Փաստ ինֆո

Այսօր սկսվել է կաշառքի դիմաց 20 զորակոչիկի ամառային զորակոչից ազատելու հիմք հանդիսացող հիվանդությունների կեղծ ախտորոշումներով  ակտեր տրամադրելու գործով դատաքննությունը:

Մեղադրող դատախազ Վիգեն Հարությունյանը հրապարակեց մեղադրական եզրակացության եզրափակիչ մասը` ներկայացնելով մեղադրյալներից յուրաքանչյուրի մեղադրանքի ծավալը: Ըստ այդմ` ակնաբուժական կլինիկայի բաժանմունքի վարիչը,  62-ամյա կինը, ընդգրկված լինելով բժշկական կենտրոնի զորակոչիկների բժշկական փորձաքննություն իրականացնող հանձնաժողովի կազմում, ինչպես միայնակ, այնպես էլ նախնական համաձայնության գալով նույն բժշկական կենտրոնի ակնաբուժական կլինիկայի ղեկավարի, ով եւս  հանձնաժողովի  անդամ է և  մեկ այլ ակնաբուժական կենտրոնի բժշկական փորձագիտության գծով փոխտնօրեն, բժշկական կենտրոնի զորակոչիկների բժշկական փորձաքննություն իրականացնող հանձնաժողովի անդամ  հետ, իր լիազորությունների շրջանակում գործողություն կատարելու՝ թվով 20 զորակոչիկների վերաբերյալ 2014թ. ամառային զորակոչից ազատելու հիմք հանդիսացող տարբեր ախտորոշումների վերաբերյալ հետազոտման ակտեր տրամադրելու համար որպես կաշառք  ստացել է տարբեր չափի գումարներ: Ըստ մեղադրական եզրակացության` կաշառք տված անձանց ինքնությունը հայտնի չէ:

Ըստ Թալինի տարածքային զինկոմիսարիատում որպես զինվորական կոմիսարին առաջադրված մեղադրանքի՝ նա 1992թ. Լեռնային Ղարաբաղի սահմանների պաշտպանության մարտական գործողությունների մասնակցելու ընթացքում ապօրինի ձեռք է բերել և Արագածոտնի մարզի Աշնակ գյուղում գտնվող իր առանձնատուն է տեղափոխել թվով 92 հատ 9 մմ տրամաչափի և 476 հատ 7,62մմ տրամաչափի ռազմամթերք հանդիսացող փամփուշտներ։

Բացի այդ՝ նա   օգտագործելով իր պաշտոնեական դիրքը, կատարել է կաշառքի միջնորդություն։ Նշենք, որ կաշառքի չափը եղել է 500 -1500 ԱՄՆ դոլար:

Երեք ամբաստանյալ  առաջադրված մեղադրանքում իրեն մեղավոր չճանաչեց, իսկ չորրորդը՝ մեղավոր ճանաչեց մասնակի՝ միայն ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու մեջ:

Դատարանի կողմից սահմանված ապացույցների հաջորդականության համաձայն՝ նախ կհետազոտվեն գործում առկա գրավոր ապացույցները, ապա կհարցաքննվեն վկաները, ամբաստանյալները, իսկ վերջում կհետազոտվեն գործում այլ փաստաթղթերը:

Հեղինակ` «Փաստինֆո»