Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանի դատավորի օգնական Արմինե Կարապետյանի գործով այսօրվա նիստն անցավ բավականին լարված մթնոլորտում: Տուժողը  խարդախություն կատարելու մեջ մեղադրվող ամբաստանյալին խոստացավ ընդհուպ մինչև  նախագահական դիմել, իսկ ամբաստանյալը հակադարձեց՝ «քո խարդախին իմ հետ մի համեմատիր»՝  ի նկատի ունենալով տուժողի որդուն, ով խարդախության համար է դատապարտվել:

Տուժող Ալինա Հովհաննիսյանն իր ցուցմունքում հայտնեց, որ ամբաստանյալ դատավորի օգնականը նույն դատարանի մեկ այլ դատավորի վարույթում քննվող իր որդու գործով վերջինիս նկատմամբ ազատազրկման հետ չկապված պատժատեսակ նշանակելու համար իրենից  պահանջել է 1500 ԱՄՆ դոլար՝  զգուշացնելով այդ խոսակցության մասին որևէ մեկին չասել:

Տուժողը նշեց, որ թեև ինքը դիմել  է իր հարևաններին, ազգականներին  այդ գումարը հավաքելու համար, սակայն իրեն այդպես էլ չի հաջողվել այն հավաքել: Երբ դատավորի օգնականը հետաքրքրվել է գումարով, ինքը գումարը տալու կոնկրետ օր չի նշել, սակայն ասել է, որ մի քանի օրվա մեջ մի բան կանի:

Ըստ տուժողի,  դատավորի օգնականն իրեն փաստաբանի թեկնածություն է առաջարկել, տվել փաստաբան Գրիգոր Քալաշյանի հեռախոսահամարն ու ասել, որ պայմանավորվելու համար զանգահարի նրան, ասելով  50-60 հազար   ՀՀ դրամով փաստաբանն այդ գործը կանի,  այսինքն՝ կպաշտպանի իր  որդու շահերը:

Ըստ տուժողի,  ինքը գաղափար չի ունեցել, որ իր որդուն պարտադիր փաստաբան է հարկավոր, սակայն  որդու գործով առաջին դատական նիստը հետաձգվել է հենց գործին պաշտպան ներգրավվելու նպատակով, քանի որ արագացված ընթացակարգով  քննության պարագայում  փաստաբանի մասնակցությունը  պարտադիր է:

Տուժողը հայտնեց, որ  երբ ինքը փաստաբանի հետ կապ է հաստատել,  վերջինս ասել է, որ դատավորի օգնականը իր հեռախոսահամարը տալով  «գիտի ինչ է անում»:   Տուժողի տպավորությամբ,  փաստաբանն ևս տեղյակ է եղել այդ գործարքի մասին և  շահագրգռվածություն է դրսևորել իրեն ասելով՝  «մի բան արա,  այդ գումարը ճարի տուր, դու ու որդիդ մեղք եք»: Ըստ տուժողի,  «կամ գումարը պետք է տայի, կամ տղաս պետք է դատվեր»:

Տուժողը նշեց, որ դատարանն իր որդուն դատապարտել է երկու տարվա ազատազրկման՝  թեև մեղադրողը միջնորդել էր իր որդուն դատապարտել 500 000 ՀՀ դրամի տուգանք:  Դատախազի կողմից տուգանքի  միջնորդությունից հետո տուժողը զանգահարել է ամբաստանյալին, որպեսզի նրան ասի, որ գումարը չի կարողանում գտնել և որ խնդրի մարդկային մոտեցում ցույց տա,  սակայն դատավորի օգնականն անպատասխան է թողել իր հեռախոսազանգերը: Փոխարենը ջանասիրություն էր  դրսևորում փաստաբանը՝ տուժողին ասելով, որ «արագացնի,   գումար ճարի ու տանի տա»:

Դատավճիռի հրապարակումից հետո, երբ տուժողի որդուն դատական նիստերի դահլիճից կալանքի տակ են վերցրել, տուժող կինը դատարանում բղավել է, հայհոյանքներ հնչեցրել, ասել «կաշառակերներ, փող ուզեցիք՝  չտվեցի, դատեցիք» :  Տուժողին հետաքրքրում էր այդ ինչպես պատահեց, որ մեղադրողը տուգանքի միջնորդություն արեց, իսկ դատարանը ազատազրկեց իր որդուն, ուստի իր այդ հարցի պատասխանը  ստանալու ակնկալիքով  նա գնացել է դատախազ Ափինյանի մոտ:

Դատարանում և դատախազությունում բարձրացրած աղմուկից հետո տուժողը իրենից կաշառք պահանջելու վերաբերյալ հանցագործության մասին  հաղորդում չի ներկայացրել: «Չեմ իմացել, թե դա ինչ ա»,-ասաց նա: Իսկ երբ վերաքննիչ դատարանը որոշում է կայացրել որդու նկատմամբ տուգանք կիրառելու մասին և իր որդուն ազատ են արձակել  կալանքից, տուժողը խոսել է:

Տուժողը նշեց, որ սկբզնական շրջանում քննիչի մոտ ամբաստանյալի դեմ ցուցմունք չի տվել՝  նրան խղճալով, բացի այդ  «փաստաբան Լիանան իրեն ասել է՝  էդ աղջկան փուռը մի տուր,  վերաքննիչը տղայիդ բաց ա թողնելու»:

Սակայն ավելի ուշ քննիչն իրեն ասել է, որ պետք է ամեն ինչ պատմի այնպես, ինչպես որ իրականում կա, այլապես ինքը քրեական պատասխանատվության կենթարկվի սուտ ցուցմունք տալու համար:

 Պաշտպանական կողմի հարցին, թե ինչո՞ւ է դատախազը բարի կամք դրսևորել, տուժողն ասաց, որ  չգիտի, բայց կարծիք հայտնեց.  «Վատ բան չի արել»: Ավելին, նա գոհունակություն հայտնեց  դատախազից և ընդհանրապես դատախազությունից՝ ասելով. «Մեծատառով մարդ են»: Տուժողը հայտնեց, որ ինքը 3 անգամ դատախազի մոտ է գնացել.  2 անգամ մինչև դատավճռի հրապարակումը, մեկ անգամ դատավճռի հրապարակումից հետո:

Ամբաստանյալ  դատավորի օգնականի հարցին, թե տուժողը տեղյա՞կ է եղել դատախազ Ափինյանի և որդու գործը քննած  դատավոր Վլադիմիր Գրիգորյանի միջև առկա լարված փոխհարաբերությունների մասին, տուժողը բացասական պատասխան տվեց:

Տուժողը բացասական պատասխան տվեց նաև ամբաստանյալի մեկ այլ հարցին, թե տուժողը որդու դատավճռից հետո չի՞ սպառնացել դատախազին, ասելով, որ գնա մտնի դատավորի մոտ,  ասի թող վճիռը փոխի, եթե չէ վիզը կկտրի, իսկ դատախազն էլ քրտնած մտել է դատավորի մոտ՝  ասելով, որ ԱԱԾ-ն ձայնագրություններ ունի այդ գործով, պետք է փոխել…

Ամբաստանյալի այն հարցին, թե ինչո՞ւ է դատախազը պաշտոնական դիրքը չարաշահելով այդքան ջանասիրություն դրսևորել, տուժողը հակադարձեց՝  իսկ ինչո՞ւ   է դատավորը իր օգնականի նկատմամբ այդքան ջանասիրություն դրսևորում:

Տուժողը հայտարարեց նաև, որ ամբաստանվող դատավորի օգնականը քննիչին ասել է, որ իբրև տուժողը  դատախազի սիրուհին է, տուժողն էլ դրանից վրդովված զանգահարել է ու դատախազին ասել, որ իր անվան հետ չխաղան, բարոյականությանը չկպչեն: