Փաստ ինֆո

Այսօր ԱԺ Տարածքային կառավարման և Ֆինանսավարկային ու բյուջետային հարցերի հանձնաժողովների համատեղ նիստում՝ Սյունիքի մարզի հաջորդ տարվա բյուջեի քննարկման ժամանակ, Նիկոլ Փաշինյանը հարց ուղղեց Սյունիքի մարզպետ Սուրիկ Խաչատրյանին, թե ինչպես է, որ մարզպետը հացի գները մարզում իջեցնում է, ինչպես նշված է մարզպետարանի կայքում, բայց դրանք մնում են հանրապետությունում ամենաբարձրը:

Բացի այդ, նա անդրադարձավ նաև Սյունիքի մարզպետի ատենախոսությանը: «2014-ին մենք բոլորս մեծ ուրախությամբ տեղեկացանք, որ գիտությամբ եք զբաղվում և «Պետական կառավարման հիմնահարցերը Սյունիքում» թեմայով ատենախոսություն եք գրել ու պատմափիլիսոփայության դոկտորի կոչում եք ստացել: Հետո պարզվեց, որ ոչ թե պատմափիլիսոփայության, այլ պետական կառավարողի կոչում եք ստացել: Արդյո՞ք չեք պատրաստվում շարունակել ձեր գիտական գործունեությունը և առաջիկայում «Պետական բյուջեի նախագծերը Սյունիքում հնագույն ժամանականերից» թեմայով ատենախոսություն գրել»,- հարցրեց Փաշինյանը: Սուրիկ Խաչատրյանը մինչև վերջ լսեց, բայց չպատասխանեց: «Ձեր հարցերը վարման կարգի հետ կապ չունեն, ես չեմ պատասխանում»,- ասաց նա:

Նիստի ավարտին լրագրողները Սյունիքի մարզպետ Սուրիկ Խաչատրյանից հետաքրքրվեցին, թե ինչու նա չպատասխանեց պատգամավոր Նիկոլ Փաշինյանի հարցերին:  «Դեմագոգների հարցերին չեմ պատասխանում»,- ասաց մարզպետը:

Լրագրողները նաև առաջիկա հանրաքվեին անդրադարձան` հետաքրքրվելով, թե ինչ սպասելիքներ կա մարզի ընտրողներից, ինչին մարզպետը պատասխանեց, թե ամենաբարձր տոկոսն են ապահովելու: Իսկ թե ինչի՞ շնորհիվ են նման տոկոսներ ապահովվելու, Սուրիկ խաչատրյանը նշեց. «Ժողովրդի հետ սուտ չենք խոսում: Փոխադարձ հարգանք ու վստահություն կա»:

Ռեժիմի փոփոխության ու նաև իր պաշտոնաթողության մասին հարցին էլ Սյունիքի մարզպետն արձագանքեց.  «Ես միշտ մնալում եմ, դու մի մտահոգվի»: Իսկ հարցին, թե որն է իշխանության մեջ իր երկարակեցության գաղտնիքը, Սուրիկ Խաչատրյանն պատասխանեց. «Նորմալ աշխատելը»:

Լրագրողներն անդրադարձան նաև մարզպետի դեմ մահափորձի փաստով հարուցված քրեական գործին: «Ասում եք, որ Սյունիքում Ձեզ հարգում են, եթե հարգում են, ինչո՞ւ է մահափորձ իրականացվում Ձեր դեմ»,-լրագրողներից մեկի հարցին, մարզպետը պատասխանեց. «Կարողա՞ մեր մարզում մի ապուշ չլինի: Ո՞նց տենց բան կլինի, որ մարզում մի ապուշ չլինի:  Ես նրանց չեմ էլ ճանաչում, դեմքով էլ տեսած չկամ: Ընդամենը ստոր մարդիկ են, որ հանուն փողի գնացին դրան»: