Փաստ ինֆո

Գյումրիում Ավետիսյանների ընտանիքի դաժան սպանության գործով որևէ փաստական հանգամանք տուժողների իրավահաջորդների ներկայացուցիչներին  ծանոթ չէ, որից կարելի է  հետևության հանգել, որ  Վալերի Պերմյակովը ուղղորդվել է  այլ անձանց կողմից կամ որ առկա է երկրորդ անձ:  Այս մասին լրագրողների հետ այսօվա հանդիպմանը նշեց տուժողների իրավահաջորդի ներկայացուցիչ, փաստաբան Լուսինե Սահակյանը: «Հիմա առավել ևս կասկած չկա, որ Պերմյակովն  է  կրակոցներ  արձակել, կատարել  հանցագործություն»,- ասաց փաստաբանը:  

Տուժողների իրավահաջորդների ներկայացուցիչ, փաստաբան Երեմ Սարգսյանն անդրադարձավ  ռուսական կողմի իրականացրած ստի դետեկտորի հետազոտությանը՝ այն Հայաստանում չի կիրառվում, ուստի ապացույց չի դիտվում, սակայն կարևոր է գործի տվյալների հետ համադրելու տեսակետից:

Էական հանգամանքների վերաբերյալ հարցերին պատասխանելիս Պերմյակովի մոտ ինչ-որ ակնհայտ դրսևորված հակազդակներ են ի հայտ եկել,  ինչը նշանակում է, որ ինքը ինչ-որ անհանգստություն է  ապրել: Դա  չի զգացվել   ոչ էական հարցերի պարագայում:

Պերմյակովը հայտնել է, որ ինքն է կատարել հանցագործությունը, ինքը մտել է այդ տուն և սպանել տան բոլոր անդամներին: Ի վերջո ինքը միայնա՞կ է եղել, թե՞ ոչ, հարցի հետ կապված  միանշանակ ազդակներ են գրանցվել, որ այո, ինքը  տիրապետում է  տեղեկությունների, որ  ինքը միայնակ է  այդ հանցագործությունը կատարել: Պերմյակովը նշել է նաև, որ մինչև  Ավետիսյանների տուն մտնելն ինքն  այլ տներ էլ է փորձել մտնել, Ավետիսյանների տուն մտել է, որովհետև դարպասները բաց են եղել: 

Ստի դետեկտորի հետազոտության ժամանակ Պերմյակովը հայտնել է կարևոր տեղեկություններ  կրակոցներ կատարելու դիրքերի հետ կապված:  Նա նշել է, որ զենքը հորիզոնական դիրքով էր պահել,  երկու ձեռքով, իսկ տուժող Արմեն Ավետիսյանի պարագայում զենքը վերևից  ներքև է պահած եղել, երբ կրակել է արդեն պառկած վիճակում գտնվող Արմեն Ավետիսյանի վրա՝   թիկունքին:  

Ստի դետեկտորի հետազոտությամբ արժանահավատ է համարվել սպանության շարժառիթն, ըստ որի  լույսն ընկել է  առաջին սենյակում գտնվող Ավետիսյանների դստեր դեմքին, նա  անակնկալ արթնացել է, գոռացել,  և Պերմյակովը կատարել է հանկարծակի,  իրավիճակից բխող գործողություններ: 

Տուժող կողմի ներկայացուցիչները հայտնեցին նաև, որ ռուս քննիչների կողմից Պերմյակովից վերցվել են փորձանմուշներ,  հագուստները առգրավվել են,  մեղադրյալի ձախ ձեռքի, աջ ձեռքի ներսի հատվածներում,  քթանցքերում,    ձախ ականջախեցիում, ինչպես նաև սվիտրի երկու թևքերին էլ հայտնաբերվել  են կրակոցների արգասիքներ:

Երեմ Սարգսյանը նշեց նաև, որ  99, 99 տոկոսով համընկել են Ավետիսյանների տնից գողացված հագուստներին, ինչպես նաև Պերմյակովի զինվորական հագուստների վրա հայտնաբերված Պերմյակովի ԴՆԹ-ները:

Ավետիսյանների տնից գողացված  հագուստները և հեռախոսները ճանաչման են ներկայացվել  տուժողների հարազատներին: Հաստատված փաստ է, որ դրանք պատկանել են Ավետիսյաններին, նշեցին փաստաբանները:

Տուժող կողմի ներկայացուցիչ փաստաբանները հայտնեցին, որ կասկածից վեր է, որ Պերմյակովը  կդատապարտվի ցմահ ազատազրկման՝  հակառակ նրա մոտ առկա շատ լուրջ խնդիրների, նա  մեղսունակ է, նա   հաշիվ է տվել իր գործողությունների համար, ցանկացել է սպանություն կատարևել ու կատարել է գիտակցաբար: