Փաստ ինֆո

Դատարանում քննվում է  նախկին փեսայի դեմքին ծծմբական թթու լցնելու միջոցով  նրա առողջությանը ծանր, կյանքին վտանգ սպառնացող  վնաս հասցնելու մեջ մեղադրվող Աշոտ Սուքիասյանի դեմ գործը:

Ըստ մեղադրական եզրակացության, Աշոտ Սուքիասյանը 2015թ. հուլիսի 6-ին` ժամը 17.30-ի սահմաններում, Երևանի Դավիթ Մալյան փողոցի իրեն պատկանող տանը հանդիպել է երեխային տեսակցելու նպատակով իր տուն այցելած դստեր   նախկին ամուսնուն՝ Արտակին: Երեխայի քնած լինելու պատճառով առաջարկել է նրան իջնել նկուղային հարկում գտնվող իր արհեստանոցը, որտեղ միասին սրճել են և զրուցել նրանց ամուսնաընտանեկան հարցերի շուրջ: Ելնելով Արտակի դրսևորած վարքագծից ու նրա պահվածքի արդյունքում առաջացած ընթացիկ կոնֆլիկտներից՝ Աշոտ Սուքիասյանը արգելել է նրան  այցելել իր բնակարան, տեսակցել երեխային, ինչին հակադրվելով նախկին փեսան  վիրավորական խոսքեր է ասել, որը վրդովեցրել է Ա.Սուքիասյանին: Վերջինս էլ,  ըստ մեղադրական եզրակացության, նախկին փեսայի առողջությանը ծանր վնաս պատճառելու դիտավորությամբ՝ վերցրել է սեղանին դրված ծծմբական թթվով լի տարան և այն լցրել նրա  դեմքին՝  նրան պատճառելով առողջության ծանր վնաս՝ կյանքին վտանգ սպառնացող:

Պաշտպանական կողմը համաձայն չէ մեղադրանքի հետ և հայտարարում է, որ  ամբաստանյալը ցանկացել է   ջուր լցնել նախկին փեսայի դեմքին, պարզապես տարաներն է շփոթել, և նրա ձեռքում սխալմամբ ծծմբական թթվով տարան է հայտնվել:

Նույն այդ գիծն էր տանում նաև այսօր հարցաքննված ամբաստանյալի դուստրն ու տուժողի նախկին   կինը: Նա հայտնեց, որ դեպքից հետո տուն բարձրանալով հայրն ասել է՝  «Արտակին հետ բերեք, շտապօգնություն կանչեք»: Ըստ վկայի, ինքը փորձել է Արտակին հետ բերել, նրան տեսել է նախ կողքից, ապա թիկունքից, սակայն չի հասցրել նախկին ամուսնուն հետ բերել, նա հեռացել է:  «Հիմա գիտեմ, որ Արտակն այրված է եղել, այն ժամանակ չգիտեի», - ասաց վկան: Նա նշեց, որ ինքը ցնցվել է  հոր տեսքից՝  նրա վերնաշապիկը կտրտված էր, կային մանուշակագույն հետքեր, մեկ աչքն էլ թափանցիկ էր, իսկ Արտակին դիմացից չի տեսել, ու չի տեսել նաև նրա վնասվածքները:  «Դուք ցանկացե՞լ եք օգնել Արտակին» հարցին վկան պատասխանեց՝ անպայման, ապա հավելեց. «Ես չեմ տեսել, որ այդ վիճակում է»:

Վկայի ցուցմունքները տեղ-տեղ հակասում էին տուժողի ավելի վաղ տված ցուցմունքներին՝ վերջինս ասել էր, որ նախկին կնոջ տնից ոչ ոք դուրս չի եկել, ինքը թողել, հեռացել է, իսկ նախկին կինն ասաց, որ նախկին ամուսինն իրեն տեսել է, «երբ ես ձայն տվեցի, կանգնեց, եթե չի տեսել, լսել է հաստատ, եթե այդ աչքով չէր  տեսնում»:  Ըստ վկայի ցուցմունքի, ինքը չի տեսել նախկին ամուսնու դեմքը, սակայն տեսել է ճղճղված վերնաշապիկը:

Հազարավոր մարդիկ կարող են վկայել, ասաց վկան, «քանի՞ հազար մարդ» դատարանի հարցին ի պատասխան վկան ինքն իրեն ուղղեց՝  «տասնյակ, տասը հոգի»: 

Ըստ վկայի,  ինքը չի պատասխանել Արտակի հեռախոսազանգին, որովհետև շատ լարված, խառնաշփոթ վիճակում էր, հեռախոսազանգին պատասխանած կնոջից   Արտակը ճշտել է, թե այդ ի՞նչ էր նախին աներն  իր վրա  թափել, իրեն պատասխանել էին՝ լուծիչ էր:

Վկան բացառապես բացասականորեն նկարագրեց իր նախկին ամուսնուն՝ տուժողի ներկայացուցչի այս դիտարկման կապակցությամբ վկան հայտարարեց՝ դրական կողմը չի գերակշռում, ոչ մի կին չէր ցանկանա մանկահասակ երեխա ունենալով՝ ամուսնալուծվել: «Ես իրականությունն եմ ներկայացնում»,- ասաց նա:

Բուն միջադեպի մասին, ըստ վկայի, ինքն իմացել է պատմածներից՝  նախկին ամուսինը նախկին աներոջ հետ հանդիպմանը  նախկին կնոջը  նորից մեղադրել է անբարոյական լինելու, իրեն դավաճանելու մեջ: Ի՞նչ էր մնում, ըստ վկայի, իր հորն անել՝   կամ հարվածել,  կամ ջուր լցնել, որպեսզի նախկին փեսան սթափվի, հայրը ձեռքը գցել է տարային, որ ջուր շփի փեսայի վրա, սակայն տեսել է, որ փեսան այրվում է:
 
Վկան հայտնեց, որ իր պնդմամբ քննիչները արձանագրել են, որ դեպքի ժամանակ երեք ապակե տարա է եղել սեղանին, որից մեկում ջուր է եղել, ինչպես նաև արձանագրել, որ եղել է ծխախոտի ութ մնացորդ, ինչն ըստ նրա, վկայում է, որ նախկին փեսան ու աները երկար ժամանակ  շփվել են իրար հետ: