Փաստ ինֆո

Մատուցողուհու սպանության աղմկահարույց գործով այսօր ավարտվեց   առանցքային վկա Միլենայի հարցաքննությունը:  Վկան պնդում է, որ գործով միակ ամբաստանյալ Դավիթ Թամրազյանն իրեն պատմել    է, որ սպանել է Մարիամին և որ  իրեն ցույց է տվել դանակը, հեռախոսի մեջ աղջկա լուսանկարը՝ սպանված վիճակում:

Այսօրվա հարցաքննությունը վկայի նախաքննական, առաջին դատաքննության և ներկայիս դատաքննության շրջանակում նրա տված ցուցմունքներում առկա հակասությունների շուրջ էր:

Ամբաստանյալի պաշտպան Կրոմվել Գրիգորյանի՝ հակասությունների շուրջ հարցին վկան պատասխանեց՝ «մեկ է, իրարամերժ բաներ եմ ասելու»: Դատաքննական ցուցմունքներում առաջացած հակասությունները վկան   բացատրում էր նրանով, որ կան հանգամանքներ, որոնք հիմա ինքը չի հիշում, երբեմն էլ վկան ասում էր՝ դատարանում սխալվել եմ: Յուրաքանչյուր հարցից հետո նա ասում էր՝ նախաքննության ցուցմունքն է ճիշտ, «այն, ինչ գրել եմ իմ ձեռքով», իսկ «դատարանում տված ցուցմունքը չեմ պնդում»:

«Դավիթն ասե՞լ է, որ կտրել է Մարիամի պարանոցը» պաշտպանի հարցին վկան հաստատական պատասխան տվեց: Փաստաբանը հիշեցրեց, որ    նախաքննության ընթացքում նա ասել է՝  Դավիթը դանակի երեք հարված է հասցրել Մարիամի կոկորդին: Ի պատասխան վկան հայտարարեց.  պարանոցն ու կոկորդը տարբե՞ր բաներ են: 

Պաշտպանի այն հարցին, թե վերջապես որտե՞ղ  է, ըստ վկայի, Դավիթը ցույց տվել  հեռախոսի նկարները՝  վկան պատասխանեց. «Չեմ հիշում որտեղ է ցույց տվել, բայց որ ցույց է տվել, հաստատ եմ հիշում»:

Պաշտպանը հայտնեց, որ ինքը հիշյալ նկարները ցույց տալու վայրի հետ կապված չորս տարբեր պատասխաններ է տվել՝  մեքենայի մեջ, Համալիրի անցումի տակ, ճանապարհին գնալիս, «Վալնա» բարում, ո՞ր պատասխանն  է ճիշտ: Ի պատասխան վկան հայտարարեց. «Չեմ հիշում որտեղ է եղել, պատկերն այնքան սարսափելի էր, չեմ հիշում, թե որտեղ է եղել: Եթե նախաքննության ընթացքում  «Վալնա» բարում եմ ասել, ուրեմն այդպես է եղել»: