Փաստ ինֆո

«Հրապարակ»-ը գրում է, որ հունիսի 23-ին Բաղրամյան պողոտայում տեղի ունեցած բողոքի ցույցին մասնակցած Ելենա Օվսյաննիկովան իրեն վիրավորելու և զրպարտելու, թեթևաբարո կին ներկայացնելու, ծաղրի ենթարկելու համար դատի է տվել ՀՀ ոստիկանությանը, փոխոստիկանապետ հունան Պողոսյանին, ոստիկանապետի խորհրդական Նարեկ Մալյանին և ԱԺ պատգամավոր Էդմոն Մարուքյանին:

Երեկ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում տեղի է ունեցել առաջին դատական նիստը, որը հետաձգվել է՝ պատասխանողներից երկուսի բացակայության պատճառով:

Այնուհետև լրատվամիջոցը մեջբերում է պատասխանողներից Նարեկ Մալյանի ֆեյսբուքյան գրառումից. «Սա գնում գալիս մոտենում էր զորքին (խոսքը Օվսյաննիկովայի մասին է), կանգնում էր զինվորների դեմ դիմաց ու զինվոր առ զինվոր նույն անգիր արած տեքստն էր ասում. «Տղամարդու համար ավելի հաճելի գործեր կան, առաջարկում եմ թողնես ամեն բան ու մենք միասին զբաղվենք սեքսով»: Տղաները չէին պատասխանում, բայց տեղեկացնում էին, որ մի անբարոյական կա, գալիս սեքս է ուզում անի բոլորի հետ: Երբ հունիսի 23-ի երեկոյան հերթական անգամ սա ընկերուհու հետ մոտեցավ զորքին ու սկսեց նույն տեսքտերն ասել, սպաներից մեկը բարկացավ, հայհոյեց ու ասեց՝ մյուս անգամ եթե մոտենա զորքին, նրա սեքսուալ ֆանտազիաներն ամբողջ զորքը սիրով կիրականացնի, առավել ևս՝ տղաները դրա կարիքն ունեն»:

Ինչպես թերթն է նշում, վիրավորված կինը, ով ՌԴ քաղաքացի է և հայ ամուսնու և երեխաների հետ բնակվում է Երևանում, հայ պաշտոնյաներից պահանջում է հերքել իր մասին տարածած տեղեկատվությունը, ներողություն խնդրել և 7մլն.դրամի բարոյական փոխհատուցում վճարել՝ 2-ական միլիոն՝ ոստիկանությունից, Մալյանից և փոխոստիկանապետից և 1մլն.՝ Մարուքյանից:

Հոդվածն ամբողջությամբ կարող եք կարդալ «Հրապարակ» օրաթերթի՝ 17.10.15թ. համարում: