Փաստ ինֆո

Նշանածին առևանգելու և բռնաբարելու համար 32-ամյա Արտուշը դատապարտվեց  6 տարի ժամկետով ազատազրկման:  Գործով մյուս երկու ամբաստանյալները՝ Լևոնը և Ղազարը, ովքեր օգնել էին Արտուշին նշանածին առևանգելու գործընթացում,  դատապարտվեցին 4-ական տարի ժամկետով ազատազրկման: Ղազարի նկատմամբ  պատիժը պայմանականորեն չի կիրառվի՝  նրա նկատմամբ սահմանվել է  4 տարվա փորձաշրջան:

32-ամյա Արտուշը մի քանի անգամ գնացել է գործընկերոջ տուն, որտեղ տեսել և հավանել է նրա քրոջը, փոխադարձ համաձայնությամբ նրանք հանդիպել են, ապա՝ լրջացրել հարաբերություններն ու նշանվել:  

Նշանդրեքից որոշ ժամանակ անց աղջիկը որոշել է նշանադրության մատանին ետ վերադարձնել, այդ որոշման  պատճառ է դարձել  այն, որ տղայի տանը կազմակերպված խնջույքի ժամանակ տղայի մերձավորները հարբել են, ձևավորվել է տհաճ մթնոլորտ, աղջկա ընտանիքը որոշել է հեռանալ նրանց տանից:  Այս ամենից  աղջիկը հիասթափվել է ու որոշել խզել նշանածի հետ հարաբերությունները:

Փոխհարաբերությունները նշանածի հետ վերջնականապես պարզելու նպատակով հանդիպելու և զրուցելու պատրվակով  փեսացուն աղջկան հրավիրել է Երևան քաղաքի Ամիրյան փողոցում գտնվող «Սեգաֆրեդո» սրճարան, ապա քայլելով գնացել են Հանրապետության հրապարակի մոտակայք, որտեղից իր գործընկերներ Ղազարի և Լևոնի հետ, նախնական համաձայնությամբ, աղջկան նստեցրել են «Մերսեդես Ց 180»   մակնիշի ավտոմեքենան՝   խաբեությամբ տուն ուղեկցելու պատրվակով, ապա նաև բռնության գործադրմամբ առևանգել են և տեղափոխել Գավառ քաղաք:

Այդ նույն օրն էլ վերադարձել են Երևան  և աղջկան տարել Արտուշի տուն, որտեղ էլ վերջինս բռնաբարել է նշանածին՝ վերջինիս կամքին հակառակ մի քանի անգամ սեռական հարաբերություն ունեցել նրա հետ:

Մեղադրանք է առաջադրվել նաև Արտուշի գործընկերներին, ովքեր օգնել են նրա նշանածին առևանգման գործընթացում:

Տուժող աղջկա հայրը դստերն առևանգողների հետ հեռախոսային զրույցի ժամանակ  հայտնել է, որ դստեր առևանգման փաստով դիմել է ոստիկանություն, որից հետո միայն նրանք վերադարձել են Երևան:

Դեպքի հաջորդը օրը, երբ ոստիկանությունից զանգահարել են աղջկան և հրավիրել բաժին, աղջիկը նշանածի հարազատներին ասել է, որ միասին գնան ոստիկանություն, որտեղ և կասի, թե ամեն ինչ իր կամքով է տեղի ունեցել: Տղայի հարազատները, հավատալով, աղջկա հետ գնացել են ոստիկանության բաժին, որտեղ և աղջիկը հաղորդում է տվել՝  իրեն առևանգելու և բռնաբարելու մասին,   որից   հետո  Արտուշը ձերբակալվել  է: Նրան  մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետով՝  մի խումբ անձանց կողմից նախնական համաձայնությամբ մարդուն առևանգելը,  և 138-րդ հոդվածի 1-ին մասով՝  բռնաբարությունը,  իսկ նրա ընկերներ Լևոնին և Ղազարին՝ 131-րդ հոդվածի 2-րդ մասի 1-ին կետով:
Արտուշի նկատմամբ որպես խափանման միջոց է ընտրվել կալանավորումը, իսկ մյուս երկուսի նկատմամբ՝ չհեռանալու մասին ստորագրությունը:

Նշենք, որ տուժող աղջկա միջնորդությամբ գործը դատարանում քննվել է դռնփակ:  «Փաստինֆո»-ն Դատական տեղեկատվական համակարգից տեղեկացել է, որ նախաքննության ընթացքում որպես կասկածյալ ցուցմունք տալով Արտուշը մասնակի խոստովանական ցուցմունք է տվել  այն մասին, որ մինչև ավտոմեքենա նստելը տուժողին չի հայտնել առևանգման մասին։ Ավտոմեքենա նստելուց հետո, երբ այդ մասին հայտնել է,  աղջիկը համառել է` ասելով, որ իրեն տուն տանի, իսկ հետո՝   հանդարտվել։   Ինքն աղջկա  ուսն ու դաստակը կծել է ավտոմեքենայի մեջ գտնվելու ժամանակ, քանի որ վերջինս իրեն ձեռքերով հարվածելիս է եղել, իսկ երբ տուն են վերադարձել,  ուրախությունից գրկել է աղջկան, բարձրացրել իր բնակարան։ Եվ հենց իր բնակարանում էլ՝   առանձնանալով ննջասենյակում,  սկզբում  նշանածը չի ցանկացել հանել տաբատը, հրել է իրեն, խնդրել սեռական հարաբերություն չունենալ իր հետ, բայց  հետո նրա կամքով չորս անգամ ունեցել են սեռական հարաբերություն։

Ի տարբերության այս ցուցմունքի՝   Արտուշը դատարանում այլ բովանդակության ցուցմունք է տվել: Նա, մասնավորապես, հայտնել է, որ բնակարանում գտնվելու ընթացքում փոխադարձ համաձայնությամբ և ցանկությամբ,  փոխադարձ կամքով չորս անգամ ունեցել են սեռական հարաբերություններ,  և որ  այդ ընթացքում,  ըստ ամբաստանյալի,  նշանածը չի գոռացել, չի ընդդիմացել։ 

Դատարանը   գտնել է, որ Արտուշի դատաքննության ընթացքում տված ցուցմունքներն իրականությանը չեն համապատասխանում, արժանահավատ չեն և  քրեական պատասխանատվությունից   և պատժից խուսափելու նպատակ են հետապնդում:   Ավելին,  դատարանն արժանահավատ է գնահատել նրա՝ որպես կասկածյալի տված նախաքննական ցուցմունքները։

Դատարանը գտել է, որ գործով մյուս երկու ամբաստանյալների ցուցմունքներն  ևս  իրականությանը չեն համապատասխանում, արժանահավատ չեն և որ քրեական պատասխանատվությունից  և  պատժից  խուսափելու նպատակ են հետապնդում:

Ամբաստանյալ Լևոնը վերաքննիչ բողոք է ներկայացրել՝ միջնորդելով բեկանել և փոփոխել առաջին ատյանի դատարանի դատավճիռն իր մասով և պայմանականորեն պատիժ  չկիրառել՝ սահմանելով փորձաշրջան: