Փաստ ինֆո

Ավան և Նոր-Նորք վարչական շրջանների ընդհանուր իրավասության դատարանում՝ Դավիթ Հարությունյանի նախագահությամբ, այսօր կայացվել է արդարացման դատավճիռ:

Դատարանը, թվով 7 խանութներից գողություն  և գողության փորձ կատարելու մեջ մեղադրվող 3 աղջիկներին ճանաչել է անպարտ և արդարացրել՝ հանցակազմի բացակայության հիմքով:

Նշենք, որ ամբաստանյալների շահերը ներկայացրել են փաստաբան Գարիկ Գալիկյանը և հանրային պաշտպան Արթուր Ալիխանյանը:

Ինչպես ավելի վաղ տեղեկացրել էինք՝ մեղադրողը միջնորդել էր մեղավոր ճանաչել ամբաստանյալներին՝ նրանց առաջադրված մեղադրանքներում   և դատապարտել տուգանքի:

Մեղադրողը միջնորդել էր 24-ամյա Ա.Հ-ին մեղավոր ճանաչել ՀՀ քրեական օրենսգրքի 177-րդ հոդվածի 2-րդ մասի 1-ին կետով՝  մի խումբ անձանց կողմից նախնական համաձայնությամբ գողություն՝  6 դրվագով, և 34-177-րդ հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ գողության փորձ, և դատապարտել 800 000 ՀՀ դրամի չափով տուգանքի, 21-ամյա Ա.Մ-ին մեղավոր ճանաչել  177-րդ հոդվածի 2-րդ մասի 1-ին կետով՝ 5 դրվագով, և 34-177-րդ հոդվածի 2-րդ մասի 1-ին կետով  և դատապարտել  750 000 ՀՀ դրամի չափով տուգանքի, իսկ 25-ամյա Լ.Ս-ին մեղավոր ճանաչել  177-րդ հոդվածի 2-րդ մասի 1-ին կետով և  դատապարտել 750 000 ՀՀ դրամի չափով տուգանքի:

Պաշտպանները միջնորդել էին արդարացնել իրենց պաշտպանյալներին:

Ըստ մեղադրանքի՝ Ա.Հ.-ն, Ա.Մ.-ն և Լ.Ս. ուրիշի զգալի չափերով գույքը գաղտնի հափշտակելու նպատակով, նախնական համաձայնության գալով միմյանց հետ, համաձայն նախնական դերաբաշխման, տարբեր հասցեներում գործող «Երևան Սիթի» խանութներից հափշտակել են ընդհանուր 63.400 դրամի քաղցրավենիք, տնտեսական ապրանքներ, բանջարեղեն: Բացի այդ, 2014թ. ապրիլի 30-ին Ա.Մ. ու Ա. Հ.-ն մուտք են գործել Գայի պողոտայի 16 հասցեում գործող «Երևան Սիթի» սուպերմարկետ և փորձել են գաղտնի հափշտակել տարբեր իրեր, սակայն հանցագործությունն ավարտին չեն հասցրել իրենց կամքից անկախ հանգամանքներում:

Նրանց բոլորի նկատմամբ որպես խափանման միջոց էր ընտրվել չհեռանալու մասին ստորագրությունը: