Փաստ ինֆո

 

ՀՀ արդարադատության նախարարությունն ու Փաստաբանների պալատը կշարունակեն  համագործակցությունը, որը լավ հիմքերի վրա է դրված եղել և առաջիկայում էլ կա տեսլական, որը հնարավորություն կընձեռի ավելի խորացնել և  շարունակել այդ համագործակցությունը՝  որակապես նոր հարթության վրա  բարձրացնելով այն:

 

Այս մասին լրագրողների հետ զրույցում այսօր հայտարարեց ՀՀ արդարադատության նախարար Արփինե Հովհաննիսյանը, ով  շրջայց կատարեց Փաստաբանների պալատում, Հանրային պաշտպանի գրասենյակի և Փաստաբանական դպրոցի տարածքում, Փաստաբանական դպրոցում մասնակցեց Դատարանի դահլիճի բացմանը:  

 

Նախարարի գնահատմամբ, Արդարադատության նախարարության և Փաստաբանների պալատի միջև մեկ տարի առաջ ստորագրված  Համագործակցության  հուշագիրը ամփոփել էր նախորդիվ եղած համագործակցությունը, Հուշագրի հիման վրա շարունակվել է որոշակի համագործակցություն,  «շատ  նորմալ        արդյունքներ են արձանագրվել այս մեկ տարվա ընթացքում»:

 

Միաժամանակ նախարարն ընդգծեց, որ այդ փաստաթղթի հիման վրա որակապես նոր հարթության վրա բարձրացումը հնարավորություն կտա պարզապես այդ հուշագրին ավելացնել գործողությունների ծրագիր և քայլերի հստակ հաջորդականություն: 

 

Ա.Հովհաննիսյանը  նշեց,  որ  այսօր շրջանառության մեջ է դրվել «Փաստաբանության մասին»  և հարակից օրենքներում փոփոխություններ ու լրացումներ կատարելու նախագծերի փաթեթը, որում նոր մոտեցումներ են արձանագրված,  դա խնդիրների որակապես նոր լուծման հնարավորություն կտա:  «Կարծում եմ,   նաև այդ օրինագծի շրջանակներում համագործակցությունը էլ ավելի կխորացվի, կշարունակվի»,- ասաց նախարարը: 

 

ՀՀ արդարադատության նախարարի գնահատմամբ,  փաստաբանական համայնքը Հայաստանում ամենակայացած մասնագիտական կառույցներից մեկն է: « Փաստաբանների պալատն իր հերթին ամեն ինչ արել է փաստաբանների մասնագիտական շահերը պատշաճ կերպով ներկայացնելու համար և,  կարող եմ ասել,  այսօր հայտ է ներկայացնում լրջագույն դերակատարում ստանձնելու Հայաստանի Հանրապետությունում մարդու իրավունքների ու հիմնարար ազատությունների պաշտպանության և երաշխավորման գործում»: 

 

Ա. Հովհաննիսյանը կարևորեց Դատարանի  դահլիճի բացումը.  դա  ևս մեկ քայլ է ամրապնդելու այդ ուղղությամբ Փաստաբանների  պալատի կողմից կատարվող քայլերը: Փաստաբանական դպրոցում, որտեղ   ուսուցանվում են տեսական և գործնական գիտելիքներ ու հմտություններ, անհրաժեշտ է, որպեսզի ուսուցման ընթացքում Փաստաբանական դպրոցի ունկնդիրը կարողանա ամբողջությամբ տիրապետել դատական գործընթացի նրբություններին: «Կարծում եմ,  դահլիճը հնարավորություն կընձեռի պատկերացում կազմել ինչպես քաղաքացիական, այնպես էլ  քրեական գործերով դատավարական նրբությունների, ընդհանրապես մանրամասների մասին»,- ասաց  նախարարը:  

 

ՀՀ փաստաբանների պալատի նախագահ Արա Զոհրաբյանն իր հերթին նշեց, որ նորաբաց  Դատարանի դահլիճն  «այսպես ասած՝  փաստաբանի համար մարզադահլիճ է, որտեղ ապագա փաստաբանները սովորելու են ինչպես «կռվել»: Իհարկե, դա կարևոր է, որովհետև ապագա փաստաբանը պետք է տեսնի ինչ է դատարանի դահլիճը, կարողանա իրեն այդ դերի մեջ պատկերացնել»,- ասաց Ա.Զոհրաբյանը:  

 

Փաստաբանների պալատի նախագահն Արդարադատության նախարարության հետ իրենց  համագործակցությունը գնահատեց որպես կառուցողական: «Այսօր մենք ունենք լավ օրենք՝  Փաստաբանության մասին ՀՀ օրենքը, որը լայն հնարավորություն է տալիս և՛ անկախությունը ամրապնդելու,  և՛ Հանրային պաշտպանի գրասենյակի կողմից առանձնացված անվճար իրավաբանական օգնություն տրամադրելու, ինչպես նաև Փաստաբանական դպրոցի գոյությունը երաշխավորելու համար»:  Ա.Զոհրաբյանը նշեց, որ  ԱՊՀ երկրներում չկան փաստաբանական դպրոցներ, և այսօր ԱՊՀ երկրների փաստաբանական համայնքները մեծապես  հետաքրքրված են ՀՀ փաստաբանական դպրոցի մոդելով: 

 

ՓՊ նախագահը կարևորեց Հանրային պաշտպանի գրասենյակի գործունեությունը՝  հիշեցնելով, որ մինչ այդ կառույցի ստեղծումը Հայաստանում  փաստաբանը քննիչի միջոցով էր ներգրավվում  որպես անվճար պաշտպան, այնուհետև քննիչը նրան տրամադրում էր տեղեկանք, որի հիման վրա նա որոշակի ժամավճարային գումարներ էր ստանում:  Դեպք է եղել, երբ փաստաբանը քննիչի կողմից  տրված տեղեկանք է ներկայացրել առ այն, որ փաստաբանը մեկ օրվա ընթացքում  աշխատել է քսանվեց ժամ: «Դա,  իհարկե, փաստաբանին կախվածության մեջ էր դնում քննիչից:  Հանրային պաշտպանի գրասենյակի մոդելի պայմաններում,  իհարկե,  կախվածության մասին խոսք  չկա.  հանրային պաշտպանը ստանում է բարձր աշխատավարձ և անվճար իր ծառայություններն է մատուցում»,- ասաց ՓՊ նախագահը:

 

Արա Զոհրաբյանն ընդգծեց, որ  Փաստաբանների պալատի զարգացման մեջ շատ կարևոր դեր ունի փաստաբանը՝  Փաստաբանների պալատի շենքը,  Փաստաբանների պալատի կառավարման մարմինները որևէ բան չեն կարող անել, եթե դրսում «կռիվ տվող» փաստաբանը ինքը չկարողանա անկախ լինել և չկարողանա բարձրացնել փաստաբանի հեղինակությունը: Այդ իսկ պատճառով ՓՊ ղեկավարի գնահատմամբ, բոլոր դրական զարգացումները «մեր փաստաբանների ձեռքբերումներն են»: