Փաստ ինֆո

Սյունիքի մարզպետի առանձնատան մոտ զինված միջադեպի գործով ամբաստանյալ Արտակ Բուդաղյանի պաշտպան, փաստաբան Հայկ Ալումյանն այսօր Վերաքննիչ դատարանում ներկայացրել  է իր բողոքը առաջին ատյանի դատարանի կայացրած մեղադրական դատավճռի դեմ: Պաշտպանը պահանջում է ամբողջությամբ բեկանել  ՀՀ Սյունիքի մարզի ընդհանուր իրավասության դատարանի կողմից 21.08.2015 թվականին կայացված  դատավճիռը, իսկ Արտակ  Բուդաղյանին ճանաչել անմեղ ու արդարացնել ՀՀ քրեական օրենսգրքի 137-րդ  հոդվածի 1-ին մասով՝ սպանության սպառնալիք:

Առաջին ատյանի դատարանը  Արտակ  Բուդաղյանին մեղավոր ճանաչելով հիշյալ  հոդվածով՝ նրան  դատապարտել է տուգանքի 120 000  ՀՀ դրամի չափով: Միաժամանակ դատարանը «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ ազգային ժողովի 03.10.2013 թվականի որոշման  կիրառմամբ Արտակ Բուդաղյանին  ազատել է պատժի կրումից:

01.06.2013 թվականին, ժամը 23:10-ի սահմաններում  Սյունիքի մարզպետ Սուրիկ Խաչատրյանի առանձնատան մոտակայքում տեղի ունեցած վիճաբանության ընթացքում արձակված կրակոցների հետևանքով ստացած հրազենային վնասվածքներով հիվանդանոց են տեղափոխվել Արտակ  Բուդաղյանը,  նրա եղբայրը Ավետիք  Բուդաղյանը և Նիկոլայ   Աբրահամյանը: Ավետիք Բուդաղյանը հիվանդանոցի ճանապարհին մահացել է, իսկ Արտակ Բուդաղյանի և Նիկոլայ Աբրահամյանի ստացած մարմնական վնասվածքները, դատաբժշկական փորձաքննությունների եզրակացությունների համաձայն, դասվել են կյանքի համար վտանգավոր ծանր մարմնական վնասվածքների շարքին:

Հայկ Ալումյանն վերաքննիչ բողոքում արձանագրել է, որ դատավճռում դատարանը առհասարակ չի անդրադարձել պաշտպանական կողմի փաստարկներից և ոչ մեկին, ինչը  «Մարդու իրավունքների և հիմնարար ազատությունների  պաշտպանության մասին» Եվրոպական կոնվենցիայի 6-րդ հոդվածի 1-ին կետով ամրագրված` արդարացի քննության իրավունքի խախտում է:  Դրանով էականորեն սահմանափակվել է նաև մեղադրական դատավճիռը բողոքարկելու` պաշտպանական կողմի իրավունքը:

Ըստ Հայկ Ալումյանի, առաջին ատյանի դատարանի հետևություններն այն մասին, որ  Արտակ Բուդաղյանի ցուցմունքը ոչ արժանահավատ, է,   քանի որ  «չի համապատասխանում իրականությանը, գործի փաստական հանգամանքներին և հետապնդում է քրեական պատասխանատվությունից ու պատժից խուսափելու նպատակ»,  արհեստածին են, կարծրատիպային և չեն արտացոլում գործի իրական պատկերը:

Պաշտպանն ընդգծել է, որ   քրեական պատասխանատվությունից ազատվելու նպատակ ունենալու դեպքում Արտակ Բուդաղյանը մի շարք այդպիսի հնարավորություններ է ունեցել.  նա կարող էր պարզապես չառարկել իր վերաբերյալ դեռևս նախաքննության ընթացքում համաներում կիրառելու դեմ,  նա նաև կարող էր չառարկել իր վերաբերյալ դատարանում համաներում կիրառելու դեմ, նա կարող էր չառարկել վաղեմությունն անցնելու հիմքով քրեական գործի վարույթը կարճելու դեմ 2015 թվականի հունիսի 1-ից հետո` ցանկացած դատական նիստի ժամանակ:

Դատարանն, առանց հաշվի առնելու այս հանգամանքները, ոչ թե վերլուծել ու գնահատել, այլ` պարզապես պիտակավորել է Արտակ Բուդաղյանի ցուցմունքը:

Հայկ Ալումյանը փաստել  է, որ մարզպետի որդու՝ Տիգրան Խաչատրյանի նկատմամբ քրեական հետապնդումը դադարեցնելու պարտադիր պայման է հանդիսացել Արտակ Բուդաղյանի կողմից սպանության սպառնալիքներ տալու փաստը:   Արտակ Բուդաղյանի  արդարացման դեպքում Տիգրան Խաչատրյանի համար  պետք է ՀՀ քրեական օրենսգրքի 112-րդ հոդվածով, այն է՝ դիտավորությամբ առողջությանը ծանր վնաս պատճառելը,  քրեական պատասխանատվության ենթարկվելու իրական հեռանկար առաջանա: Այլ է իրավիճակը  Արտակ Բուդաղյանի համար՝  բոլոր դեպքերում նա պատիժ չի կրելու համաներման հիմքով:

Հ.Ալումյանը նշել է, որ  դատավճռի հիմքում դրված  մի շարք վկաների ցուցմունքներ հակասական են՝ նրանք նախաքննության սկզբնական փուլում ոչինչ չեն ասել սպառնալիքների մասին, սակայն նշել են  հայհոյանքների մասին: Մինչդեռ հատկապես մի քանի վկաներ  ուղղակի շահագրգռված են   եղել, որպեսզի սպառնալիքների հանգամանքը գործով հաստատվի, նրանցից  որևէ մեկը և գործի քննության ոչ մի փուլում չի ունեցել պատճառ թաքցնելու սպառնալիքների հանգամանքը, եթե այդպիսիք իրոք եղած լինեին: Հետևապես, ըստ պաշտպանի,  արժանահավատ են  վկաների նախաքննական ցուցմունքները, որտեղ խոսվում է միայն Արտակ Բուդաղյանի կողմից հնչեցված հայհոյանքների մասին և ոչինչ չի ասված սպառնալիքների վերաբերյալ:

Պաշտպանն արձանագրում է, որ  ՀՀ քրեական օրենսգրքի 137-րդ  հոդվածի 1-ին մասով նախատեսված  հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, իսկ տուժողի բողոքի բացակայությունը նման դեպքերում ՀՀ քրեական դատավարության օրենսգրքի 35-րդ  հոդվածի 1-ին մասի 4-րդ կետի համաձայն, քրեական հետապնդումը բացառող հանգամանք է:   Տվյալ դեպքում բացակայում է  Սուրիկ Խաչատրյանի և նրա հարազատների բողոքը:

Առկա է միայն Լորետա Բարսեղյանի բողոքը, որը ճանաչված է տուժող, սակայն նրա  բողոքի հիման վրա Արտակ Բուդաղյանը չի կարող մեղավոր ճանաչվել ՀՀ քրեական օրենսգրքի 137-րդ  հոդվածի 1-ին մասով`   Սուրեն (կամ անգամ Սուրիկ) Խաչատրյանին ու նրա հարազատներին սպանության սպառնալիք տալու համար:   Այս հանգամանքն իր հերթին, ինքն իրենով, անկախ մյուս բոլոր հանգամանքներից, բավարար է, որպեսզի դատարանը Արտակ Բուդաղյանին առաջադրված մեղադրանքում պարտավոր լինի ճանաչելու անմեղ և նրա նկատմամբ պարտավոր լինի կայացնելու արդարացման դատավճիռ:

«Եթե անգամ դատարանը, մի կողմ թողնելով անմեղության կանխավարկածը և ի վնաս պարոն Արտակ Բուդաղյանի մեկնաբանելով վկաների ցուցմունքների միջև առկա հակասությունները, որոշել էր հիմք ընդունել Սուրիկ Խաչատրյանի հարազատների ու մերձավորների` դատարանում տրված ցուցմունքները, ապա այդ ցուցմունքների հիման վրա կարելի է փաստել միայն հետևյալը. անգամ դրանց մեջ նշված պարագաներում Արտակ Բուդաղյանի ուղղակի դիտավորությունը կայացել է ոչ թե Լորետա Բարսեղյանին, այլ` Սուրիկ Խաչատրյանին սպանության սպառնալիքներ տալու մեջ»,- նշել է իր վերաքննիչ բողոքում Հայկ Ալումյանը: