Փաստ ինֆո

Հանրաքվեի դրված Սահմանադրությունը հարվածում է մեր ընտանիքին: Այս մասին լրագրողների հետ հանդիպման ժամանակ այսօր հայտարարեց ԱԱԾ նախկին փոխնախարար, հասարակական-քաղաքական գործիչ Գուրեգեն Եղիազարյանը:

Նրա համոզմամբ, առանձին անհանգստություն է ներկայացնում անչափահաս երեխաների իրավունքների հարցը:  «Եթե ծնողը համարձակվի մի փոքր կոպիտ հարցնել՝ ինչո՞ւ է ուշանում, երեխան կարող է դատի տալ ծնողներին»,- ասաց Գուրգեն Եղիազարյանը: Մյուս հարցը, որ անհանգստացնում է բանախոսին  միասեռականության հնարավոր ազատականացումն է: Ինչ վերաբերում է պետական մակարդակի հարցերին, այստեղ, նրա խոսքով, անորոշություն է առաջանալու, թե ով է ղեկավարելու բանակը, քանի որ Սահմանադրությունից հանվել է գլխավոր գերագույն հրամանատարի մասին դրույթը: «Պատերազմի ժամանակ գլխավոր հրամանատարի դերը ստանձնելու է վարչապետը, իսկ ոչ պատերազմական վիճակում՝ այդպես էլ հայտնի չէ, թե ով»,- ասաց Եղիազարյանը` եզրակացնելով, որ նախատեսվող տարբերակը հայ ժողովրդի վզին դրսից փաթաթված Սահմանադրություն է, որով երկիրը կհանձնվի դրսի ուժերի կառավարմանը, ՀՀԿ-ն էլ կամրագրի իր իշխանությունու կհավերժացնի իր իշխանությունը:

Ասուլիսի հաջորդ բանախոս ԱԺ ՀՀԿ խմբակցության պատգամավոր Սուքիաս Ավետիսյանը, հակառակը` որևէ մտահոգիչ կետ Սահմանադրության նախագծում չի տեսնում, ավելին` պատրաստ է ապացուցել, որ Սահմանադրական բարեփոխումների կարիքը կար և դա արվում է ճիշտ ժամանակին:

«Մենք Սահմանադրության մեջ ունենք ընտանիքին վերաբերվող հստակ հոդվածներ: Մենք ունենալով հստակ մենթալիտետ, երբեք մեր ընտանիքը չպետք է համեմատենք եվրոպական ընտանիքի հետ:Մենք խնդիր ունենք՝ ազգովի պահելու մեր արժեքները, ու կարևոր չէ թե մենք դիմություն ենք, թե ընդդիմություն»,-պատասխանելով Գուրգեն Եղիազարյանի բարձրաձայնած մտահոգություններին, ասաց Սուքիաս Ավետիսյանը:

Ինչ վերաբերում է բանակին, նա նշեց, որ նախագծում հստակ ամրագրված է, որ բանակի օպերատիվ ղեկավարումը խաղաղ ժամանակներում իրականացնելու է գլխավոր շտաբի պետը: