Փաստ ինֆո

Բանդիտիզմի, սպանության, ավազակության, հափշտակությունների գործով այսօրվա դատական նիստում  կրքերը նորից բորբոքվեցին:

Ամբաստանյալներ Մնացական Սարգսյանն ու Կարեն Վարդանյանը հրաժարվեցին, որպեսզի իրենց դատարանի շենքի տարածքից  դատական նիստերի դահլիճ ներկայացնեն: Այդպիսով նրանք իրենց համերաշխությունն էին հայտնում  անցյալ դատական նիստում երկու այլ ամբաստանյալների՝ Հայկ Կոջոյանի և Ռաֆայել Հարոյանի, հետ, ում նկատմամբ անցյալ դատական նիստում դատարանի կողմից նշանակվել էր  դատական սանկցիա և նրանք տասը ժամով դատական նիստերի դահլիճից հեռացվել էին:

Ավելի ուշ դատարանի դահլիճ վերադարձած Մնացական Սարգսյանն ու Կարեն Վարդանյանը  նորից լքեցին դատական նիստերի դահլիճն այն բանից հետո, երբ Ռաֆայել Հարոյանի  ու Հայկ Կոջոյանի պաշտպաններ, փաստաբաններ Լիպարիտ Սիմոնյանն ու Արմեն Ֆերոյանը միջնորդեցին իրենց պաշտպանյալներին դատական նիստերի դահլիճ վերադարձնել, իսկ դատարանը մերժեց այդ միջնորդությունը:  

Ամբաստանյալ Կարեն Վարդանյանի նկատմամբ նույնպես  դատարանը կիրառեց տասը ժամով դատական նիստերի դահլիճից հեռացնելու մասին դատական սանկցիա:

Սրանով, սակայն,  ամեն ինչ չավարտվեց՝  փաստաբաններ Լ.Սիմոնյանն ու Ա.Ֆերոյանը հայտարարեցին, որ իրենց պաշտպանյալների կողմից լիազորված չեն նրանց բացակայությամբ մասնակցել դատական նիստին և լքեցին դատական նիստերի դահլիճը:

Դատարանը  խորհրդակցական սենյակում քննեց Լ.Սիմոնյանի և Ա.Ֆերոյանի վարքագծին իրավական գնահատական տալու հարցը և  որոշեց  դիմել ՀՀ փաստաբանների պալատ փաստաբանների հանդեպ կարգապահական վարույթ հարուցելու համար: 

Նշենք, որ ամբաստանյալներ Ռաֆայել Հարոյանն  ու Հայկ Կոջոյանն  անցյալ դատական նիստում   դժգոհություն էին հայտնել այն կապակցությամբ, որ թեև ամբաստանյալ Կարեն Վարդանյանը հայտարարել էր, որ փոխանակման կետի վրա ավազակային հարձակման հետ ամբաստանյալներ Ռաֆայել Հարոյանն ու Հայկ Կոջոյանը առնչություն չունեն և որ իր հետ ավազակային հարձակման գնացել է քննությամբ չպարզված  ոմն Վահանը, սակայն, ըստ նրանց, մեղադրող կողմը անգործություն է դրսևորում ու այդ ուղղությամբ համապատասխան քննչական գործողություններ չի սկսում: Այդ հիմքով էլ բացարկ էր հայտնվել մեղադրողի դեմ, որը մերժվել էր: