Փաստ ինֆո

Վարչախումբը սպառնում է «Նոր Հայաստան» հանրային փրկության ճակատի նկատմամբ բռնության դիմել: Այս մասին, մասնավորապես, ասված է «Նոր Հայաստան» հանրային փրկության ճակատի «Ընդդիմության միասնական շտաբ»-ի քիչ առաջ տարածած հայտարարության մեջ:  

Ստորև ներկայացնում ենք հայտարարության տեքստ ամբողջությամբ.

«Վարչախումբը նոր սահմանադրության ընդունման հանրաքվեի գործընթացը սկսել և շարունակում է գործող Սահմանադրության և օրենքների կոպիտ խախտումներով:

Նոր սահմանադրության նախագծի մշակման և դրա քարոզչության կազմակերպման գործին  սահմանադրական դատարանի նախագահի և վարչապետի պաշտոնները զբաղեցնող անձանց ոչ իրավաչափ մասնակցությանը զուգահեռաբար՝ Ազգային ժողովում Հայաստանի հանրապետական կուսակցության խմբակցության ղեկավարը և քարտուղարը բացահայտ կերպով նախ ապատեղեկատվություն են տարածում, իսկ այնուհետև դրա հիման վրա իրավապահպան մարմիններին ուղղորդում են բռնություն գործադրելու ընդդիմադիր ուժերի, առաջին հերթին՝ «Նոր Հայաստան» հանրային փրկության ճակատի նկատմամբ:

Մասնավորապես՝ վարչախումբը, ինչպես նաև նրան սպասարկող լրատվամիջոցները անհիմն կերպով սկսել են «Նոր Հայաստան» հանրային փրկության ճակատի հայտարարությունները և նրա ընտրած քաղաքացիական խաղաղ անհնազանդության մարտավարությունը ներկայացնել որպես Սահմանադրությանը հակասող և բռնության կոչեր պարունակող արարքներ:

Նման գործելաոճի նպատակն է ընթացիկ տարվա ընթացքում Հիմնադիր խորհրդարանի անդամների նկատմամբ արդեն փորձարկված եղանակով արհեստական հիմքեր ստեղծել «Նոր Հայաստան» հանրային փրկության ճակատի անդամներին բռնությունների ենթարկելու, այդ թվում՝ նրանց կեղծ մեղադրանքներով ազատությունից զրկելու համար:

Մինչդեռ միջազգային իրավունքի հանրաճանաչ սկզբունքներով ու նորմերով և դրանք արտացոլող ՀՀ Սահմանադրության համապատասխան դրույթներով խաղաղ անհնազանդությունը ճանաչվում է որպես ժողովրդաիշխանության ձև:

Վերը նշվածի հաշվառմամբ՝ «Ընդդիմության միասնական շտաբ»-ը վճռականորեն շարունակելու է իրավաչափ քայլերով մոբիլիզացնել քաղաքացիներին և հասնել իշխանությունը յուրացրած վարչախմբի հեռացմանն ու ժողովրդի իշխանության վերահաստատմանը»: