Փաստ ինֆո

Ազգային ժողովի ՀԱԿ խմբակցության քարտուղար Արամ Մանուկյանը կոչ է անում իշխանություններին Սահմանադրության փոփոխությունների հանրաքվեին ընդառաջ զերծ մնալ խախտումներից: 

Այս մասին ընդդիմադիր պատգամավորը հայտարարեց ԱԺ նիստում՝ ընդգծելով, որ իրենք խախտումներն արձանագրելու են թե՛ հասարակության և  թե՛ միջազգային կառույցների համար: 

Խոսելով իրենց շտաբի կողմից արդեն իսկ արձանագրված խախտումների մասին՝ նա, մասնավորապես, ասաց. «Մի մասն արդեն փաստ է. Գագիկ Հարությունյանի հանձնաժողովի անդամ լինելը և քարոզելը, կառավարության անդամների մասնակցությունը շտաբերի աշխատանքներին, նախարարների, մարզպետների ներգրավվածությունը այս աշխատանքներին: Սա քրեական հետապնդման թեմա է: Ոչ մեկն իրավունք չունի վարչական ռեսուրսն օգտագործել քարոզի համար: Ավելի արտառոց է ներքին գործերի նախարարությունում ստեղծված շտաբը, որի սուրբ պարտականությունն է հասարակական կարգը պահպանելը, այլ ոչ թե օպերատիվ շտաբ ձևավորի, ընդ որում, առավել քան տարօրինակ՝ ոստիկանական զորքերի պետն այս հանձնաժողովի անդամ է»:

Ընդդիմադիր պատգամավորն ընդգծեց, որ միջազգային բոլոր կառույցները վարչական ռեսուրսի կիրառումը համարում են քրեական հանցագործություն՝ հավելելով, որ վերջին օրերին դրանց ավելացել են այլ խախտումներ ևս: «Մի քանի նախարարություններ, պետական հիմնարկներ, դպրոցներ, հավաքում են իրենց աշխատողներին, ցուցակներ են կազմում, ստորագրել են տալիս, անձնագրեր են վերցնում և ճշտում են՝ նրանք «այո» են թե «ոչ», իսկ ավելի լկտի վերաբերմունքը՝ երբեմն նաև հայտարարում են, որ «ոչ»-ի դեպքում նրանք կարող են ազատվել աշխատանքից»,-ասաց Ա.Մանուկյանը՝ կոչ անելով  իշխանություններին՝ ճշտել նշված փաստերը:

Ըստ պատգամավորի՝ եթե իշխանությունն ուզում է արդար հանրաքվե անցկացնի, ապա պետք է պատժի այն մարդկանց, ովքեր կիրառում են վարչական ռեսուրսը, և նրանց քրեական պատասխանատվության ենթարկի: «Գյուղերում հավաքում են անձնագրեր և դրանց պատճենները, խոստանում  զիջել հողահարկը և այլն: Հիվանդանոցներում կազմում են իբր ցուցակներ և ներկայացնում տեղամասային հանձնաժողովների մեր նախագահներին, որ խնամողներն այդ օրերին այնտեղ պետք է քվեարկեն, նրանց համար առանձին ցուցակ է լինելու՝ այն դեպքում, երբ նրանք կողքի տեղամասում են ապրում և հստակ չէ, թե այնտեղի ցուցակներից նրանք դո՞ւրս են գալու, թե՞ չէ»,-հայտարարեց ՀԱԿ ներկայացուցիչը:

Ընդդիմադիրի այս հայտարարությանն անմիջապես արձագանքեց ԱԺ փոխնախագահ Էդուարդ Շարմազանովը՝ վստահեցնելով, որ իշխանությունները շահագրգռված են «բացարձակապես նորմալ, ժողովրդավարական հանրաքվե անցկացնելուն», և իր գործընկերներին հորդորեց խոսել «հասցեական»: