Փաստ ինֆո

Արդեն երրորդ օրն է, ինչ առողջական ծայրահեղ վատ վիճակում գտնվող կալանավոր  Վաղինակ Հովհաննիսյանին որևէ հետազոտության չեն ենթարկում՝ հասկանալու համար, թե վիճակը որքանով  է լուրջ: Նրան ընդամենը հանգստացնող և քնաբեր են ներարկում, կաթիլային են միացնում՝  այն էլ խցում, նույնիսկ հիվանդասենյակ չեն տեղափոխում: Այս մասին  «Փաստինֆո»-ի լրագրողի հետ զրույցում ահազանգ հնչեցրեց  31-ամյա Վաղինակի պաշտպան, փաստաբան Ինեսսա Պետրոսյանը:                                                                                    

Ըստ պաշտպանի, իր կնոջ նկատմամբ սպանության փորձ կատարելու մեջ  անհիմն մեղադրվող Վաղինակը քանի ամիս է,  ինչ գտնվում է կալանքի տակ, ընթանում են դատական նիստերը, հարցաքննվել է կինը, ով գործով տուժողն է, նրա ընտանիքի անդամները՝  մայրը, քույրը, եղբայրը: Հերթական դատական նիստի ժամանակ՝ նոյեմբերի  11-ին, երբ արդեն ավարտվում էր վկայի հարցաքննությունը, Վաղինակն իրեն  վատ է զգացել, ջուր խնդրել, սակայն ջուր խմելուց հետո էլ  հինգ րոպե անց նա նորից ասել է, որ  վատ է զգում, խնդրել է ընդհատել դատական նիստը: Ամբաստանյալը գունատվել է ու ավելի վատ զգացել, և դատարանը  հետաձգել  է  նիստը, Վաղինակը ոտքի է կանգնել, ուշաթափվել ու  վայր ընկել, ոստիկանության աշխատակիցները նրան մի կերպ բարձրացրել են, նստեցրել,  շտապօգնությունը՝  բուժօգնություն ցուցաբերել: Պաշտպանի ունեցած տեղեկություններով, արյան ճնշումը բարձրացել է մինչև 220-ի  նիշը:

Ամբաստանյալին տեղափոխել են  «Նուբարաշեն»  քրեակատարողական հիմնարկի խուցը, նրա վիճակը կտրուկ սկսել է վատանալ, և հաջորդ օրը Վաղինակի դեմքի ծնոտային հատվածը թեքվել է:  «Մենք բժիշկ չենք, բայց ակնհայտ էր, որ դեպի վատ հիվանդություն տանող վատ նախանշաններ են,  վիճակն էլ չէր կայունանում, արյան ճնշումը շարունակում էր մնալ բարձր: Նաև մտավախություն կար, որ կարող է կաթված լինել»,- ասաց փաստաբանը:

Ի.Պետրոսյանը՝ տեղեկանալով այս մասին, անմիջապես կապվել է Քրեակատարողական վարչության բուժծառայության պետ Հարությունյանի հետ,  նա նույնիսկ տեղյակ էլ չի եղել այդ մասին, ապա իմացել,  որ իրոք կաթիլային են միացրել հենց խցում: «Նրան նույնիսկ չեն էլ տեղափոխել հիվանդասենյակ, միացնում էին կաթիլային, հետո անջատում, այսօր էլ իմանալով, որ վիճակը շարունակում է մնալ այդպիսին, տեղեկացա նաև, որ առաջարկվել է իր միջոցների հաշվին տեղափոխել «Էրեբունի»   բժշկական կենտրոն, հետազոտվել, իսկ պաշտպանյալս չէր  կարող «այո»  կամ «ոչ»   ասել, որովհետև    գտնվում է մեկուսարանային պայմաններում և բնականաբար որևէ միջոց չունի, կալանքի տակ գտնվող անձնավորություն է: 31 տարեկան տղան հայտնվում է ծայրահեղ վատ վիճակում և չի ստանում պատշաճ  բուժօգնություն: Այսօր էլ տեղեկացա, որ կրկին խցում բերել ու կաթիլային են միացրել»,- ընդգծեց Ի.Պետրոսյանը: Պաշտպանն անձամբ  այցելել է  քրեակատարողական հիմնարկ և տեսել, որ իրոք Վաղինակի ծնոտը թեքված է ամբողջությամբ, կախված, վիճակը վատ է:  Բուժծառայության  ղեկավարի անտարբեր վերաբերմունքը մի քիչ հիասթափեցրել  է  պաշտպանին՝ թեև նա ասում էր, որ Դատապարտյալների հիվանդանոցից հրավիրվել է նյարդաբույժ, բայց նաև հայտնել է, որ ինքը գտնում է, որ վիճակն այդպես չէ, նույնիսկ ակնարկել, որ գուցե այդ ինքնազգացողությունը կապված է հոգեբուժական խնդիրների հետ:

Պաշտպանը նշեց, որ Վաղինակ Հովհաննիսյանին առաջադրվել է շատ անհիմն մեղադրանք՝ ՀՀ քրեական օրենսգրքի 34-104-րդ հոդվածի 1-ին մասով, սպանության փորձ՝  իր կնոջ նկատմամբ: Գործն արդեն գտնվում է դատարանում, նախաքննության ժամանակ տեղի են ունեցել էական խախտումներ: «Այս քրեական գործն այս կերպ երբևիցե պետք է մուտք չունենար դատարան և իմ կողմից ներկայացված բոլոր միջնորդությունները ինչպես քննիչն, այնպես էլ դատախազն անհիմն  մերժել են: Մինչդեռ քրեական գործում առկա է փորձագետի եզրակացություն,   որ անձը գտնվել է կոմուլյատիվ աֆեկտի վիճակում, այսինքն՝ ուղղակի երկու անգամ երկուս է, որ պետք է արարքին տրվեր ճիշտ քրեաիրավական գնահատական, որի հետ մենք կարող է համաձայն լինեինք կամ չլինեինք: Բայց այն,  ինչ որ կար գործով՝ փաստական հանգամանքները, դրան պետք է ճիշտ գնահատական տրվեր»,- ասաց պաշտպանը:

Ինեսսա Պետրոսյանը պատրաստվում է բարձրաձայնել խնդրի մասին, բողոք ներկայացնել ՀՀ  մարդու իրավունքների պաշտպանին,  երևի նաև՝   ՀՀ գլխավոր դատախազին: