Փաստ ինֆո

Առանձնապես խոշոր չափերի ադամանդներ հափշտակելու համար Դուբայում Հնդկաստանի քաղաքացու սպանության գործով  դատարանն այսօր ԱՄԷ-ի   երկու ապահովագրական ընկերություններին ճանաչեց քաղհայցվորներ, իսկ գործով երեք ամբաստանյալներին՝ քաղպատասխանողներ:

Դատարանը գտավ, որ վնասի հատուցման վերաբերյալ քաղհայցը քրեական դատավարության կարգով ենթակա է քննության:  

Դատարանը գտավ նաև, որ հայցվորների ներկայացուցիչ Էմիլ Ամիրխանյանի միջնորդությունը իրեղեն ապացույց ճանաչված ադամանդների լրացուցիչ զննություն կատարելու մասին անհիմն է և ենթակա է մերժման՝ ադամանդները արդեն իսկ զննվել են դատարանում, ապա ի պահ հանձնվել ՀՀ կենտրոնական բանկին: 

Ապահովագրական ընկերությունները, որոնք արդեն ադամանդների սեփականատիրոջը հատուցել են հանցագործությամբ պատճառված վնասը, պահանջում են հատուցել վնասը մեկուկես մլն դոլարի չափով, ընդ որում՝ բնեղենով, այսինքն՝ ադամանդներով, թեև իրեղեն ապացույց ճանաչված ադամանդների արժեքը կազմում է շուրջ 1 մլն 200 հազար դոլար: 

Հիշեցնենք, որ, ըստ մեղադրանքի, Հայաստանի Հանրապետության քաղաքացի Հովհաննես Մելքոնյանը հանցանքներ կատարելու համար ստեղծել է կազմակերպված կայուն խումբ՝ դրանում  ընդգրկելով Հայաստանի Հանրապետության քաղաքացիներ, իր հորեղբոր որդի Խոսրով  Մելքոնյանին և նրա ընկերոջը` Սեմյոն  Եդիգարյանին, նրանք խմբով  կատարել են առանձնապես խոշոր չափերով գույք հափշտակելու նպատակով ավազակություն, շահադիտական դրդումներով ու ավազակությամբ զուգորդված սպանություն և  մաքսանենգություն:

Հովհաննես Մելքոնյանը և Սեմյոն Եդիգարյանը, ըստ մեղադրանքի, նախապես մշակված պլանի համաձայն, ադամանդները հափշտակելու նպատակով հարձակում են գործել Վաիիհավ Դհոնդիբա Սալոնկիի վրա, նրա կյանքի ու առողջության համար վտանգավոր բռնություն գործադրելով` բռունցքներով հարվածներ են հասցրել վերջինիս մարմնի տարբեր մասերին, քարշ տվել լոգարան, կպչուն ժապավենով Հովհաննես Մելքոնյանը կապել է Վաիիհավ Դհոնդիբա Սալոնկիի ձեռքերը, իսկ Սեմյոն Եդիգարյանը`  ոտքերը, ապա ապօրինաբար Վաիիհավ Դհոնդիբա Սալոնկին կյանքից զրկելու դիտավորությամբ նրա գլխին անցկացրել են երկու պոլիէթիլենե փաթեթներ, դրանց եզրերը կպչուն ժապավենով ամուր սեղմելով, օդի հոսքը փակելով՝ մեխանիկական շնչահեղձության եղանակով ապօրինաբար, դիտավորությամբ կյանքից զրկել` սպանել են Վաիիհավ Դհոնդիբա Սալոնկիին և հափշտակել են «Color Source for Gold and Diamonds Company» ընկերության տնօրեն Ռահուլ Ռաջենդրա Կառնավարտին պատկանող առանձնապես խոշոր չափերի` 691.883.000 ՀՀ դրամին համարժեք 1.700.000 ԱՄՆ դոլար արժողությամբ, 6.800 կարատ տարբեր գույների ադամանդներ:   5.290.715 կարատ ադամանդները «Զվարթնոց» օդանավակայանում, մաքսանենգությամբ` մաքսային հսկողությունից թաքցնելով,  տեղափոխել են Երևան քաղաք, որտեղ էլ դրանք ՀՀ ոստիկանների կողմից հայտնաբերվել են Հովհաննես Մելքոնյանի ուղեբեռի զննությամբ, իսկ մնացած 1509.285 կարատ ադամանդները չեն հայտնաբերվել: