց, որ շատ ավելի կարևոր է ծրագրի նկատմամբ ոչ այնքան դատապարտյալների, որքան հասարակության վերաբերմունքը, քանի որ ազատազրկման վայրից վերադարձողի` հասարակության լիարժեք անդամը դառնալու համար, կարևոր է հենց հասարակության կողմից նրա ընդունումը: «Իսկ հանցագործության ու հատկապես կրկնահանցագործության դեմ պայքարի լավագույն միջոցը զբաղվածության ապահովումն է»,- ասաց Լևոն Ավետիսյանը: